ထိုင်းနိုင်ငံတွင် ခိုတောင်ကျွန်းလူသတ်မှုဖြစ်စဉ်နှင့်ပတ်သက်၍ သေဒဏ်ချမှတ်ခံထားရသည့် မြန်မာ ရွှေ့ပြောင်းလုပ်သား ဝင်းဇော်ထွန်းနှင့် ဇော်လင်းတို့အတွက် ၂၀၁၉ ခုနှစ်၊ အောက်တိုဘာလ (၂၄)ရက်နေ့ နံနက် (၉)နာရီတွင် ထိုင်းဘုရင်မင်းမြတ်ထံ အသနားခံစာတင်သွားမည်ဖြစ်ကြောင်း သိရသည်။

ဘန်ခွမ်အကျဉ်းထောင်မှ ဝင်းဇော်ထွန်းနှင့် ဇော်လင်း၊ ၎င်းတို့နှစ်ဦးလွတ်မြောက်ရေး ဥပဒေ အထောက်အကူ ပေးနေသည့် အဖွဲ့၊ ဝင်းနှင့်ဇော်၏ မိခင်များနှင့် မြန်မာအစိုးရက ဝင်းနှင့်ဇော် လွတ်မြောက်ရေးအတွက် ထိုင်းဘုရင်မင်းမြတ်ထံ အသနားခံစာတင်သွင်းကြမည်ဖြစ်သည်ဟု ဝင်းနှင့်ဇော် လွတ်မြောက်ရေး ဥပဒေအထောက်အကူပေးနေသည့် Andy Hall ထံမှ သိရသည်။

ဝင်းဇော်ထွန်းနှင့် ဇော်လင်းတို့မှာ ၂ဝ၁၄ ခုနှစ်၊ စက်တင်ဘာလအတွင်းက ခိုတောင်ကျွန်းတွင် ဗြိတိန်နိုင်ငံသား နှစ်ဦး အသတ်ခံခဲ့ရသော ဖြစ်စဉ်၌ ကျူးလွန်ကြောင်း စွပ်စွဲချက်ဖြင့် သေဒဏ်ချမှတ်ခြင်းခံထားရပြီး ၂၀၁၉ ခုနှစ်၊ သြဂုတ်လ (၂၉)ရက်နေ့တွင် နွန်ထဘူရီခရိုင်တရားရုံး၌ နောက်ဆုံးအယူခံ ရှုံးနိမ့်ထားခြင်းဖြစ်သည်။

သေဒဏ်ကျ မြန်မာနိုင်ငံသားနှစ်ယောက်အတွက် ထိုင်းဘုရင်မင်းမြတ်ထံ အသနားခံစာတင်ရန်အတွက် မြန်မာအစိုးရကလည်း ကူညီပေးနေခြင်းဖြစ်ပြီး တပ်မတော်ကာကွယ်ရေးဦးစီးချုပ်ကလည်း ထိုင်းနိုင်ငံမှ တာဝန်ရှိသူများနှင့် တွေ့ဆုံခဲ့ကြောင်း သိရသည်။

ဝင်းနှင့်ဇော်လွတ်မြောက်ရေးအတွက် ဥပဒေအထောက်အကူပြုနေသည့်အဖွဲ့ကလည်း ထိုင်းဘုရင်မင်းမြတ်ထံ အသနားခံစာတင်နိုင်ရေးအတွက် ဆက်လက်ကူညီပံ့ပိုးပေးနေခြင်းဖြစ်ပြီး မြန်မာနိုင်ငံ အမျိုးသား လူ့အခွင့်အရေးကော်မရှင်ကလည်း ထိုင်းနိုင်ငံအမျိုးသား လူ့အခွင့်အရေးကော်မရှင်ထံ အကူအညီ တောင်းခံထားခဲ့ခြင်းဖြစ်သည်။

Tachileik News Agency
ဓါတ်ပုံ - Andy Hall