အာဏာသိမ်းစစ်ကောင်စီတပ်၏ စစ်ကားအစီးရေ (၃၀) ဝန်းကျင်သည် ရှမ်းပြည်နယ်တောင်ပိုင်းလမ်းကြောင်းမှ ကရင်နီ(ကယား)ပြည်နယ်၊ လွိုင်ကော်မြို့သို့ ၂၀၂၁ ခုနှစ်၊ ဇွန်လ (၂၄) ရက်နေ့ ညနေ (၄)နာရီဝန်းကျင်၌ ရောက်လာကြောင်း သိရသည်။
ဆီဆိုင်ဖက်လမ်းကနေ ရောက်လာတာပါ။ ကားအစီးရေ(၃၀)ကျော်ပါတယ်။ လူအင်အား၊ ရိက္ခာအပြည့်နဲ့လာတာပါ။ အခု လွိုင်ကော်မြို့အဝင်ကို ရောက်နေပါပြီ
ဟု ဒေသခံတစ်ဦးက တာချီလိတ်သတင်းအေဂျင်စီသို့ပြောသည်။
ရှမ်းပြည်နယ်တောင်ပိုင်း ဆိုက်ခေါင် -ဆီဆိုင် -လွိုင်ကော်လမ်းအတိုင်း စစ်ကောင်စီ၏ စစ်ကားအစီး (၃၀) ကျော်မှာ လူအင်အားနှင့် ရိက္ခာများ အပြည့်အစုံတင်ဆောင်၍ လွိုင်ကော်မြို့သို့ ရောက်ရှိလာခြင်းဖြစ်ကြောင်း သိရသည်။
ရှမ်းပြည်နယ်တောင်ပိုင်း ဆိုက်ခေါင် -ဆီဆိုင်လမ်းကြောင်းမှနေ၍ ကယားပြည်နယ် လွိုင်လင်လေး - လွိုင်ကော်လမ်းအတိုင်း လူနှင့်ရိက္ခာအပြည့်အစုံတင်လာသည့် စစ်ကားများဖြင့် မကြာခဏဝင်ရောက်လာပြီး ကယားပြည်နယ်တွင်း စစ်အင်အား တိုးချဲ့နေသည်ကို တွေ့ရသည်။
အာဏာသိမ်းစစ်ကောင်စီက ကယားပြည်နယ်တွင်း ဇွန်လ (၁၇) ရက်နေ့မှစ၍ စစ်အင်အားများ ထပ်မံတိုးချဲ့ပို့ဆောင်နေပြီး ရှမ်း - ကယားနယ်စပ် လွိုင်လင်လေးမြို့နယ်၊ လွိုင်ကော်မြို့နယ်နှင့် ဒီးမော့ဆိုမြို့နယ် အရှေ့ဖက်ခြမ်း ဒေသတို့တွင် စစ်ကောင်စီတပ်များမှ အင်အားအများအပြားဖြင့် ခြေလျင်လှည့်လည်သွားလာကာ နယ်မြေစိုးမိုးရေး လှုပ်ရှားလာသည်ကို တွေ့ရသည်။
ကယားပြည်နယ်နှင့် ရှမ်းပြည်နယ်နယ်စပ် မိုးဗြဲမြို့တို့တွင် အကြမ်းဖက်စစ်ကောင်စီတပ်နှင့် ကရင်နီအမျိုးသားကာကွယ်ရေးတပ်တို့ ဇွန်လ(၁၅)ရက်နေ့က တိုက်ပွဲ ယာယီရပ်နားထားခဲ့ပြီးနောက်ပိုင်း တိုက်ပွဲ ဖြစ်ပွားခြင်းမရှိသော်လည်း စစ်ကောင်စီက အင်အားတိုးချဲ့၍ ကျေးရွာများအတွင်း တပ်စွဲနေခြင်းကြောင့် ဒေသခံ စစ်ရှောင်ဦးရေ တိုးပွားလျှက်ရှိကြောင်း သိရသည်။
