ထိုင်းနိုင်ငံ နခွန်ပထုန်ဘက်သို့ သယ်လာသည့် အိုက်စ် (၁၅၀၀) ကီလို သယ်ဆောင်လာသည့် ကုန်တင် မော်တော်ယာဉ်တစ်စီးကို တက်ခ်ခရိုင်အတွင်း ဖမ်းဆီးရမိထားပြီး မူးယစ်ဆေးသယ်သူများက မြန်မာ - ထိုင်းနယ်စပ် မူးယစ်ဆေးသယ်သည့်လမ်းကြောင်းသစ်များ အသုံးပြုလာသည်ဟု ထိုင်းရဲတပ်ဖွဲ့က သတင်းထုတ်ပြန်သည်။

ကုန်တင်ယာဉ်၏ ကြမ်းခင်းအောက်တွင်ဝှက်၍ သယ်လာသည့် မူးယစ်ဆေးများကို ၂၀၁၉ ခုနှစ်၊ အောက်တိုဘာလ (၁၈)ရက်နေ့တွင် ထိုင်းနိုင်ငံ တက်ခ်ခရိုင်စစ်ဆေးရေးဂိတ်၌ ဖမ်းမိခြင်းဖြစ်သည်ဟု သိရသည်။

မော်တော်ယာဉ်၏ကြမ်းခင်းအတွင်း အံဝှက်လုပ်၍ တရုတ်လက်ဖက်ခြောက်အိတ်ဖြင့် ထုပ်ပိုးထားသည့် အိုက်စ်မူးယစ်ဆေးများကို သယ်လာသည့် မော်တော်ယာဉ်မောင်းနှစ်ဦးက  ၎င်းတို့အား တက်ခ်ခရိုင်မှ နခွန်ပထုန်သို့ မောင်းနှင်ပေးရန် ငှားရမ်းခဲ့ခြင်းဖြစ်ပြီး မူးယစ်ဆေးများပါလာသည်ကို မသိဟု ငြင်းဆိုထားကြောင်း သိရသည်။

မြန်မာ - ထိုင်းနယ်စပ်တွင် နှစ်ဖက်ပူးပေါင်းဖမ်းဆီးမှုများကြောင့် မူးယစ်မှောင်ခိုများက မူးယစ်ဆေးသယ်သည့် လမ်းကြောင်းသစ်များ ရှာဖွေအသုံးပြုလာနေသည်ဟု ထိုင်းရဲတပ်ဖွဲ့က ဆိုသည်။

Ref: Khaosod