စစ်ကိုင်းတိုင်းဒေသကြီး၊ မုံရွာမြို့မှ ဘဏ်လုံခြုံရေးစောင့် ရဲတပ်သားတစ်ဦး ၂၀၂၁ ခုနှစ် စက်တင်ဘာလ (၁၉) ရက်နေ့တွင် လက်နက်အပြည့်အစုံဖြင့် CDM ပြုလုပ်ပြီး ဟားခါး CDF ထံ သွားရောက်ပူးပေါင်းကြောင်း သိရသည်။
အဆိုပါ CDM ရဲတပ်ဖွဲ့ဝင် လုံခြုံဘေးကင်းရေးအတွက် မုံရွာအခြေစိုက် "သံမဏိအဖွဲ့သားများ-MPDFကိုယ်စားပြုအဖွဲ့"က ပို့ဆောင်ပေးခဲ့သည်ဟု ထုတ်ပြန်လာသည်ကို တွေ့ရသည်။
အဆိုပါ ရဲတပ်သားမှာ မြန်မာ့စီးပွားရေးဘဏ်တွင် လုံခြုံရေးအစောင့်တာဝန်ကျနေစဉ် နံနက် (၄)နာရီဝန်းကျင်မှစ၍ ပျောက်ဆုံးသွား၍ အာဏာသိမ်းအဖွဲ့က အနီးဝန်းကျင် CCTV များမှ လိုက်လံရှာဖွေနေခဲ့ခြင်းဖြစ်ကြောင်း သိရသည်။
အာဏာသိမ်းအဖွဲ့လက်အောက်မှ ထွက်၍ ပြည်သူနှင့်အတူ ရပ်တည်လိုသည့် စစ်တပ်နှင့် ရဲတပ်ဖွဲ့များမှ တပ်ဖွဲ့ဝင်များအနေဖြင့် လက်နက်ငယ်နှင့်ကျည်ဆန်များ တစ်ပါတည်း ယူဆောင်လာနိုင်ပါက ငွေကျပ်သိန်း ၅၀ ၊ လက်နက်ကြီးနှင့်ကျည်ဆန်များ တစ်ပါတည်းယူဆောင်လာနိုင်ပါက ငွေကျပ်သိန်း ၁၀၀ နှင့် ပြည်သူများပိုင်သည့် ဌာနဆိုင်ရာကားများ တစ်ပါတည်းယူဆောင်လာနိုင်ပါက ငွေကျပ် သိန်း ၅၀ ဆုကြေးငွေအဖြစ် လက်ငင်းချီးမြှင့်သွားမည်ဟု CDF – Hakha က စက်တင်ဘာလ (၁၆) ရက်နေ့တွင် ထုတ်ပြန်ထားခြင်းဖြစ်သည်။
