ရှမ်းပြည်နယ်(မြောက်ပိုင်း)၊ လားရှိုးခရိုင်၊ သိန်းနီမြို့နယ် ရေပူအမြဲတမ်းစစ်ဆေးရေးစခန်းတွင် ၂၀၁၉ ခုနှစ်၊ ဒီဇင်ဘာလ (၂၂)ရက်နေ့ နေ့လယ် (၂)နာရီခွဲဝန်းကျင်က မူဆယ်ဘက်မှ လားရှိုးဘက်မောင်းနှင်လာသည့် မော်တော်ယာဉ်တစ်စီးထံမှ ဘိန်းဖြူ (၅၂၈)ဂရမ်ကို ဖမ်းဆီးရမိကြောင်း သိရသည်။
ရေပူအမြဲတမ်းစစ်ဆေးရေးစခန်းမှ ပူးပေါင်းအဖွဲ့နှင့် မူးယစ်တပ်ဖွဲ့စု(၂၄)လားရှိုးမှ အဖွဲ့တို့သည် ရေပူပူးပေါင်းစစ်ဆေးရေးစခန်း ရှောင်ကွင်းလမ်းများတွင် စစ်ဆေးနေစဉ် မူဆယ်ဘက်မှ လားရှိုးဘက်သို့ မောင်းနှင်လာသည့် TOYOTA MARK II အဖြုရောင်ယာဉ်ကို စစ်ဆေးရာ ဆပ်ပြာခွက် (၄၄)ခွက်တွင် ထည့်သွင်းထားသည့် ဘိန်းဖြူ (၅၂၈) ဂရမ်ခန့်ကို စစ်ဆေးတွေ့ရခြင်းဖြစ်ကြောင်း သိရသည်။
မူးယစ်ဆေးများ စစ်ဆေးတွေ့ရှိရသဖြင့် ယာဉ်မောင်း လောက်စီအား သိန်းနီမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေဖြင့် အမှုဖွင့်စစ်ဆေးနေကြောင်း သိရသည်။
ဓါတ်ပုံ - IPRD
