ရှမ်းပြည်နယ်မြောက်ပိုင်း လားရှိုးမြို့တွင် တိုက်ပွဲများဆက်လက်ပြင်းထန်နေပြီး ယနေ့ ၂၀၂၄ခုနှစ် ဇူလိုင်လ (၄)ရက်နေ့တွင် လက်နက်ကြီးများ နေအိမ်နှင့် စာသင်ကျောင်းများပေါ်သို့ ကျရောက်ပေါက်ကွဲခြင်းများရှိနေသည်ဟု သိရသည်။
ယနေ့နံနက်ပိုင်းတွင် လက်နက်ကြီးကျည်သည် လားရှိုးမြို့ ရပ်ကွက် (၉) နယ်မြေ (၃)အနီးသို့ကျကာ သားအမိနှစ်ဦး ပွဲချင်းပြီး သေဆုံးသွားပြီး စာသင်ကျောင်းလည်း ထိမှန်ပျက်စီးသည်ဟု သိရသည်။
"ကလေးတွေမရှိတော့ လူထိတာမရှိခဲ့ဘူး။ တိုက်ပွဲက ရပ်ကွက် ၅ အထိရောက်လာတော့ ပြင်းထန်တယ်လို့ပြောလို့ရတယ်။"ဟု ဒေသခံတစ်ဦးက Tachileik News Agency ကိုပြောသည်။
ထို့အပြင် စစ်ကောင်စီတပ်စွဲထားသည့် ကုန်းညောင်ရွာအနီးကိုလည်း ညီနောင်မဟာမိတ်တပ်များက ဒရုန်းများအသုံးပြု၍ တိုက်ခိုက်ခဲ့ရာ လားရှိုးမြို့တွင်းကပါ ပေါက်ကွဲသံများကြားရသည်ဟု ဆိုသည်။
"ကုန်းညောင်ရွာက လားရှိုးနဲ့မဝေးဘူး။ ဒရုန်းတွေ ၅ စင်းလောက်နဲ့ ဒရော့ဗုံးချတိုက်နေတာ။ လားရှိုးရပ်ကွက်ထဲတွေတောင် အသံကြားရတယ်။ အခုက မန်အိုင်အထိရောက်လာပြီ တိုက်ပွဲက။ မုန်အိုင်ဆိုရင် လားရှိုးရပ်ကွက်(၅)နဲ့ မဝေးတော့ဘူး။"ဟု ဒေသခံတစ်ဦးက ပြောသည်။
လားရှိုးမြို့ရှိ စစ်ကောင်စီတပ်များကို မြောက်ပိုင်းညီနောင်တပ်များက တိုက်ခိုက်နေရာ မြို့တွင်းနေရာများသို့ လက်နက်ကြီးများ ကျရောက်ပေါက်ကွဲပြီး ဒေသခံများ ထိခိုက်သေဆုံးမှုများရှိနေသည်။
ညီနောင်မဟာမိတ်တပ်များ၏ ပိတ်ဆို့တိုက်ခိုက်နေခြင်းကြောင့် လားရှိုးမြို့ရှိစစ်ကောင်စီတပ်များကို လေယာဉ်ဖြင့် လက်နက်၊ ခဲယမ်းများကို ပစ်ချထောက်ပို့နေရသည့် အခြေအနေဖြစ်နေသည်ဟုလည်း သိရသည်။
#TachileikNewsAgency
Photo: CJ
