ရှမ်းပြည်နယ်မြောက်ပိုင်း လားရှိုးမြို့တွင် တိုက်ပွဲများဆက်လက်ပြင်းထန်နေသဖြင့် ဒေသံများ မြို့တွင်းမှ အလုံးအရင်းဖြင့် ထွက်ခွာတိမ်းရှောင်နေရာ ကားများထောင်ချီ ပိတ်မိနေကြောင်း သိရသည်။
လားရှိုးမြို့ရပ်ကွက်များအတွင်းသို့ လက်နက်ကြီးများ ကျရောက်ပေါက်ကွဲပြီး ဒေသခံများထိခိုက်သေဆုံးနေရခြင်းကြောင့် ဒေသခံအများအပြား လားရှိုးမြို့မှ ထွက်ခွာနေကြခြင်းဖြစ်ကြောင်း သိရသည်။
“တိမ်းရှောင်တဲ့သူတွေများတော့ လားရှိုးမြို့အဝင်ကော၊ အထွက်ကော ကားတွေပိတ်မိနေတယ်။ စစ်ဘေးရှောင် ကားတွေ မြို့ဝင်မုဒ်ဦးကနေ မယ်ဟန်ဂိတ်ထိပိတ်နေတာ။ ပြည်ထောင်စုလမ်းမကြီး နောင်မွန်ရွာနားမှာလည်း ပစ်ခတ်မှုဖြစ်နေတယ်လို့ သိရတယ်။”ဟု ဒေသခံတစ်ဦးက ယနေ့ နံနက်ပိုင်းတွင် Tachileik News Agency ကို ပြောသည်။
လက်ရှိ လားရှိုးမြို့အခြေအနေမှာ ဖုန်းလိုင်း၊ အင်တာနက်လိုင်းများ ကောင်းမွန်စွာမရသည့်အခြေအနေဖြစ်သည်ဟု သိရသည်။
“လက်နက်ကြီးတွေက မြို့တွင်းပိုင်းကိုကျတော့ တိမ်းရှောင်တဲ့လူပိုများလာတာ။ နေတဲ့သူကလည်းနေတုန်းပေါ့။ ပထမတစ်ကြိမ်တုန်းကလည်း ပြေးခဲ့ကြရပြီးပြီ။ တခါပြောင်းရင် တခါကုန်ကျစာရိတ်ကများတော့ မပြေးကြတော့တဲ့သူတွေလည်းရှိတယ်။”ဟု ဒေသခံတစ်ဦးက ပြောသည်။
ယနေ့မနက်ပိုင်းတွင် လားရှိုး ရက်ကွက်(၅)အထက်မန်အိုင်နှင့် (၅၀၇)တပ်တို့တွင် တိုက်ပွဲများဖြစ်ပွားနေသည်ဟု သိရသည်။
"လားရှိုးကနေ မန္တလေးရောက်ဖို့ (၃)ရက်တောင်ကြာတယ်။ စဥ့်အင်ကနေ လားရှိုးမြို့တွင်း လွတ်လပ်ရေးပန်းခြံနားထိ ပိတ်နေတာ။ ပြည်သူ တွေအရမ်းခက်ခဲနေကြပါတယ်။"ဟု ဒေသခံတစ်ဦးက ပြောသည်။
ယမန်နေ့ကလည်း ရက်ကွက်(၅)အတွင်းသို့ လက်နက်ကျသည့်အပြင် ရက်ကွက်(၇) ကွက်သစ်နယ်မြေ(၁၉)ကိုလည်း လက်နက်ကြီးကျကာ ဒေသခံ(၄)ဦး ထပ်မံသေဆုံးသည်ဟု သိရသည်။
#TachileikNewsAgency
Photo: CJ
