ကယားပြည်နယ်တွင်းရှိ အထင်ကရနေရာ(၁၁) ခုအား စက်တင်ဘာလကုန်အထိ ယာယီပိတ်မည်

ကယားပြည်နယ်တွင်းရှိ ခရီးသွားများ လာရောက်လည်ပတ်မှုများပြားသော အထင်ကရ နေရာ(၁၁)ခုကို ၂၀၂၀ ခုနှစ်၊ စက်တင်ဘာလ (၉) ရက်နေ့မှစ၍ ယာယီပိတ်သိမ်းလိုက်ပြီဖြစ်ကြောင်း သိရသည်။

Covid-19 ရောဂါ ကာကွယ်ထိန်းချုပ်နိုင်ရန်အတွက် လူစုလူဝေးဖြစ်များပြားနိုင်သည့်နေရာများဖြစ်သည့် အထင်ကရ နေရာ(၁၁)ခုအား ယာယီပိတ်သိမ်းခြင်းဖြစ်ကြောင်း ပြည်နယ်အစိုးရအဖွဲ့က သတင်းထုတ်ပြန်ထားသည်။

“ပိတ်ထားသင့်တာကြာပါပြီ ။ အရင်တစ်ခေါက်ပိတ်ထားပြီးတော့ ပြန်ဖွင့်တယ်။ အခုက ကိုဗစ်က ဘယ်နေရာမှာရှိနေလည်းဆိုတာ အကုန်ကြိုမသိနိုင်ဘူးလေ။ ဒီကာလမှာကတော့ လုံးဝပိတ်ထားသင့်ပါတယ်။ အစိုးရကလည်း စာထုတ်ပြီးပိတ်လိုက်တော့ တရားဝင်သွားတာပေါ့လေ။”ဟု လွိုင်ကော်မြို့မှ အငှား ယာဉ်မောင်း ကိုဖိုးချို က တာချီလိတ်သတင်းအေဂျင်စီသို့ ပြောသည်။

ကယားပြည်နယ်အတွင်း ခရီးသွားများ အများစုလာရောက်လေ့ရှိသော ထီးစဲခါးရေတံခွန် ၊ ကြတ်ဂူ ၊ငွေတောင်ဆည် ၊ထီးပွင့်ကန် ၊ ကန်ခုနှစ်ဆင့် ၊ ကွိုင်ငံရေထွက်ပေါက်၊ နန်းမယ်ခုံရှိ ရေပြာအိုင် ၊ ဖရူဆိုမြို့နယ် ရှိ ထီပရူနူဂူ ၊ ဆင်ဖြူတောင် စသည့်နေရာများသို့ သွားလာခွင့် ယာယီပိတ်ထားမှာဖြစ်ပြီး CBT ကျေးရွာများဖြစ်သည့် ဒီးမော့ဆိုမြို့နယ် ရှိ  ပန်ပက်ကျေးရွာ ၊ တနီးလာလဲကျေးရွာ နှင့် အခြား CBT ကျေးရွာများကိုလည်း စက်တင်ဘာလ (၉) ရက်နေ့မှ စက်တင်ဘာလ(၃၀) ရက်နေ့အထိ ယာယီပိတ်ထားမည်ဖြစ်သည်။

ကယားပြည်နယ်အတွင်းသို့ လာရောက်ရာတွင် COVID-19 ရောဂါပိုးတွေ့ရှိထားသည့်  မည်သည့်ဒေသမြို့နယ် များမှလာသည်ဖြစ်စေ  Community Based Facility Quarantine (၁၄) ရက် နေထိုင်ပြီး ဓါတ်ခွဲနမူနာ(၁)ကြိမ် စစ်ဆေး၍ Home Quarantine အဖြစ် (၇)ရက် နေထိုင်ရမည်ဖြစ်သည်။

ကယားပြည်နယ်တွင်းသို့ လာရောက်သူများအား မြို့နယ်အသီးသီး၏ အဝင်စစ်ဆေးရေးဂိတ်များ၌ ကျန်းမာရေး စစ်ဆေးခြင်းနှင့် တစ်ပတ်အတွင်းထုတ်ပေးထားသည့် သက်ဆိုင်ရာ ရပ်/ကျေးအုပ်ချုပ်ရေးမှူး ထောက်ခံစာလိုအပ်မည်ဖြစ်သည်။