" ကနဦးအဆင့်ပေါ့။ ဆာဗာတွေအကုန်လုံးကို တံတားပေါ်နဲ့ လိုအပ်တဲ့နေရာတွေ အကုန်လုံး တပ်ဆင် သွားမယ်။ လက်ဗွေစနစ်နဲ့ ပထမဆုံးလုပ်တာပေါ့။ လိုအပ်တဲ့အချက်အလက်တွေ ယူထားတဲ့ သဘောပေါ့"ဟု တာချီလိတ်ခရိုင် လူဝင်မှုကြီးကြပ်ရေးဦးစီးဌာနမှ တာဝန်ရှိသူတစ်ဦးက တာချီလိတ်သတင်းအေဂျင်စီသို့ ပြောသည်။

လက်ဗွေမှတ်တမ်းစနစ်ကိုပြောင်းလဲလိုက်သည့်အတွက် ယာယီနယ်စပ်ဖြတ်သန်းခွင့်လက်မှတ် (တံတားကူးလက်မှတ်) ပြုလုပ်သူများအနေဖြင့် ပထမအကြိမ်သာ မှတ်ပုံတင်ပြရန် လိုအပ်တော့မည်ဖြစ်ပြီး တံတားကူးလက်မှတ် ထပ်မံပြုလုပ်ရာတွင် မှတ်တမ်းယူထားသည့် လက်ဗွေအချက်အလက်ဖြင့် ထုတ်ပေးမည်ဖြစ်၍ မှတ်ပုံတင်ပြရန်မလိုအပ်တော့ကြောင်း သိရသည်။

မြန်မာ - ထိုင်းနှစ်နိုင်ငံ ဖြတ်သန်းသွားလာနေသည့် ချစ်ကြည်ရေးတံတားမှ နှစ်နိုင်ငံ တရားခံပြေးများ ဖြတ်သန်းသွားလာမှုကို တားမြစ်နိုင်ရန်အတွက် ယင်းကဲ့သို့ လုံခြုံရေးစနစ် တိုးမြှင့်ခြင်းကို ဆောင်ရွက်လာခြင်း ဖြစ်ပြီး ထိုင်းနိုင်ငံဘက်ကလည်း နယ်စပ်ဖြတ်သန်းသည့်လက်မှတ်များ လုံခြုံရေးအဆင့် မြှင့်တင်မှုအဖြစ် တစ်နိုင်ငံလုံး ဆာဗာချိတ်ဆက်ပြီး အချက်အလက်ရယူသည့်စနစ်ကို ဇူလိုင်လ (၆)ရက်နေ့က ဆောင်ရွက်ခဲ့ခြင်း ဖြစ်သည်။

မြန်မာနိုင်ငံက ထိုင်း၊ အိန္ဒိယနှင့် တရုတ်နိုင်ငံ နယ်စပ်ဝင်ထွက်ပေါက်များတွင် မြန်မာနိုင်ငံသားများ နယ်စပ်ဖြတ်သန်းခွင့် လက်မှတ်များထုတ်ပေးခြင်းအား လုံခြုံရေး အဆင့်မြှင့်တင်ခြင်းကို အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက ၂၀၁၈ ခုနှစ်၊ နိုဝင်ဘာလတွင် စတင်ဆောင်ရွက်လာခြင်း ဖြစ်သည်။

မြန်မာဘက်မှ လုံခြုံရေးအဆင့်မြှင့်တင်လိုက်သည့် ယာယီနယ်စပ်ဖြတ်သန်းခွင့်လက်မှတ်များတွင် လုံခြုံရေးကြိုး၊ လိုဂိုရေစာများအပြင် QR Code တို့ ထည့်သွင်းအသုံးပြုလာခဲ့ခြင်းဖြစ်သည်။

နယ်စပ်ဒေသများတွင် ဖြတ်သန်းသွားလာသည့် နိုင်ငံသားများအား ယာယီနယ်စပ်ဖြတ်သန်းခွင့် လက်မှတ် (တံတားကူးလက်မှတ်)နှင့် နယ်စပ်ဒေသများတွင် နေထိုင်သူများကို သက်ဆိုင်ရာအိမ်နီးချင်းနိုင်ငံများနှင့် သဘောတူညီချက်အရ နယ်စပ်ဖြတ်သန်းခွင့်လက်မှတ်(တံတားကူးစာအုပ်)တို့ကို လူဝင်မှုကြီးကြပ်ရေး ဦးစီးဌာနက စိစစ်ထုတ်ပေးနေခြင်းဖြစ်သည်။

သတင်း #ဟန်စိုးထိုက်
ဓါတ်ပုံ - ကျော်ဇင်ဟိန်း