ကျောက်မဲမြို့တွင် ကိုဗစ် သတ်မှတ်ချက်ကို မလိုက်နာဘဲ မြို့တွင်းသို့ ခိုးဝင်မှုသည့် ယာဉ်မောင်းများရှိနေ၍ ကြပ်မတ်ပေးရန် အချက်(၃)ချက်ဖြင့် ကုန်တင်ယာဉ်မောင်းများ တောင်းဆို

ရှမ်းပြည်နယ်(မြောက်ပိုင်း)၊ ကျောက်မဲမြို့တွင် Covid-19 ရောဂါ ကြိုတင်ကာကွယ်ထိန်းချုပ်ရေးအတွက် ထားရှိသည့် ကုန်တင်ယာဥ်များ စစ်ဆေးမှုစင်တာမှ စီမံခန့်ခွဲမှုလိုအပ်ချက်များ နှင့် ပတ်သက်၍ စက်တင်ဘာလ (၂၄)ရက် နံနက်ပိုင်းက ယာဥ်မောင်းများမှ အချက်(၃)ချက်ဖြင့် စုစည်းတောင်းဆိုခဲ့ရာ မြို့နယ် ကိုဗစ်ကော်မတီနှင့်ပြည်သူ့ကျန်းမာရေးမှ တာဝန်ရှိသူများက လာရောက်ညှိနှိုင်းပေးခဲ့ကြောင်း သိရသည်။

"ယာဥ်မောင်းတွေ မြို့ထဲပေးမဝင်ဘူးလို့ လုပ်မယ်ဆိုရင် တသမတ်တည်း လုပ်စေချင်တယ်။ ကုန်တင်ယာဥ်မောင်းတွေက စည်းကမ်း လိုက်နာပေမယ့် အိမ်စီးကားတွေနဲ့ ခရီးသည်တင်ပြီး မြို့ထဲဝင်နေတာတွေကို ထိထိရောက်ရောက် အရေးယူစေချင်တယ်။ တချို့ကုန်တင်ကားတွေကျ မြို့ပြင်မှာ ကားရပ်ပြီး လူက မြို့ထဲ ဆိုင်ကယ်နဲ့ဝင်နေကြတာတွေ ရှိတယ်။ အဲ့ဒါတွေကိုလဲ မျှမျှတတ အရေးယူစေချင်တယ်။ မြို့ထဲဝင်တဲ့ ကားတွေကိုလဲ Checkpoint 2 က ဖြတ်သန်းခွင့်လက်မှတ် ပါ မပါဆိုတာကို သေချာစစ်ဆေးစေချင်တယ်"ဟု ကုန်တင်ယာဥ်များ စစ်ဆေးမှုစင်တာရှိ ယာဥ်မောင်းတစ်ဦးက ပြောသည်။

ကျောက်မဲမြို့၊ ခိုမုန်းကျေးရွာ စာသင်ကျောင်းရှိ ကုန်တင်ယာဥ်များအား ကြီးကြပ်စစ်ဆေးရေး စင်တာတွင် ကျန်းမာရေးဆိုင်ရာ စစ်ဆေးမှုများမရှိခြင်း၊ လုံခြုံရေးနှင့် ယာဥ်ထိန်းတို့ မရှိခြင်း၊ မြို့တွင်းသို့ စည်းကမ်းမဲ့ ဝင်ရောက်နေသော ယာဥ်မောင်းများအား ထိရောက်စွာ အရေးမယူခြင်း စသည့် အချက် (၃)ချက်ကို ကိုင်တွယ်ဖြေရှင်းပေးရန် ယာဥ်မောင်းများက စုစည်းတောင်းဆိုခဲ့ခြင်း ဖြစ်သည်။

"စိစစ်ကြီးကြပ်ရေးအဖွဲ့က တတ်နိုင်သလောက် လုပ်ပေးနေတာ ဖြစ်တဲ့အတွက် ယာဥ်မောင်းတွေ၊ ပြည်သူတွေဘက်က ပိုမို ပူးပေါင်းပါဝင်ဖို့၊ သတ်မှတ်ချက်တွေကို လိုက်နာဖို့ လိုပါတယ်။ စည်းကမ်းမလိုက်နာဘဲ မြို့ထဲ ခိုးဝင်သူတွေ့ရင် အကြောင်းကြားကြဖို့လဲ မှာထားပါတယ်။ အဲ့လိုတွေ့ခဲ့ရင် ကော်မတီနဲ့သက်ဆိုင်တဲ့ဌာနတွေ အစည်းဝေးလုပ်ပြီး အရေးယူဖို့ ဆုံးဖြတ်ပါမယ်"ဟု ကျောက်မဲခရိုင် ပြည်သူ့ကျန်းမာရေးနှင့်ကုသရေး ဦးစီးဌာနမှ ဒုခရိုင်ဦးစီးမှူး ဒေါက်တာရီလှိုင်ဦးက တာချီလိတ်သတင်းအေဂျင်စီသို့ ပြောသည်။

ကျောက်မဲ ဒုတိယမြို့နယ် အုပ်ချုပ်ရေးမှူး၊ ခရိုင်ပြည်သူ့ ကျန်းမာရေးနှင့် ကုသရေးဦးစီးဌာန၊ ယာဥ်လိုင်းများကြီးကြပ်ရေး မှ တာဝန်ရှိသူများက လာရောက်ညှိနှိုင်းပေးခဲ့ပြီး ယာဥ်မောင်းများ တောင်းဆိုသည့် အချက်(၃)ချက်ကို ဆောင်ရွက်ပေးမည်ဖြစ်ကြောင်း ညှိနှိုင်း​ပေးခဲ့သည်။

မြို့နယ် Covid ကော်မတီ၏ လမ်းညွှန်မှုဖြင့် ခိုမုန်းကျေးရွာရှိ ကုန်တင်ယာဥ်များ စစ်ဆေးမှုစင်တာ( ခိုမုန်း စာသင်ကျောင်း)တွင် ကုန်တင်ယာဥ်မောင်းများကို စက်တင် (၁၅)ရက်ကစတင်၍ သီးသန့်ကန့်သတ်ထားရှိစေခြင်းဖြစ်ပြီး ယာဥ်မောင်း အစားထိုးကာ မြို့တွင်းသို့ ဝင်ရောက်စေခြင်း ဖြစ်သည်။