မိုင်းဆတ် - တာချီလိတ်လမ်းပေါ်တွင် စိတ်ကြွဆေး(၃)သိန်းခွဲ ဖမ်းမိသော်လည်း သယ်ဆောင်လာသူမှာ လျှိူအတွင်း ထွက်ပြေးလွတ်မြောက်
ရှမ်းပြည်နယ် (အရှေ့ပိုင်း) မိုင်းဆတ်မြို့နယ်အတွင်း မိုင်းဆတ် - တာချီလိတ်လမ်း၌ ၂၀၂၀ ခုနှစ်၊ ဇန်နဝါရီလ (၁၈)ရက်နေ့ နေ့လယ် (၁၁) နာရီအချိန်တွင် ရှောင်တခင်ပိတ်ဆို့မှုအတွင်း စိတ်ကြွဆေးပြား သုံးသိန်းခွဲကို သိမ်းဆည်းရမိပြီး မူးယစ်ဆေးသယ်သည့် အမျိုးသားမှာ ထွက်ပြေးလွတ်မြောက်သွားကြောင်း သိရသည်။
လွယ်ပါရင်(၁)ကျေးရွာအနီး မိုင်းဆတ် - တာချီလိတ်လမ်း၌ မော်တော်ယာဉ်နှင့် ဆိုင်ကယ်များကို ရှောင်တခင်ပိတ်ဆို့ စစ်ဆေးရှာဖွေနေစဉ် တာချီလိတ်ဘက်မှ မိုင်းဆတ်ဘက်သို့ ဆိုင်ကယ်မောင်းနှင်လာသည့် အမျိုးသားတစ်ဦးက ပြန်လှည့်မောင်းပြေးရန် ကြိုးစားစဉ် ဆိုင်ကယ်လဲကျသွားပြီး ဆိုင်ကယ်မောင်းနှင်သူက လမ်းဘေးလျှိုအတွင်း ဆင်းပြေးသွားခဲ့ခြင်းဖြစ်ကြောင်း သိရသည်။
လဲကျကျန်ခဲ့သည့် ဆိုင်ကယ်တွင် တင်ဆောင်လာသည့် ဆာလာအိတ် (၂)လုံးအတွင်း ဖယောင်းစက္ကူများဖြင့် ထုပ်ပိုးထားသည့် WY စိတ်ကြွဆေးပြားများကို တွေ့ရသဖြင့် ရဲတပ်ဖွဲ့က သိမ်းဆည်းခဲ့ပြီး ထွက်ပြေးသွားသူနောက်သို့ လိုက်လံဖမ်းဆီးသော်လည်း ဖမ်းဆီးရမိခြင်းမရှိသေးကြောင်း သိရသည်။
ဆာလာအိတ်နှစ်လုံးတွင် စိတ်ကြွဆေးပြား စုစုပေါင်း (၃၅၀,၀၀၀)ကို စစ်ဆေးတွေ့ရသဖြင့် ထွက်ပြေးလွတ်မြောက်နေသည့် မူးယစ်ဆေးသယ်သူအား မိုင်းတွမ်းနယ်မြေရဲစခန်းတွင် မယ(ပ) ၂/၂၀၂၀၊ မူး/စိတ်ပုဒ်မ ၁၉(က)ဖြင့် အမှုဖွင့်ထားကြောင်း သိရသည်။
Tachileik News Agency
