တာချီလိတ်တွင် တစ်ပတ်လျှင် နှစ်ရက် ယောဂသင်တန်း အခမဲ့ ပို့ချပေးမည်ဖြစ်၍ မည်သူမဆို တက်ရောက်နိုင်

ရှမ်းပြည်နယ်အရှေ့ပိုင်း(တာချီလိတ်)မြို့ ရီဂျီနားဂေါက်ကွင်းထိပ်(လမ်းဘေး)ရှိ  မြက်ခင်းပြင်တွင် မည်သူမဆို လာရောက် တက်ရောက်နိုင်ရန်အတွက် Thae Yogaအဖွဲ့မှ ယောဂသင်တန်းအား တစ်ပတ်လျှင် နှစ်ရက် သတ်မှတ်ကာ အခမဲ့ သင်ကြားပေးသွားမည် ဖြစ်သည့်အတွက် မည်သူမဆို တက်ရောက်နိုင်ကြောင်း သိရသည်။

"မနက်(၆)နာရီ စတယ်၊ (၇)နာရီပြီးတဲ့ သင်တန်းပါ၊ အင်္ဂါနေ့ နဲ့ ဗုဒ္ဓဟူးနေ့ နှစ်ရက်၊ တစ်ပတ်ကို နှစ်ရက်သင်ပေးမှာပါ၊ ယောင်္ကျားလေး၊ မိန်းကလေး၊ ကလေး၊ လူကြီး အသက်အရွယ်မရွေး လာတက်လို့ရပါတယ်"ဟု Thae Yoga နည်းပြဆရာမဖြစ်သူ မသဲဟေမာက တာချီလိတ်သတင်းအေဂျင်စီသို့ ပြောသည်။

ယောဂသင်တန်းအား မည်သူမဆို တက်ရောက်နိုင်ပြီး ကျန်းမာရေး လိုက်စားသူများအနေဖြင့် တက်ရောက်သင့်ပြီး သွေးလည်ပတ်မှုကို အထောက်အကူပြုစေသည့် အတွက် တစ်ပတ်လျှင် နှစ်ရက် သတ်မှတ်ကာ အခမဲ့ သင်ကြားပေးရန် စီစဉ်ခြင်း ဖြစ်ကြောင်း သိရသည်။

"အဓိက ကတော့ တာချီလိတ်က လူတွေအတွက်ပါ၊ ကျန်းမာရေး ဂရုစိုက်တဲ့သူတွေ သွေးတိုး ဆီးချိုသမားတွေ သွေးလည်ပတ်မှု ကောင်းအောင် ဒီလို တစ်ပတ် နှစ်ရက်ဆို သွေးလည်ပတ်မှု တော်တော်လေးကောင်းလာပါပြီ၊ သူတို့ကို အခမဲ့ သင်ပေးချင်တာ သက်သက်ပါ"ဟု နည်းပြဆရာမဖြစ်သူ မသဲဟေမာက ပြောသည်။

Thae Yoga အဖွဲ့၏ တစ်ပတ် နှစ်ရက် အခမဲ့ ယောဂသင်တန်းသို့ တက်ရောက်လိုသူများအနေဖြင့် အပတ်စဉ် အင်္ဂါနေ့ နှင့် ဗုဒ္ဓဟူးနေ့ နံနက်(၆)နာရီမှ (၇)နာရီအတွင်း တာချီလိတ်မြို့ရှိ ရီဂျီးနားဂေါက်ကွင်းထိပ်(လမ်းဘေး)ရှိ  မြက်ခင်းပြင်တွင် လာရောက်၍ ဖြစ်စေ ဖုန်း 09444297150 သို့ ဖြစ်စေ ဆက်သွယ်နိုင်ကြောင်း သိရသည်။

Tachileik News Agency