တာချီလိတ်မြို့ရှိ ငွေတောင်ဦးကမ္မဌာန်းကျောင်းတိုက်က မြို့နယ်အတွင်း ဆွမ်းအခက်အခဲရှိသော ဘုန်းကြီးကျောင်းများနှင့်စာသင်တိုက် စုစုပေါင်း (၅၁)ကျောင်းကို ဘတ်(၁၀)သိန်းဖိုး လှူဒါန်းပေးနိုင်ရန် စီစဉ်နေ
ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်အတွင်း ဆွမ်းအခက်အခဲရှိသော ဘုန်းကြီးကျောင်းများနှင့်စာသင်တိုက် စုစုပေါင်း (၅၁)ကျောင်းအား တာချီလိတ်မြို့ရှိ ငွေတောင်ဦးကမ္မဌာန်းကျောင်းတိုက်မှ ဘတ် (၁၀)သိန်းဖိုး တန်ဖိုးရှိသည့် ဆန်၊ ဆီ၊ မာမားခေါက်ဆွဲခြောက် နှင့်သင်္ကန်းစသည်များကို လှူဒါန်းပေးနိုင်ရန် စီစဉ်နေကြောင်း သိရသည်။
လတ်တလောတွင် ဆန်၊ ဆီ၊ မာမားခေါက်ဆွဲခြောက်၊ ငါးသေတ္တာ နှင့် သင်္ကန်းအပါအဝင် လှူဖွယ်ပစ္စည်းများကို ထိုင်းဘတ်ငွေ (၁၀)သိန်း ဝန်းကျင်ဖိုး ဝယ်ယူထားကြောင်း နှင့် မှာယူထားသည့် စားနပ်ရိက္ခာများ ရောက်ရှိလာပါက ရက်ပိုင်းအတွင်း လှူဒါန်းပေးသွားမည်ဖြစ်ကြောင်း သိရသည်။
စာရင်းကောက်ခံရရှိထားသည့် ကျောင်းများသို့ လှူဒါန်းပြီးနောက် ပိုလျှံသည့် စားနပ်ရိက္ခာများကို အချို့ရပ်ကွက်များသို့ လှူဒါန်းပေးသွားမည်ဖြစ်ကြောင်းလည်း သိရသည်။
တာချီလိတ်မြို့နယ်အတွင်းရှိ ဘုန်းကြီးကျောင်းများနှင့်စာသင်တိုက်များအနက် ဆွမ်းအခက်အခဲရှိနိုင်သော စာရင်းများကို သာသနာရေးဦးစီးဌာနက တဆင့် ရရှိထားရာ ဘုန်းကြီးကျောင်းများ၊ စာသင်တိုက်များ နှင့် သီလရှင်ကျောင်း စုစုပေါင်း (၅၁)ကျောင်းကို လှူဒါန်းပေးနိုင်ရန်အတွက် ငွေတောင်ဦးကမ္မဌာန်းကျောင်းတိုက်မှ ဦးစီးပဓာန နာယကဆရာတော် မဟာဂန္တဝါစကပဏ္ဍိတ၊ ကမ္မဋ္ဌာနာစရိယ၊ မဟာကမ္မဋ္ဌာနာစရိယ၊ Ph.D ( Vipassana Bhavana MCU ) (Thailand) အဂ္ဂမဟာကမ္မဋ္ဌာနာစရိယ ဒေါက်တာ ဘဒ္ဒန္တဝိရောစနမှ ဦးစီးဦးဆောင်ကာ စီစဉ်နေခြင်း ဖြစ်သည်။
တာချီလိတ်မြို့ ပုန်းထွန်ရပ်ကွက်ရှိ ငွေတောင်ဦးကမ္မဌာန်းကျောင်းတိုက်တွင် ၂၀၂၀ခုနှစ် ဧပြီလ(၁၀)ရက်နေ့အထိ ရဟန်းသာမဏေ အပါး(၇၀)၊ အမျိုးသမီးယောဂီ (၅၄)ဦး နှင့် ဝေယျာဝစ္စကျောင်းသား (၄၇)ဦး စုစုပေါင်း (၁၇၁)ရှိကြောင်း သိရှိရသည်။
Tachileik News Agency
