တာချီလိတ်တွင် ထိုင်းနိုင်ငံမှ နေရပ်ပြန်များအား သတ်မှတ်ထားသည့် သီးခြားနေရာ(၆)နေရာတို့တွင် (၁၄)ရက် ကျန်းမာရေး အခြေအနေ စောင့်ကြည့်ပြီးမှ မိမိတို့ဒေသသို့ ပြန်ခွင့်ပေးမည်ဖြစ်သည့်အတွက် Quarantine ထားမည့် သူများအား ကူညီပေးလိုသူများနှင့် လိုအပ်သည့် ပစ္စည်း ထောက်ပံ့မည့်သူများ ပူးပေါင်းကူညီနိုင်ကြရန် မည်သူကိုမဆို တာချီလိတ်မြို့နယ်အုပ်ချုပ်ရေးမှူးက ဖိတ်ခေါ်ထားရှိသည်။
Quarantine လုပ်မယ့် (၆) နေရာမှာ Quarantine ဝင်နေသူတွေကို (၁၄) ရက် ကူညီပေးကြမယ့်သူတွေ လိုအပ်နေတာပါ။ အခု ကူညီပေးနေသူတွေ၊ ဌာနဆိုင်ရာတွေကလည်း ရေရှည်မှာ ဒီလူတွေချည်းပဲ မဖြစ်နိုင်တော့ စိတ်ပါဝင်စားပြီး ကျွန်တော်တို့နဲ့အတူ ဒီအလုပ်ကို ကူညီလုပ်ဆောင်ပေးနိုင်မယ့် သူတွေကို ဖိတ်ခေါ်ချင်ပါတယ်။ လူများရင်တော့ တစ်ယောက်ဆီ ကူညီပေးရမယ့် အချိန်လည်း နည်းတာပေါ့နော်။ ဒါက ကိုယ့်တစ်မျိုးသားလုံးအတွက် ကူညီပေးရာရောက်တယ်ဆိုတော့ ကူညီပေးစေချင်ပါတယ်
ဟု တာချီလိတ်မြို့နယ် စီမံခန့်ခွဲမှုကော်မတီဥက္ကဌ၊ တာချီလိတ်မြို့နယ်အုပ်ချုပ်ရေးမှူးဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။
ထိုင်းနိုင်ငံမှ နေရပ်ပြန်များအား ပြန်လည်လက်ခံပြီး (၁၄)ရက်ကြာ Quarantine ထားရှိမည့် နေရာများတွင် ကူညီလိုသူများ အနေဖြင့် သက်ဆိုင်ရာ ရပ်ကွက်အုပ်ချုပ်ရေးမှူးများထံ လည်းကောင်း၊ မြို့နယ်အုပ်ချုပ်ရေးမှူး ( 09 4930 7777)ထံလည်းကောင်း ဆက်သွယ်၍ အမည်စာရင်းပေးသွင်းထားနိုင်ကြောင်း သိရသည်။
ယင်းအပြင် အဆိုပါစခန်းများ၌ လိုအပ်မည့် စောင်၊ ခြင်ထောင်၊ ခေါင်းအုံးစသည့် လိုအပ်မည့်ပစ္စည်းများကို လူပေါင်း (၆၀၀)ဝန်းကျင်စာအတွက် လိုအပ်မည်ဖြစ်၍ ကူညီလှူဒါန်းနိုင်ကြကြောင်း သိရသည်။
Tachileik News Agency
