မြန်မာ့ရှေ့ဆောင်ဘဏ် ဥက္ကဌ ဧဒင်ဦးချစ်ခိုင်နှင့် အမှုဆောင်အရာရှိချုပ်တို့အား အာဏာသိမ်းစစ်ကောင်စီက အဂတိမှုဖြင့် ဖမ်းဆီးလိုက်ပြီးနောက် မြန်မာ့ရှေ့ဆောင်ဘဏ်နှင့်ပတ်သက်ပြီး ငွေစုဆောင်းထားရှိသူများ စိုးရိမ်ပူပန်ရန် မလိုကြောင်း စစ်ကောင်စီလက်အောက်ခံ ဗဟိုဘဏ်က ထုတ်ပြန်ကြေညာလာသည်ကို တွေ့ရသည်။

၎င်းတို့နှစ်ဦးကို အဂတိဥပဒေပုဒ်မ ၅၅/၆၃ ဖြင့် အရေးယူထားပြီး ၎င်းတို့၏ နေရာတွင် အာဏာသိမ်းစစ်ကောင်စီက အစားထိုးခန့်အပ်မှုကို  ဧပြီလ(၂၇)ရက်တွင် ပြုလုပ်‌လိုက်ကြောင်း နှင့်  ယခုလို ထုတ်ပြန်မှုသည် မြန်မာနိုင်ငံဗဟိုဘဏ် ၏ ငွေကြေးတည်ငြိမ်ရေး၊ ငွေရေးကြေးရေးစနစ်တည်ငြိမ်ရေးနှင့် ထိရောက်သောငွေပေးချေမှုနှင့် စရင်းရှင်းလင်းမှုစနစ်များ ခိုင်မာ တိုးတက်စေရေး စသည့်ရည်ရွယ်ချက်များ တိုးတက်အောင်မြင်စေ ရန်ကြိုးပမ်းဆောင်ရွက်လျက်ရှိကြောင်း  ထုတ်ပြန်ထားသည်။

ဦးချစ်ခိုင်ကို ပြည်ပခရီးစဉ်တစ်ခုမှအပြန်  ဧပြီလ(၂၅)ရက်နေ့ ညနေပိုင်းက ရန်ကုန်တွင် ဖမ်းဆီးခံရခြင်းဖြစ်သည်။ 

ဦးချစ်ခိုင်သည် ဆောက်လုပ်ရေး၊ ဟိုတယ်နှင့် ခရီးသွား၊ စွမ်းအင်စသည့် လုပ်ငန်းများ လုပ်ကိုင်နေသည့် ဧဒင်ဂရု ၏ ဥက္ကဌဖြစ်ကာ   Denko တို့ကို လည်း ပိုင်ဆိုင်သူဖြစ်သည်။



အာဏာသိမ်းစစ်ကောင်စီသည် နိုင်ငံ့အာဏာကို သိမ်းယူလိုက်ပြီးနောက် NLD ၏ အစိုးရအဖွဲ့ဝင် အားလုံးကို ဖမ်းဆီးပြီး အဂတိမှုများဖြင့် အမှုဖွင့်သလို ၎င်းတို့အား ထောက်ခံခြင်းမရှိသူများကိုလည်း အပြစ်မရှိ မပြစ်ရှာက ပုဒ်မမျိုးစုံတပ်ပြီး အမှုဖွင့် ဖမ်းဆီးလေ့ရှိသည်။