ရှမ်းပြည်နယ်(အရှေ့ပိုင်း)၊ တာချီလိတ်မြို့တွင် စားသုံးရန်မသင့်နှင့် သက်တမ်းလွန်အစားအသောက်များ ဈေးကွက်တွင်ရောင်းချခြင်းမရှိစေရန် အစားအသောက်နှင့် ဆေးဝါးကွပ်ကဲရေးဦးစီးဌာန (FDA)က ရပ်ကွက်အလိုက် လိုက်လံစစ်ဆေးနေရာ ၂၀၁၉ ခုနှစ်၊ ဒီဇင်ဘာလ (၅)ရက်နေ့တွင် ဝမ်ကောင်းရပ်ကွက်အတွင်းမှ ကုန်စုံဆိုင်နှင့် အလှကုန်ပစ္စည်းအရောင်းဆိုင် စုစုပေါင်း (၁၀)ဆိုင်ကို စစ်ဆေးခဲ့သည်။
ဝမ်ကောင်းရပ်ကွက်အတွင်းရှိဆိုင်များတွင် စစ်ဆေးစဉ်အတွင်း စားသုံးရန်မသင့်ကြေငြာထားသည့် Queen Strawberry ဖျော်ရည်နှင့် Hunter ဂျယ်လီတို့အပြင် သက်တမ်းလွန်ကုန်ပစ္စည်းအချို့ကိုပါတွေ့ရသဖြင့် သိမ်းဆည်းကာ ဆိုင်ရှင်များအား ခံဝန်ကတိလက်မှတ်ရေးထိုးစေခဲ့ကြောင်း သိရသည်။
ဝမ်ကောင်းရပ်ကွက်အတွင်းရှိ ကုန်စုံဆိုင် (၇) ဆိုင်နှင့် အလှကုန်ပစ္စည်းဆိုင် (၃) ဆိုင်ကို အစားအသောက်နှင့် ဆေးဝါးကွပ်ကဲရေးဦးစီးဌာန(FDA)မှ ဦးဆောင်ပြီး အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊ ကျန်းမာရေးဌာန၊ စည်ပင်သာယာဌာနနှင့် မြန်မာနိုင်ငံရဲတပ်ဖွဲ့တို့ ပါဝင်သည့် ပူးပေါင်းအဖွဲ့ဖြင့် စစ်ဆေးခြင်းဖြစ်ပြီး ကုန်စုံဆိုင် (၄) ဆိုင်တွင် ရောင်းချနေသည့် Queen အမှတ်တံဆိပ် စတော်ဘယ်ရီအချိုရည် (၂၅) ပုလင်း၊ Hunter အမှတ်တံဆိပ် ငါးပုံဂျယ်လီ (၂၀) ထုပ်နှင့် သက်တမ်းလွန်အချိုရည်နှင့် စားသောက်ကုန်အချို့ကို သိမ်းဆည်းခဲ့ရခြင်းဖြစ်သည်။
"ဝမ်ကောင်းရပ်ကွက်ထဲမှာရှိတဲ့ စားသောက်ကုန်တွေရယ်၊ အလှကုန်တွေရယ်၊ သုံးစွဲရန်မသင့်တဲ့အစားအသောက်နဲ့ သက်တမ်းလွန်အစားအသောက်တွေ၊ သုံးစွဲရန်မသင့်တဲ့ အလှကုန်တွေရောင်းချမှု ရှိ၊ မရှိကို အလှကုန်ပစ္စည်းဆိုင်နဲ့ ကုန်စုံဆိုင်တွေကို စစ်ဆေးခဲ့တာပါ။ သုံးစွဲရန်မသင့်ကြော်ညာထားတဲ့ Queen စတော်ဘယ်ရီရယ်၊ Hunter ဂျယ်လီတွေရယ်ကို သိမ်းဆည်းခဲ့ပါတယ်။ စားသုံးရန်မသင့် ရောင်းတဲ့ဆိုင်တွေကို ခံဝန်ကတိရေးထိုးခိုင်းခဲ့ပါတယ်။ နောက်ကို ဒီအစားအသောက်ကို လုံးဝမရောင်းချပါဘူးဆိုတဲ့အကြောင်း နောက်တစ်ကြိမ်ရောင်းချရင် အမျိုးသားအစားအသောက် ဥပဒေနဲ့ပဲ အရေးယူဆောင်ရွက်သွားမှာပေါ့။ ကော်မတီရဲ့ ဆုံးဖြတ်ချက်အတိုင်းပေါ့"ဟု တာချီလိတ်ခရိုင် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) ဒုကြီးကြပ်ရေးမှူး(ဆေးဝါး)မှ ဒေါ်သိဂီၤထွန်းက တာချီလိတ်သတင်းအေဂျင်စီသို့ ပြောသည်။
မြန်မာ-ထိုင်း နယ်စပ်မြို့ဖြစ်သည့် တာချီလိတ်မြို့တွင် မြန်မာနိုင်ငံအတွင်း မှတ်ပုံတင်မထားသည့် ဆေးဝါးများ၊ အလှကုန်များနှင့် စားသောက်ကုန်များရောင်းချမှုမရှိစေရေးအတွက် ပူးပေါင်းဖွဲ့များဖြင့် စစ်ဆေးလျှက်ရှိပြီး စတင်စစ်ဆေးချိန်တွင် သက်တမ်းလွန်အစားအသောက်များရောင်းချမှု အများအပြားတွေ့ရှိရသော်လည်း စစ်ဆေးမှုများပုံမှန်ပြုလုပ်ခဲ့သဖြင့် လက်ရှိအချိန်တွင် ရောင်းချမှုများလျော့နည်းလာကြောင်း သိရသည်။
Tachileik News Agency
သတင်း၊ဓါတ်ပုံ - ဟန်စိုးထိုက်
