ဝန်ထမ်းများအား အိမ်ရာချထားပေးရေးအတွက် အကောင်အထည်ဖေါ်မည့် မြို့ကွက်သစ်စီမံကိန်း အပိုင်း(ဈ)ကို မြေကွက်ဖေါ်ထုတ်မည့် ဟိန်းထက်အောင်ကုမ္ပဏီနှင့် သက်ဆိုင်ရာဌာနများ ပါဝင်သည့် ကော်မတီက စက်တင်ဘာလ (၂၁)ရက်နေ့က မြေယာတိုင်းတာမှုများ လုပ်ဆောင်ခဲ့ခြင်းဖြစ်သည်။
"ရှမ်းပြည်နယ်အစိုးရအဖွဲ့ကို ကျွန်တော်တို့တင်တဲ့ စီမံချက်ရှိပါတယ်။ ဒီဟာကို အကောင်အထည်ဖော်မယ့် စီမံချက်။ အဲဒီမှာ သက်ဆိုင်ရာကော်မတီမှာ လုပ်ငန်းအဖွဲ့အသီးသီးပါပါတယ်။ ဒီစီမံချက်ကို (၅)လပိုင်းလောက်က ပြည်နယ်ကို တင်ထားတာမှာ ဒီရက်ပိုင်းမှာပဲ အတည်ပြုပေးလိုက်တာပါ။ ဒါကြောင့် သက်ဆိုင်ရာ ကော်မတီနဲ့ အကွက်တွေဖော်ဖို့ မြေပြင်ဆင်းတိုင်းခဲ့ပါတယ်။ တတ်နိုင်သမျှပြည်သူလက်ဝယ်ကို ပေးအပ်နိုင်ဖို့ အမြန်ဆုံးစီမံဆောင်ရွက်နေပါတယ်"ဟု တာချီလိတ်မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။
ရှမ်းပြည်နယ် အေးချမ်းသာယာရေးနှင့် ဖွံ့ဖြိုးရေးကောင်စီ(အရှေ့ပိုင်း) ကျိုင်းတုံမြို့က မြေလွတ်မြေရိုင်း (၉၃.၁၉)ဧကအား ဖော်ထုတ်လုပ်ကိုင်ခွင့်ရထားသူ ဒေါ်နန်းခမ်းတစ်ထံမှ လုပ်ကိုင်ခွင့် ပြန်လည် ရုပ်သိမ်းခြင်းမရှိဘဲ ၂၀၁၀ ခုနှစ် သြဂုတ်လ (၂၈)ရက်နေ့ နေ့စွဲပါစာဖြင့် ဒေါ်နန်းခမ်းတစ်၏ လုပ်ကိုင်ခွင့်ရမြေမှ ဧက (၄၀)ပေါ်တွင် မြေယာကွက်သစ် စီမံကိန်းကို ခွင့်ပြုခဲ့ခြင်းဖြစ်သည်။
ဆန်ဆိုင်း(ခ)ရပ်ကွက်ရှိ မြေဧက (၄၀)တွင် မြေယာကွက်သစ်တာဝန်ယူဖေါ်ဆောင်သည့် ကုမ္ပဏီများကလည်း ၂၀၁၇ ခုနှစ်အထိ စီမံကိန်းပြီးအောင် ဆောင်ရွက်နိုင်ခြင်းမရှိဘဲဖြစ်နေစဉ် ဒေါ်နန်းခမ်းတစ်နှင့် မြေယာအငြင်းပွားမှု ဖြစ်ပွားခဲ့ခြင်းဖြစ်သည်။
အဆိုပါ မြေယာအငြင်းပွားမှုကို ပြည်ထောင်စုတရားလွှတ်တော်ချုပ်ရုံးမှ ၂၀၁၉ ခုနှစ် မတ်လ(၄)ရက်နေ့တွင် စာချွန်တော်အမိန့်ချမှတ်လိုက်ရာ၌ “ဈ”မြေယာကွက်သစ်ဖေါ်ဆောင်ခွင့်ရရှိသွားခြင်းဖြစ်သည်။
စာချွန်တော်အမိန့်အရ အကောင်အထည်ဖေါ်ခွင့်ရထားသည့် “ဈ”မြေကွက်သစ်မှ မြေပေးမိန့်ရထားသူဦးရေ (၅၀၀) ဝန်းကျင်အား မြေကွက်များအမြန်ဆုံး ပေးအပ်နိုင်ရေးအတွက် မြို့နယ်အထွေထွေအုပ်ချုပ်ရေးဦးစီးဌာန၊ မြေစာရင်းဌာနနှင့် စည်ပင်သာယာရေးဌာနတို့ပါဝင်သည့် ကော်မတီတစ်ရပ်ဖွဲ့စည်းကာ ကြီးကြပ် ဆောင်ရွက် နေကြခြင်းဖြစ်ကြောင်း သိရသည်။
အဆိုပါ “ဈ”မြေကွက်သစ်ဖေါ်ဆောင်ရာနေရာတွင် ဝင်ရောက်နေထိုင်သူများလည်းရှိနေရာ ကျူးကျော်သူများ ဖယ်ရှားပေးရေးကို မြေပေးမိန့်ရထားသူများက ဆောင်ရွက်သွားရမည်ဖြစ်ကြောင်း သိရသည်။
“အခုက မြေကျူးနေတဲ့အပိုင်းရှိတယ်။ မကျူးတဲ့အပိုင်း ရှိတယ်။ လက်ရှိမှာတော့ မကျူးတဲ့အပိုင်းကို အရင်စ လုပ်မယ်။ ကျူးတဲ့အပိုင်းကိုတော့ မြေကွက်ရထားတဲ့ပိုင်ရှင်က ဥပဒေအရ ပြန်တရားစွဲ ဖယ်ရှားရမှာပေါ့။ မြေကွက်ပိုင်ရှင်က မြန်မြန်တရားစွဲရင် မြန်မြန်ပြန်ရမယ်ပေါ့”ဟု တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စောက ပြောသည်။
“ဈ”မြေကွက်သစ်မှ မြေကွက်များကို ဟိန်းထက်အောင်ကုမ္ပဏီ၊ ဦးစိန်မောင်နှင့် ဦးဇော်ဇော်ထွန်းတို့ထံမှ ဝယ်ယူထားသူများအပြင် အဆိုပါမြေနေရာတွင် မြေလွတ်မြေရိုင်းဖေါ်ထုတ်ခွင့်ရထားခဲ့သူ ဒေါ်နန်းခမ်းတစ်ထံမှ မြေကွက်ဝယ်ယူထားသူများကို ထိုစဉ်က မြို့နယ်စီမံခန့်ခွဲရေးကော်မတီ ဥက္ကဌ ဖြစ်သူ ဦးထွန်းဝင်းအောင်ဦးဆောင်သည့် တာဝန်ရှိသူများက ၂၀၁၇ ခုနှစ်၊ စက်တင်ဘာလ (၂၅)ရက်နေ့က ခေါ်ယူတွေ့ဆုံခဲ့ကာ အဆိုပါမြေနေရာမှာ အစိုးရစီမံခန့်ခွဲပိုင်ခွင့်ရှိသော မြေဖြစ်ကြောင်းကို အသိပေးပြောကြားခဲ့ခြင်းဖြစ်သည်။
၂၀၁၇ ခုနှစ်၊ စက်တင်ဘာလ (၂၅)ရက်နေ့အထိ အဆိုပါ မြေကွက်သစ်နေရာတွင် ကျူးကျော်နေထိုင်သည့် အိမ်ခြေ(၅၀)ကျော်ရှိနေပြီး စက်တင်ဘာလ (၁၄)ရက်နေ့မှစ၍ တစ်လပြည့်သည့်နေ့အတွင်း ဖယ်ရှားကြရန် နို့တစ်စာများ ထုတ်ထားခဲ့ခြင်းဖြစ်သည်။
မြေယာအငြင်းပွားမှုများ ဆက်လက်မဖြစ်ပေါ်ရန်အတွက် “ဈ”မြေကွက်သစ်နှင့် ပတ်သက်၍ အချင်းအချင်း ရောင်းဝယ်ခြင်း၊ ရပ်ကွက်အုပ်ချုပ်ရေးမှူးမှ လက်မှတ်ထိုးပေးခြင်းများ မပြုလုပ်ရန် မြို့နယ်အုပ်ချုပ်ရေးမှူးမှ ၂၀၁၈ခုနှစ်တွင်းက စ၍ အသိပေးထားခဲ့သည်။
Tachileik News Agency
