ထိုင်းနိုင်ငံတွင် (၈)လကျော်အကြာ ဆေးဝါးကုသမှု ခံယူပြီး တာချီလိတ်သို့ ပြန်လည်ကြွလာသည့် နဂါးနှစ်ကောင်ဆရာတော်အား ဖူးမြှော်ရန်အတွက် အာဏာသိမ်းစစ်ခေါင်းဆောင် မင်းအောင်လှိုင်သည် ယနေ့တွင် တာချီလိတ်သို့ တိတ်တဆိတ် ရောက်ရှိလာပြီး တိတ်တဆိတ် ပြန်သွားကြောင်း သိရသည်။
အာဏာသိမ်းစစ်ခေါင်းဆောင် မင်းအောင်လှိုင်သည် တာချီလိတ်လေဆိပ်သို့ ယနေ့ ၂၀၂၃ခုနှစ် ဧပြီလ(၂၉)ရက်နေ့ နံနက်(၁၁)နာရီကျော်အချိန်က တိတ်တဆိတ် ရောက်ရှိလာပြီးနောက် နဂါးနှစ်ကောင်ဆရာတော်အား ဖူးမြှော်ပြီး နေ့လည် (၂)နာရီကျော်အချိန်တွင် တာချီလိတ်မှ တိတ်တဆိတ်ပြန်လည် ထွက်ခွာသွားကြောင်း သိရသည်။
သက်တော်(၉၅)နှစ် ဝါတော်(၇၅)ဝါရှိပြီဖြစ်သည့် တာချီလိတ်မြို့ နဂါးနှစ်ကောင် ပရိယတ္တိစာသင်တိုက်၏ ဦးစီး ပဓါန နာယက ဆရာတော်၊ နိုင်ငံတော် သြဝါဒစရိယ၊ အဘိဓဇမဟာရဌဂုရု၊ အဘိဓဇအဂ္ဂမဟာသဒ္ဓမ္မဇောတိက၊ အဂ္ဂမဟာပဏ္ဍိတ၊ အဂ္ဂမဟာမင်္ဂလဓမ္မဇောတိကဓဇ ဂုဏ်ထူးဆောင် ပါရဂူဘွဲ့ရ နဂါးနှစ်ကောင်ဆရာတော် ဘဒ္ဒန္တဓမ္မသီရိသည် ၂၀၂၃ခုနှစ် ဧပြီလ(၂၈)ရက်နေ့ နံနက်ပိုင်းက မြန်မာ - ထိုင်း ချစ်ကြည်ရေး အမှတ်(၂)တံတားကနေ တဆင့် တာချီလိတ်မြို့ ဆန်ဆိုင်း(က)ရပ်ကွက်ရှိ နဂါးနှစ်ကောင်ကျောင်းတိုက်သို့ ပြန်လည်ကြွလာပြီးနောက် ယနေ့တွင် အာဏာသိမ်းစစ်ခေါင်းဆောင် မင်းအောင်လှိုင်မှ ရောက်ရှိလာခြင်း ဖြစ်သည်။
၎င်းရောက်ရှိနေစဉ်အတွင်း မည်သူမှ ပုံမရိုက်ရန် တားမြစ်ထားပြီး မဖြစ်မနေ မှတ်တမ်းပုံရိုက်သူများကိုလည်း Facebook ပေါ်တွင် မတင်ရန် ကန့်သတ် တားမြစ်ထားသည်ဟု သိရသည်။
