ရန်ကုန်တိုင်းဒေသကြီးတွင် နေအိမ်၌အသွားအလာကန့်သတ်စောင့်ကြည့်ထားသူ (၁)ဦးကို COVID 19 အတည်ပြုလူနာအဖြစ် ဓါတ်ခွဲအဖြေထွက်လာ၍ ၂၀၂၀ ခုနှစ်၊ ဧပြီလ (၁၄)ရက်နေ့ ည(၈)နာရီအထိ စုစုပေါင်း အတည်ပြုလူနာ (၆၃)ဦးရှိလာပြီဖြစ်သည်။
COVID-19 ရောဂါစောင့်ကြည့်လူနာနှင့် အသွားအလာကန့် သတ်ခြင်း/ တားမြစ်ခြင်း ဆောင်ရွက်ထားရှိသူ စုစုပေါင်း (၉၁)ဦးအား ပထမအသုတ်အနေဖြင့် စစ်ဆေးခဲ့ရာ အတည်ပြုလူနာ (၁)ဦးကို တွေ့ရကြောင်း အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်)၏ ည (၇)နာရီအချိန် ဓါတ်ခွဲအဖြေထုတ်ပြန်ချက်အရ သိရသည်။
ဓါတ်ခွဲအတည်ပြုလူနာများကို ချင်းပြည်နယ် တီးတိန် ပြည်သူ့ဆေးရုံတွင် (၃) ဦး၊ ရန်ကုန်မြို့၊ ဝေဘာဂီအထူးကုဆေးရုံကြီးတွင် (၄၉) ဦး၊ ရှမ်း ပြည်နယ် (မြောက်ပိုင်း) လားရှိုးပြည်သူ့ဆေးရုံကြီးတွင် (၁)ဦး၊ မော်လမြိုင်ပြည်သူ့ဆေးရုံကြီးတွင် (၁) ဦး၊ ရှမ်းပြည်နယ် (တောင်ပိုင်း) တောင်ကြီးမြို့ စဝ်စံထွန်းပြည်သူ့ဆေးရုံကြီးတွင် (၁)ဦးနှင့် မကွေးပြည်သူ့ဆေးရုံကြီးတွင် (၁)ဦး ကုသပေးနေပြီး ယခုအတည်ပြုလူနာကို ဝေဘာဂီအထူးကုဆေးရုံသို့ ပို့ဆောင်ကုသပေးသွားမည်ဖြစ်ကြောင်း သိရသည်။
လက်ရှိအချိန်ထိ အတည်ပြုလူနာများအနက် COVID-19 ရောဂါပိုးကင်းစင်၍ ဆေးရုံဆင်းခွင့်ပြုကာ ရောဂါစောင့်ကြည့်လူနာနှင့် အသွားအလာကန့် သတ်ခြင်း/ တားမြစ်ခြင်း (Quarantine) ဆက်လက် ဆောင်ရွက် ထားရှိသူ (၂)ဦးနှင့် သေဆုံးသူ (၄)ဦးတို့ ရှိပြီး ဆက်လက်ကုသမှုခံယူနေသူများမှာလည်း အခြေအနေ ကောင်းမွန်နေကြောင်း ကျန်းမာရေးနှင့် အားကစားဝန်ကြီးဌာနက သတင်းထုတ်ပြန်ထားသည်။
Tachileik News Agency
