မကွေးမြို့၊  ရွာသစ်ရပ် (၁၈)လမ်းနေ ဒေါ်စန်းစန်းသည် နံနက် (၇)နာရီခွဲဝန်းကျင်က နေအိမ်ရှေ့၌ ဓာတ်ကြိုးပြတ်ကျနေသည်ကိုတွေ့ရ၍ ဖယ်ရှားရာမှ ဓာတ်လိုက်ခံရပြီး မိခင် ဓာတ်လိုက်ခံနေရသည်ကို တွေ့ရှိသည့် အသက်(၁၃)နှစ်အရွယ်သားဖြစ်သူက မိခင်ကို ဆွဲလိုက်ရာမှ သားအမိနှစ်ဦးလုံး ဓါတ်လိုက်ခံလိုက်ရခြင်းဖြစ်ကြောင်း သိရသည်။

ဒေါ်စန်းစန်း၏ခင်ပွန်းဖြစ်သူ ဦးဇော်ဇော်က ဆိုင်ဖွင့်ရန် နေအိမ်မှ ကားဖြင့်ထွက်ခွာစဉ် သားအမိနှစ်ဦး ဓါတ်လိုက်နေသည်ကို တွေ့ရသဖြင့် ကားပေါ်မှဆင်းကာ ဓါတ်ကြိုးအား ဆွဲယူလိုက်ပြီး သားအမိနှစ်ဦးအား တွန်းဖယ်ရန်ကြိုးစားရာမှ ဓါတ်လိုက်သေဆုံးသွားခြင်းဖြစ်ကြောင်း သိရသည်။

 “ကလေးက ဘာမှမဖြစ်ပါဘူး။ ဦးဇော်ဇော်နဲ့ ဒေါ်စန်းစန်းတို့ကတော့ သတိလစ်သွားကြပါတယ်။ ကရုဏာ ရှင်အသင်းက မော်တော်ယာဉ်နဲ့ မကွေးတိုင်းဆေးရုံကြီးကို ပို့ဆောင်ခဲ့တာမှာ ဒေါ်စန်းစန်းက သတိပြန်ရပြီး ကောင်းမွန်လာခဲ့ပါတယ်။ ဦးဇော်ဇော်ကတော့ ဝဲဘက်လက်ညိုးမှာ ပွန်းပဲ့ညိုမည်းဒဏ်ရာ၊ ယာလက်ဖဝါး မှာ ညိုမည်းဒဏ်ရာသာ ရရှိခဲ့တာပေမဲ့ သတိပြန်လည်လာခြင်းမရှိတော့ဘဲ သေဆုံးသွားပါတယ်”ဟု မကွေးမြို့မ ရဲစခန်းမှူး ဒုရဲမှူး မိုးဇော်နိုင်က  တာချီလိတ်သတင်းအေဂျင်စီသို့ ပြောသည်။

အဆိုပါဖြစ်စဉ်ကို မကွေးမြို့မရဲစခန်းက သေမှုသေခင်းအမှတ်စဉ် ၁၄/၂၀၁၉ ဖြင့် အမှုဖွင့်ထားကြောင်း သိရသည်။

လျှပ်စစ်ဝါယာကြိုးများ၊ ဓါတ်ကြိုးများ ပြတ်ကျ၊ ပြုတ်ကျနေသည်ကို တွေ့ပါက အနီးအနားသို့မသွားဘဲ သက်ဆိုင်ရာ လျှပ်စစ်ဌာနသို့ ဆက်သွယ်အကူအညီတောင်းခံရန်လိုအပ်ပြီး ဓါတ်လိုက်နေသူအား ဖယ်ရှားလိုပါက ဖယ်ရှားသူကိုပါ ဓါတ်မလိုက်စေရန် လျှပ်စီးမကူးသည့် ကြားခံပစ္စည်းအသုံးပြု ဖယ်ရှားရမည်ဖြစ်သည်။

ဓါတ်လိုက်ခံရသူအား အနီးဆုံးဆေးရုံသို့ မပို့မီ ရှေးဦးသူနာပြုစုနည်းဖြင့် အသက်ပြန်ရှုလာရန် ပြုစုပေးရန် လိုအပ်ခြင်းဖြစ်သည်။

သတင်း #ဖီးနစ်