ကယားပြည်နယ် ဖားဆောင်းမြို့နယ်အတွင်းမှ ရေဘေးသင့်အိမ်ထောင်စုများ အချိန်မီ ပြန်လည်ထူထောင်ရေး ပြည်နယ်အစိုးရ ကူညီမည်

ကယားပြည်နယ်၊ ဖားဆောင်းမြို့တွင် ၂၀၂၀ ခုနှစ်၊ သြဂုတ်လ (၂၂)ရက်နေ့မှစ၍ သံလွင်မြစ်ရေ စိုးရိမ်ရေမှတ်ကျော်လွန်ကာ ရေဘေးသင့်ခဲ့သည့် အိမ်ထောင်စုများ  အချိန်မီ ပြန်လည်ထူထောင်ရေးအတွက် ပြည်နယ်အစိုးရက စီစဉ်ဆောင်ရွက်ပေးမည်ဟု ကယားပြည်နယ် ဝန်ကြီးချုပ်က ပြောသည်။ 

“ကျွန်တော်တို့က ပံ့ပိုးတာကတော့ သူ့ကဏ္ဍအလိုက်ပေါ့နော်။ ကျွန်တော်တို့ ဒီသဘာဝဘေးအန္တရာယ် စီမံခန့်ခွဲရေး အဖွဲ့ကချမှတ်ထားတဲ့ လုပ်ငန်းတာဝန်တွေအတိုင်း ဆောင်ရွက်ပေးရမယ့်မူဝါဒတွေအတိုင်း ပေးမယ်။ အချိန်မှီပေါ့ သူတို့ရဲ့နေရေးထိုင်ရေးအတွက် အဆင်ပြေအောင် ကျွန်တော်တို့ပြန်လုပ်ပေးပါမယ်။ ပြန်လုပ်ပေးဖို့အတွက်လည်း ကျွန်တော်တို့အစိုးရမှာ တာဝန်ရှိပါတယ်။ တာဝန်ရှိတဲ့အတိုင်းပြန်လုပ်ပေးမယ် ဆိုတာကို ပြောချင်တယ်။ ရေဘေးသင့်ပြည်သူတွေအနေနဲ့လည်း အားမငယ်ကြပါနဲ့၊  စိတ်မဆင်းရဲကြပါနဲ့ ။ ဖြစ်လာတဲ့အပေါ်မှာကျွန်တော်တို့ အေးတူပူအမျှ ကျွန်တော်တို့အစိုးရအနေနဲ့ ဆက်လက်လက်တွဲပြီး ဆောင်ရွက်ပေးမယ်ဆိုတာပြောချင်ပါတယ်။ ”ဟု ကယားပြည်နယ် ဝန်ကြီးချုပ်ဦးအယ်လ်ဖောင်းရှိုက တာချီလိတ်သတင်းအေဂျင်စီသို့ပြောသည်။ 

ဖားဆောင်းမြို့တွင် သြဂုတ်လ ၂၂ ရက်နေ့ညမှစ၍ သံလွင်မြစ်ရေမြင့်တတ်လာမှုကြောင့် သံလွင်မြစ်ဘေးတစ်လျှောက်ရှိ ရပ်ကွက်နှင့် ကျေးရွာများတွင် ရေဝင်နစ်မြုပ်မှုကြောင့်  အိမ်ထောင်စုများ ရေလွတ်ရာသို့ ရွှေ့ပြောင်းပေးထားရခြင်းဖြစ်ပြီး သြဂုတ်လ (၂၃) ရက်နေ့ ညနေအထိ ရေဘေးသင့် အိမ်ထောင်စု(၁၆၁)စုမှ လူဦးရေ (၆၅၄)ဦးကို ကယ်ဆယ်ရေးစခန်းများပြုလုပ်ထားသည့် ဘုန်းတော်ကြီးကျောင်းနှင့် စာသင်ကျောင်းများတွင် ရွှေ့ပြောင်းထားရခြင်းဖြစ်သည်။