တာချီလိတ်မြို့နယ်စည်ပင်သာယာရေးဌာန၏ ၂၀၁၇ - ၂၀၁၈ ဘဏ္ဍာရေးနှစ်တွင် ရပ်ကွက်အလိုက် လမ်း၊တံတား လိုအပ်ချက်များကို ထိထိမိမိ ဆောင်ရွက်နိုင်ရေးအတွက် ရပ်/ကျေးအုပ်ချုပ်ရေးမှူးများနှင့် စည်ပင်သာယာရေးကော်မတီတို့ တွေ့ဆုံ ဆွေးနွေးခဲ့ကြသည်။

ယင်းဆွေးနွေးပွဲကို သြဂုတ်လ(၁၅)ရက်နေ့ နံနက်ပိုင်းက တာချီလိတ်မြို့နယ် စည်ပင်သာယာရေးဌာရုံးရှိ အစည်းအေဝးခန်းမတွင် ကျင်းပပြုလုပ်ခဲ့ရာ တာချီလိတ်မြို့နယ်စည်ပင်သာယာရေးကော်မတီ ဥက္ကဌ ဦးစိုင်းလုံမား နှင့် ကော်မတီဝင်များ၊ စည်ပင်သာယာရေးဌာနမှ တာဝန်ရှိသူများ၊ ရပ်ကွက် အုပ်ချုပ်ရေးမှူးများ နှင့် ဖိတ်ကြားထားသူများမှ တက်ရောက်လာကြပြီး မြို့သန့်ရှင်း သာယာလှပရေး၊ ရေစီးရေလာ ကောင်းမွန်ရေး၊ အခွန်၊အခများ ကောက်ခံနေမှုကိစ္စများကို စသည်တို့ကို ဆွေးနွေးခဲ့ကြောင်း သိရသည်။

"ရပ်ကွက်အလိုက် လိုအပ်နေတဲ့ လမ်း၊ တံတား၊ စည်ပင်သာယာရေးနှင့်ဆိုင်တဲ့ သန့်ရှင်းရေး၊ အမှိုက်ကိစ္စစတဲ့ လုပ်ငန်းတွေကို ထိထိမိမိ ဆောင်ရွက်ဖို့အတွက် ဆွေးနွေးခြင်းဖြစ်ပါတယ်။ ရပ်ကွက် အုပ်ချုပ်ရေးမှူးတွေမှ တဆင့် ရပ်ကွက်အတွင်း လိုအပ်နေတဲ့ လုပ်ငန်းတွေကို တင်ပြလာတာတွေကို ပြည်သူအပေါ် အကျိုးများများ သက်ရောက်မဲ့ လုပ်ငန်းကို ဦးစားပေးပြီး ဘဏ္ဍာရေး စည်းမျဉ်း၊ စည်းကမ်းနဲ့အညီ ဆောင်ရွက်သွားမှာပါ။"ဟု တာချီလိတ်မြို့နယ်စည်ပင်သာယာရေးဦးစီးဌာန အမှုဆောင်အရာရှိ ဒု-ညွှန်ကြားရေးမှူး ဦးကျော်မိုးထွန်းက ပြောသည်။

အဆိုပါ ဆွေးနွေးပွဲတွင် တာချီလိတ်မြို့ပေါ် (၁၁)ရပ်ကွက်မှ သက်ဆိုင်ရာ ရပ်ကွက်အလိုက် ရပ်ကွက်အုပ်ချုပ်ရေးမှူးများမှ လမ်း/တံတား နှင့် ရေစီးရေလာကောင်းမွန်ရေးအတွက် ရေမြောင်းများ စသည့် စည်ပင်သာယာရေးနှင့် သက်ဆိုင်သည့် ကိစ္စရပ်များအားမိမိတို့ ရပ်ကွက်အတွင်း ကွင်းဆင်း စစ်ဆေးပြီး လိုအပ်ချက်များနှင့် ဆောင်ရွက်ရန်များကို စည်ပင်သာယာရေးကော်မတီသို့ ပြန်လည်တင်ပြရန်အတွက် အတည်ပြုဆွေးနွေးခဲ့ကြသည်။

လာမည့်ဘဏ္ဍာနှစ်တွင် ဆောင်ရွက်ရန်အတွက် တာချီလိတ်မြို့ပေါ် ရပ်ကွက် (၁၁)ခုမှ အုပ်ချုပ်ရေးမှူးများက မိမိရပ်ကွက်အတွင်း လမ်းခင်းခြင်း၊ လမ်းဖောက်ခြင်း၊ ရေမြောင်းများ ဆည်ခြင်း နှင့် အမှိုက်ကိစ္စများစသည့် လိုအပ်နေသော လုပ်ငန်းများ ဆောင်ရွက်ပေးနိုင်ရန် အဓိက တင်ပြခဲ့ကြောင်း သိရသည်။

တာချီလိတ်မြို့နယ် စည်ပင်သာယာရေးကော်မတီမှ လာမည့် ၂၀၁၇ - ၂၀၁၈ ခု ဘဏ္ဍာရေးနှစ်တွင် ကောက်ခံရန်အတွက် ကျပ်သိန်း(၁၉,ဝဝဝ)ကျော်ခန့် လျာထား ကြောင်းသိရသည်။

သတင်း/ဓာတ်ပုံ - ဇောင်းညီ