“ကျွန်တော်တို့ တပ်ဖွဲ့အနေနဲ့ကတော့ စိစစ်ရအုံးမှာဖြစ်တဲ့အတွက် အခုချိန်မှာတော့ ဘာမှပြောစရာ မရှိသေးပါဘူး။ စိစစ်ဖို့ လိုနေပါသေးတယ်ခင်ဗျာ”ဟု မြန်မာနိုင်ငံရဲတပ်ဖွဲ့ ပြောရေးဆိုခွင့်ရှိသူ ရဲမှူးကြီး မျိုးသူစိုးက တာချီလိတ်သတင်းအေဂျင်စီသို့ ပြောသည်။

အဆိုပါ စခန်းမှူးနှင့်အဖွဲ့မှာ မူးယစ်တရားခံများစုံစမ်းရန်နှင့် ထောက်ခံချက်များရယူရန်အတွက် ၂၀၁၉ ခုနှစ်၊ စက်တင်ဘာလ (၂၉)ရက်နေ့တွင် စခန်းမှ ထွက်ခွာသွားကြပြီး နမ့်မောကျေးရွာအုပ်စု၊ နမ့်ဆာကျေးရွာရှိ ထမင်းဆိုင်တွင် ထမင်းစားနေကြစဉ် အဖွဲ့အစည်းတစ်ခုက လာရောက်ခေါ်ဆောင်သွားခဲ့ခြင်းဖြစ်သည်ဟု ကနဦးသတင်းများ ထွက်ရှိခဲ့ခြင်းဖြစ်သည်။

“ရဲတပ်ဖွဲ့ဝင်တွေက မူးယစ်ကွင်းဆက်နဲ့ စုံစမ်းဖို့သွားတဲ့အချိန်မှာ အဲဒီရွာက ထမင်းဆိုင်မှာ ထမင်းစားနေရင်း လာခေါ်သွားတာ ခံလိုက်ရတယ်လို့ပဲ ကျွန်တော်တို့ သိထားတယ်။ အဲဒီဒေသမှာက အရင်က ဒီလို ဖမ်းတာဆီးတာတွေတော့ မရှိဖူးဘူး။ မူးယစ်သတင်းနဲ့ဆက်စပ်မှုရှိမလားမသိဘူးလို့တော့ ပြောနေကြတာပဲ”ဟု ဒေသခံတစ်ဦးက တာချီလိတ်သတင်းအေဂျင်စီသို့ ပြောသည်။

TNLA အဖွဲ့ကမူ ၎င်းတို့အမည်သုံး၍ အရပ်ဝတ်ဖြင့်ကားလမ်းတွင် ငွေကြေးကောက်ခံနေ၍ ဖမ်းဆီးလာခဲ့ခြင်းဖြစ်ပြီး ရဲတပ်ဖွဲ့ဝင် များဟုသိရှိခဲ့ခြင်းမရှိဟု ဆိုသည်။

 “ကွတ်ခိုင်မြို့နယ်အတွင်း မန်ဆာ - မုံးစီးလမ်းမကြီးမှာ ကျွန်တော်တို့အဖွဲ့နာမည်နဲ့ ပိုက်ဆံကောက်နေတယ်လို့ ဒေသခံတွေက သတင်းပေးလာတယ်။ ဒါကြောင့် ကျွန်တော်တို့က သွားဖမ်းတဲ့အခါ သူတို့က အရပ်ဝတ်နဲ့ ဖြစ်တယ်။ လက်ပစ်ဗုံးပါတယ်။ ငွေကောက်ခံထားတဲ့ စာရင်းတွေ့တယ်။ အသေးစိတ်ကတော့ စိစစ်ဆဲဖြစ်လို့ ကျွန်တော်လည်း မသိရသေးဘူး”ဟုTNLA ၏ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က တာချီလိတ်သတင်းအေဂျင်စီသို့ ပြောသည်။

ကွတ်ခိုင်မြို့နယ်အတွင်း ပြည်ထောင်စုလမ်းမကြီးတလျှောက်တွင် TNLA အပါအဝင် တိုင်းရင်းသားလက်နက်ကိုင် အဖွဲ့အစည်းများ အမည်ဖြင့် ငွေကြေးတောင်းခံမှုများရှိတတ်ကြောင်း အဆိုပါလမ်းပိုင်းတွင် ဖြတ်သန်းသွားလာသည့် မော်တော်ယာဉ်မောင်းများထံမှ သိရသည်။

Tachileik News Agency