ကျောက်မဲမြို့တွင် Covid-19 ကာကွယ်ရေး သတ်မှတ်ချက်များကို မလိုက်နာသည့် စားသောက်နှင့်ဈေးဆိုင်များကို (၇)ရက် ပိတ်စေသည့် နည်းဖြင့်   စုစုပေါင်း (၅)ဆိုင်ကို အရေးယူထား

ရှမ်းပြည်နယ်( မြောက်ပိုင်း ) ကျောက်မဲမြို့တွင်  Covid-19 ကာကွယ်ရေးအတွက် သတ်မှတ်စည်းကမ်းများနှင့် လိုက်နာရန် နည်းလမ်းများကို မလိုက်နာသည့်အတွက် ဆိုင် (၇)ရက်ပိတ်စေသည့် အရေးယူမှုဖြင့် အရေးယူထားသည်မှာ အောက်တိုဘာလ (၁၂)ရက်နေ့တွင် စုစုပေါင်း (၅)ဆိုင်ရှိနေပြီဖြစ်ကြောင်း သိရသည်။

"Take Away စနစ်ကို မလိုက်နာလို့ ရောင်းချခွင့် (၇)ရက် ရပ်နားထားစေတာက ဒီနေ့အထိ (၄)ဆိုင်ရှိတယ်။ ဗဟိုစျေးထဲမှာ ရွေး/ကော် က အသိပညာပေး စာဆောင်ဖြန့်ဝေနေတုန်း Mask မတပ်ပဲ စျေးရောင်းချနေတဲ့ ဆိုင်တစ်ဆိုင်ကိုတွေ့လို့ ကိုဗစ်ကာကွယ်ရေး အနေနဲ့ စျေးရောင်း/ စျေးဝယ်တဲ့အခါ Mask တပ်ရမယ် ဆိုတဲ့ အချက်ကို မလိုက်နာတဲ့အတွက် အဲ့ဆိုင်ကိုလဲ ရောင်းချခွင့် (၇)ရက် ရပ်နား ထားစေတယ်၊ (၇)ရက် ပိတ်စေခဲ့တာ စုစုပေါင်း (၅)ဆိုင်ရှိပါပြီ"ဟု ကျောက်မဲမြို့နယ်စည်ပင်သာယာရေးဌာနမှ အမှုဆောင်အရာရှိ ဦးစိုးနိုင်ဦး က အောက်တိုဘာ (၁၂)ရက်နေ့တွင် တာချီလိတ်သတင်းအေဂျင်စီသို့ ပြောသည်။

Covid-19 ရောဂါကူးစက်မှု ကာကွယ်ရေးအတွက် ကျောက်မဲမြို့နယ်စည်ပင်သာယာရေး နယ်နိမိတ်အတွင်းမှ ပြည်ထောင်စု လမ်းမကြီးတစ်လျှောက်ရှိ စားသောက်ဆိုင် နှင့် ထမင်းဆိုင်များ အပါအဝင် မြို့တွင်းရှိ ဆိုင်များကိုလည်း စက်တင်ဘာလ (၆)ရက်နေ့က စတင်၍ ပါဆယ် စနစ် ( Take Away ) ဖြင့်သာ ရောင်းချစေခဲ့ ခြင်းဖြစ်သည်။

ချမှတ်ထားသော စည်းကမ်းချက်များအား စျေးဆိုင်များက လိုက်နာမှုရှိ မရှိကို မြို့နယ်စည်ပင်သာယာရေးဌာန၊ မြို့နယ် ကိုဗစ်ကော်မတီ နှင့် လူမှုကူညီရေးအသင်းအဖွဲ့များ ပူးပေါင်း ပါဝင်သည့် အဖွဲ့များဖြင့် နေ့စဥ် ရှောင်တခင်လိုက်လံ စစ်ဆေးမှုများ လုပ်ဆောင် နေခြင်းဖြစ်ပြီး စည်းကမ်းဖေါက်ဖျက်သည့် ဆိုင်များကို ပထမ အကြိမ် သတိပေးခြင်းအဖြစ် (၇)ရက် ရောင်းချခွင့် ရပ်နားစေခြင်း ဖြစ်သည်။