ထိုင်းနိုင်ငံ မယ်ဆိုင်မြို့တွင် တာချီလိတ်(TBC)အဖွဲ့ဝင် တစ်ဦးထံက မူးယစ်ဆေးဝါး ဖမ်းမိ 

ထိုင်းနိုင်ငံသား(၄) ဦးတို့ကို စိတ်ကြွဆေးပြား (၆) သောင်းနီးပါး၊ ကတ်တမင်းအနယ်းငယ်တို့ဖြင့် ၂၀၂၁ ခုနှစ် ဧပြီလ (၁၁) ရက်နေ့က ဖမ်းဆီးရမိပြီးနောက် ၎င်းတို့နှင့်ဆက်စပ်နေသည့်  မြန်မာနိုင်ငံသား (၁) ဦးကို မယ်ဆိုင်တွင် ဖမ်းဆီးလိုက်ကြောင်း  သိရသည်။

ထိုင်းနိုင်ငံမြောက်ပိုင်း လန်းပန်း​ခရိုင် တွင် ထိုင်းနိုင်ငံသား (၄) ဦးကို စိတ်ကြွရူးသွပ်ဆေးပြား (၅၉,၄၀၀) ပြား အပါအဝင် ကတ်တမင်းအချို့တို့နှင့်အတူ ဖမ်းဆီးရမိပြီးနောက် တရားမဝင် မူးယစ်ဆေးရောင်းဝယ်မှုမှ ဆက်စပ်သူများအား ဆက်လက်ဖေါ်ထုတ်ခဲ့ခြင်းဖြစ်သည်ဟု သိရသည်။

အဆိုပါ ထိုင်းနိုင်ငံသား (၄) ဦးနှင့် ဆက်စပ်သည့် တာချီလိတ် - မယ်ဆိုင် မြို့နယ်အဆင့် နယ်ခြားကော်မတီ(TBC)အဖွဲ့မှ မြန်မာနိုင်ငံသား သန်းထွန်းအောင်အား မယ်ဆိုင်ရှိ  နေအိမ် အခန်းတစ်ခုတွင် ဖမ်းဆီးရမိပြီးနောက် ၎င်းထံမှ မြန်မာ - ထိုင်းနယ်ခြားကော်မတီ (TBC) တံဆိပ်ကပ်ထားသည့် ကားတစ်စီး၊ ဆိုင်ကယ်တစ်စီး၊ ငွေကြေးနှင့် ရွှေထည်ပစ္စည်းအချို့တို့ကိုပါ ရဲတပ်ဖွဲ့က သိမ်းဆည်းလိုက်ခြင်းဖြစ်သည်။

ဖမ်းဆီးခံရသည့် မြန်မာနိုင်ငံသားသည် မြန်မာနှင့်ထိုင်း နှစ်ဖက်စစ်တပ်များက ဦးဆောင်သည့် တာချီလိတ်-မယ်ဆိုင်မြို့နယ်အဆင့် မြန်မာ - ထိုင်းနယ်ခြားကော်မတီ (TBC) တွင် ရုံးလုပ်ငန်းများဆောင်ရွက်ပေးနေသည့် တာချီလိတ်ဒေသခံတစ်ဦးဖြစ်သည်။