ရှမ်းပြည်နယ်(အရှေ့ပိုင်း) တာချီလိတ်မြို့ရှိ မြန်မာ - ထိုင်း ချစ်ကြည်ရေးတံတား အမှတ်(၁) တွင် အချိန်ကြာမြင့်စွာ ယာဉ်ကြောပိတ်ဆို့မှုကို ဖြေရှင်းရန် နှစ်နိုင်ငံညှိနှိုင်းပြီး အမှတ် (၂)တံတားမှ မော်တော်ယာဉ်အချို့ ဖြတ်သန်းခွင့်ပေးလိုက်သော်လည်း တံတားအမှတ် (၁)တွင် ယာဉ်ကြောပိတ်ဆို့မှု ရှိနေဆဲဖြစ်သည်။

မြန်မာ - ထိုင်းချစ်ကြည်ရေးတံတား အမှတ်(၁)တွင် အချိန်ကြာမြင့်စွာ ယာဉ်ကြောပိတ်ဆို့မှုကို ဖြေရှင်းရန် မြန်မာ၊ ထိုင်းနှစ်နိုင်ငံသဘောတူညီချက်ဖြင့် လူနာတင်ယာဉ်နှင့် ကျောင်းကြိုပို့ယာဉ်များအား ၂၀၁၉ ခုနှစ်၊ သြဂုတ်လ (၂၉)ရက်နေ့မှစ၍ ကုန်စည်ပို့ဆောင်ရေးအတွက် သီးသန့်အသုံးပြုနေသည့် မြန်မာ - ထိုင်း ချစ်ကြည်ရေးတံတား အမှတ် (၂) မှ ဖြတ်သန်းခွင့်ပြုပေးခဲ့ခြင်းဖြစ်သည်။

 မြန်မာ - ထိုင်းချစ်ကြည်ရေးတံတား အမှတ် (၂)ကို ကုန်စည်သယ်ယူပို့ဆောင်ရေးအတွက်သာ အသုံးပြုနေခြင်းဖြစ်သော်လည်း တစ်နိုင်တစ်ပိုင် ကုန်စည်သယ်သည့်ယာဉ်များကို အပြည်ပြည်ဆိုင်ရာ ဝင်ထွက်ပေါက်အဖြစ် အသုံးပြုနေသည့် မြန်မာ - ထိုင်းချစ်ကြည်ရေးတံတား အမှတ် (၁) မှ ဖြတ်သန်းခွင့်ပြုထားခြင်းဖြစ်သည်။

ချစ်ကြည်ရေးတံတားအမှတ် (၁)တွင် ယာဉ်ကြောပိတ်ဆို့မှု လျှော့ချရေးအတွက် ကျောင်းကြိုပို့နှင့် လူနာတင်ယာဉ်များကို အမှတ်(၂)တံတားသို့ ပြောင်းလဲ ဖြတ်သန်းခွင့်ပေးလိုက်သော်လည်း ယာဉ်ကြောပိတ်ဆို့မှုကို ဖြေရှင်းနိုင်ခြင်းမရှိသေးဘဲ ၂၀၁၉ ခုနှစ်၊ အောက်တိုဘာလ (၂၄)ရက်နေ့၌ နံနက် (၁၁)နာရီမှ  ညနေ (၁)နာရီခွဲကျော်အထိ ယာဉ်ကြောပိတ်ဆို့နေခဲ့ခြင်းဖြစ်သည်။

ယာဉ်ကြောပိတ်ဆို့မှု မကြာခဏဖြစ်ပွားနေသည့် တံတားအမှတ် (၁)တွင် သီတင်းကျွတ်ပိတ်ရက်ကာလအတွင်း အောက်တိုဘာလ (၁၁)ရက်နေ့က နံနက် (၈)နာရီမှ ညနေ (၃)နာရီခွဲအထိ စံချိန်တင် ကြာမြင့်စွာ ယာဉ်ကြောပိတ်ဆို့ခဲ့ခြင်းဖြစ်သည်။
Tachileik News Agency
ဓါတ်ပုံ - ဟန်စိုးထိုက်၊ ကျော်ဇင်ဟိန်း