လာအိုနိုင်ငံမှ မြန်မာလုပ်သားများ ကိုရိုနာဗိုင်းရပ်စ် ဂယက်ကြောင့် (၈)ရက်အတွင်း တာချီလိတ်သို့ (၁,၆၂၆)ဦး ပြန်ရောက်
တရုတ်နိုင်ငံ ဟူပေပြည်နယ်တွင် စတင်ဖြစ်ပွားပြီး နိုင်ငံပေါင်း (၂၅)နိုင်ငံအထိ ကူးစက်ပျံ့နှံ့နေသည့် ဝူဟန်အဆုတ်ရောင်ရောဂါဟု ခေါ်သည့် ကိုရိုနာဗိုင်းရပ်စ် ဂယက်ကြောင့် လာအိုနိုင်ငံ ဘိုဘီယိုပြည်နယ်အတွင်း အလုပ် လုပ်ကိုင်နေကြသည့် မြန်မာနိုင်ငံသားများမှာ မြန်မာနိုင်ငံ တာချီလိတ်သို့ ဝမ်ပုံဆိပ်ကမ်းမှ တဆင့် ဝင်ရောက်လာကြရာတွင် ဖေဖော်ဝါရီလ(၄)ရက်နေ့အထိ (၈)ရက်တာ ကာလအတွင်း (၁,၆၂၆)ဦး ရှိပြီး ဖြစ်ကြောင်း သိရသည်။
လာအိုနိုင်ငံ မိုင်းမောဆိပ်ကမ်းမှ တဆင့် တာချီလိတ်သို့ ဝမ်ပုံဆိပ်ကမ်းသို့ ပြန်လည်ဝင်ရောက်လာသည့် မြန်မာလုပ်သားများအား ကိုရိုနာဗိုင်းရပ်စ် ကာကွယ်ရေးအတွက် စစ်ဘက်ဆိုင်ရာ ဆေးမှူးများ၊ ဝမ်ပုံတိုက်နယ်ဆေးရုံမှ တာဝန်ရှိသူများ၊ လဝက နှင့် မိုင်းဖုန်း(က)ကျေးရွာအုပ်စုအုပ်ချုပ်ရေးမှူးရုံးမှ တာဝန်ရှိသူများ ပါဝင်သည့် ပူးပေါင်းအဖွဲ့က ကိုယ်အပူချိန်တိုင်းတာစစ်ဆေးမှုများ ပြုလုပ်ပြီး စာရင်းကောက်ယူခဲ့ကြသည်။
ဆက်လက်၍ ဖေဖော်ဝါရီလ(၁)ရက်နေ့တွင် အမျိုးသား(၆၅)ဦး နှင့် အမျိုးသမီး (၁၀၂)ဦး၊ ဖေဖော်ဝါရီလ(၂)ရက်နေ့တွင် အမျိုးသား(၅၅)ဦး နှင့် အမျိုးသမီး (၄၂)ဦး၊ ဖေဖော်ဝါရီလ(၃)ရက်နေ့တွင် (၄၂)ဦး နှင့် အမျိုးသမီး (၃၃)ဦး၊ ဖေဖော်ဝါရီလ(၄)ရက်နေ့တွင် အမျိုးသား (၇၈)ဦး နှင့် အမျိုးသမီး (၃၂)ဦး ဝင်ရောက်လာကြပြီး ဇန်နဝါရီလ(၂၈)ရက်နေ့မှ ဖေဖော်ဝါရီလ(၄)ရက်နေ့အထိ စုစုပေါင်း (၁,၆၂၆)ဦး ရှိပြီ ဖြစ်ကြောင်း သိရသည်။
