သီတင်းကျွတ်ကာလအတွင်း မီးရှုးမီးပန်းရောင်းသည့် ဆိုင်ကို ရဲတပ်ဖွဲ့ဝင်က ဖမ်းဆီးအရေးယူ
သီတင်းကျွတ်ကာလအတွင်း မီးရှုးမီးပန်းနှင့် အသံကိုကျယ်လောင်စေသော ဗျောက်အိုးများ ရောင်းချသည့် လားရှိုးမြို့ ကုန်စိမ်းဈေး(ပလောင်ဈေး)အတွင်းရှိ ဆိုင်တစ်ဆိုင်ကို ရဲတပ်ဖွဲ့က ဝင်ရောက်ရှာဖွေကာ အမှုဖွင့် အရေးယူလိုက်ကြောင်း သိရသည်။
ရှမ်းပြည်နယ်(မြောက်ပိုင်း) လားရှိုးမြို့၊ ရပ်ကွက်(၂)၊ နယ်မြေ(၁၃)ရှိ ကုန်စိမ်းဈေး(ပလောင်ဈေး)အတွင်းမှ ခင်သန္တာအေး( ခ ) ဗျားငယ်၏ ဆိုင်အား ရဲတပ်ဖွဲ့မှ ၂၀၂၀ခုနှစ် အောက်တိုဘာလ (၃၀)ရက်နေ့ ညနေ(၄)နာရီခွဲ ဝန်းကျင်အချိန်က ဝင်ရောက်စစ်ဆေးရာ မီးရှုးမီးပန်းနှင့်ဗျောက်အိုးများကို တွေ့ရှိ၍ သိမ်းဆည်းလိုက်ပြီး ရောင်းချသူကို အရေးယူလိုက်ခြင်း ဖြစ်ကြောင်း သိရသည်။
ပူးပေါင်းအဖွဲ့မှ ဝင်ရောက်စစ်ဆေး ရှာဖွေရာ အာလူးဗျောက်၊ ရှူးဒိုင်း နှင့်ဗျောက်အိုးများကို တွေ့ရှိခြင်း ဖြစ်သည်။
ဆက်လက်၍ ဆိုင်ပိုင်ရှင် ခင်သန္တာအေး( ခ ) ဗျားငယ်အား လားရှိုးမြို့မရဲတပ်ဖွဲ့က ပုဒ်မ- ၁၈၈ ဖြင့် အမှုဖွင့်ထားပြီး သီတင်းကျွတ်ကာလပြီး၍ တရားရုံးပြန်လည်ဖွင့်လှစ်မှသာ တရားရုံးသို့ ဦးတိုက် လျှောက်ထားမည်ဖြစ်ကြောင်း မြို့မရဲစခန်း စခန်းမှူးထံက သိရသည်။
Tachileik News Agency
သတင်း - နေဖြိုးမြင့်
