မကွေးတိုင်းဒေသကြီးဝန်ကြီးချုပ်က တိုင်းဒေသကြီးရဲတပ်ဖွဲ့ကို နယ်မြေခံရဲတပ်ဖွဲ့မပါစေဘဲ တိုက်ရိုက် ကိုင်တွယ်ဖမ်းဆီးစေခဲ့ရာမှ လောင်းကစားဝိုင်းမှ ကား၊ဆိုင်ကယ် (၁၀၇)စီးနှင့် လောင်းကစားပြုလုပ်သူ (၁၃) ဦးအား ရေစကြိုမြို့နယ်၌ ဖမ်းမိပြီးနောက် နယ်မြေခံရဲတပ်ဖွဲ့အား စိစစ်အရေးယူမှုများ ဆောင်ရွက်သွားမည်ဟု ဒုတိုင်းရဲတပ်ဖွဲ့မှူးထံမှ သိရသည်။

 “သူတို့ရဲ့ ပါဝင်ပတ်သက်မှုအပေါ် စိစစ်ပြီးတော့မှ ကျွန်တော်တို့က ရဲစည်းကမ်းထိန်းသိမ်းရေး ဥပဒေနဲ့အညီ အရေးယူဆောင်ရွက်သွားမှာပါ” ဟု မကွေးတိုင်းဒေသကြီး ဒုတိယရဲတပ်ဖွဲ့မှူး ရဲမှူးကြီး ခင်မောင်လတ်က အောက်တိုဘာလ (၂၀)ရက်နေ့တွင် တာချီလိတ်သတင်းအေဂျင်စီသို့ ပြောသည်။

မကွေးတိုင်းရဲတပ်ဖွဲ့အနေဖြင့်လည်း သတင်းရရှိပါက အချိန်နှင့်တစ်ပြေးညီ ဖမ်းဆီးမှုများပြုလုပ်လျှက်ရှိရာ လွန်ခဲ့သည့် တစ်လကျော်ခန့်က  မြိုင်နှင့် ပခုက္ကူမြို့နယ်များမှ လောင်းကစားဝိုင်းကြီးများအား ဆိုင်ကယ်များ၊ လက်ကိုင်ဖုန်းများ၊ လောင်းကြေးငွေများနှင့်တကွ ဖမ်းဆီးနိုင်ခဲ့သဖြင့် မည်သူမဆို ရာဇဝတ်မှုကျူးလွန်ကြောင်း သတင်းရရှိပါက မကွေးတိုင်းဒေသကြီးရဲတပ်ဖွဲ့သို့ သတင်းပေးတိုင်ကြားရန် ဖိတ်ခေါ်ကြောင်း ဒုတိယရဲတပ်ဖွဲ့မှူး ရဲမှူးကြီး ခင်မောင်လတ်က ပြောသည်။

ဝန်ကြီးချုပ်၏ တာဝန်ပေးချက်အရ တိုင်းဒေသကြီးရဲတပ်ဖွဲ့က ၂၀၁၉ ခုနှစ်၊ အောက်တိုဘာလ (၁၈) ရက်နေ့ နေ့လယ် (၂) နာရီကျော်တွင် ရေစကြိုမြို့နယ်၊ ဖူလုံကျေးရွာ၊ တောထဲရှိ ဂျင်ဝိုင်းလောင်းကစားဝိုင်း ပြုလုပ်ရာနေရာသို့ အသွင်ယူ ဝင်ရောက်ဖမ်းဆီးခဲ့ကြခြင်းဖြစ်ကြောင်း သိရသည်။

ယင်းသို့ဖမ်းဆီးရာတွင် ဂျင်ဝိုင်းလောင်းကစားပြုလုပ်နေကြသူ (၁၃)ဦးနှင့်အတူ လက်ကိုင်ဖုန်း မျိုးစုံ(၁၀)လုံး၊ မော် တော်ယာဉ်မျိုးစုံ (၇)စီး၊ မော်တော်ဆိုင်ကယ် အစီး(၁၀၀)၊ ဂျင်ဝိုင်းလောင်းကစားပြုလုပ်ရာတွင် အသုံးပြု သော ဆက်စပ်ပစ္စည်းများ၊ လောင်းကြေးငွေစက္ကူရောရာ ငွေကျပ်(၃၂)သိန်းကျော်တို့ကို တွေ့ရှိသိမ်းဆည်းရမိခဲ့ခြင်းဖြစ်သည်ဟု သိရသည်။

အဆိုပါဖြစ်စဉ်နှင့်ပတ်သက်၍ မကွေးတိုင်းဒေသကြီးအစိုးရအဖွဲ့ ဝန်ကြီးချုပ်က ၎င်း၏လူမှုကွန်ယက် စာမျက်နှာ၌ အောက်တိုဘာလ (၁၉)ရက်နေ့တွင် “ကျွန်တော့်ကို သတင်းပေးတဲ့ နယ်ခံရွာသူ/သားတွေ ကိုယ်တိုင်က ၊ ရေစကြိုရဲ ၊ ပခုက္ကူရဲ သိလို့မဖြစ်ပါ ။ သိလျှင် အလုပ်မဖြစ်ပါ ဆိုလို့ဖမ်းမဲ့နေ့ ၊ မနက်ကျမှသာလျှင် ၊ မကွေးမြို့မှ ရဲမှူးဌေးလွင် ၊ ဦးဆောင်သော ရဲတပ်ဖွဲ့ကို ၊ အရပ်သားများအဖြစ် ၊ လျှို့ဝှက်စေလွှတ် ၊ ဖမ်းဆီးခိုင်းရခြင်း ဖြစ်ပါသည် ။ စီးနင်း ဖမ်းဆီးမည့် အစီအစဉ်ကို ၊ ရေစကြိုရဲ ၊ ပခုက္ကူရဲ လုံးဝမသိပါ။ မကွေးတိုင်း ရဲတပ်ဖွဲ့မှူး ၊ ဒုတိုင်းရဲတပ်ဖွဲ့မှူးများမှလွဲ၍ မသိကြပါ။ ယခုလဲ ၊ သက်သေခံအဖြစ် သိမ်းဆည်းထားသည့် ဆိုင်ကယ်များ ၊ ကmးများကို အစားထိုးလဲလှယ်မည်ဟု ကြားသိရသဖြင့် ၊ လိုအပ်သလို ညွှန်ကြားထားပါကြောင်း ” ဟု ရေးသားဖေါ်ပြထားသည်ကို တွေ့ရသည်။

လောင်းကစားဝိုင်းနှင့်အတူ ဖမ်းမိသည့် ကားဆိုင်ကယ်နှင့် သက်သေခံပစ္စည်းများအား သိမ်းဆည်းထားပြီး ဖမ်းမိသူ (၁၃)ဦးကို ရေစကြိုမြို့မရဲစခန်းတွင် (ပ)၅၀၃/၂ဝ၁၉၊ လောင်းကစားဥပဒေပုဒ်မ ၁၅(က) အရ အမှုဖွင့် စစ်ဆေးနေသည်ဟု သိရသည်။

သတင်း #ဖီးနစ်
ဓာတ်ပုံ-ရဲတပ်ဖွဲ့