~~~~~~~~⊰❂ Unicode Version ❂⊱~~~~~~~~

“ကိုယ့်ကိုကိုယ် ခုခံကာကွယ်တဲ့ပုံစံနဲ့ ကျွန်တော်တို့ နေသွားမယ်။ ထိုးစစ်ရှိနေရင်တော့ ကိုယ့်ကိုကိုယ် ဆက်လက်ပြီး ခုခံကာကွယ်ဖို့တော့ ရှိပါတယ်။ ပြည်ထောင်စုလမ်းမကြီးမှာ အဲဒီလို တိုက်ပွဲဖြစ်နေတဲ့အချိန် သွားလာဖို့တော့ အဆင်မပြေသေးဘူးပေါ့နော်။ တိုက်ပွဲမရှိချိန်မှာတော့ ဘာမှပြဿနာမရှိဘူး။ တိုက်ပွဲဖြစ်နေချိန်မှာတော့ ကားသမားကို မသွားဖို့ ကျွန်တော်တို့က မေတ္တာရပ်ခံချင်ပါတယ်။ တိုက်ပွဲ ဆိုတာကတော့ ဘယ်နား ဘယ်ချိန်ဖြစ်မယ်ဆိုတာ ကျွန်တော်တို့လည်း မသိနိုင်ဘူး”ဟု မြောက်ပိုင်း မဟာမိတ် အဖွဲ့ဝင် TNLA၏ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က တာချီလိတ်သတင်းအေဂျင်စီသို့ ပြောသည်။

AA၊ TNLA နှင့် MNDAA ပူးပေါင်းအဖွဲ့က ၂၀၁၉ ခုနှစ်၊ သြဂုတ်လ (၁၅)ရက်နေ့မှစ၍ မန္တလေးတိုင်းဒေသကြီး၊ ပြင်ဦးလွင်မြို့ရှိ တပ်မတော်နည်းပညာတက္ကသိုလ်နှင့် ရှမ်းပြည်နယ်မြောက်ပိုင်း ပြည်ထောင်စုလမ်းမကြီး တလျှောက်တွင် ပစ်ခတ်တိုက်ခိုက်မှုများ စတင်ခဲ့ပြီးနောက် စက်တင်ဘာလ (၃)ရက်နေ့အထိ ပြည်ထောင်စု လမ်းမကြီးတလျှောက်တွင် တပ်မတော်နှင့် တိုက်ခိုက်မှုများရှိနခြေင်းဖြစ်သည်။

ပြည်ထောင်စုလမ်းမကြီးတလျှောက် တိုက်ပွဲများကြောင့် ကုလသမဂ္ဂပြန်ကြားရေးဌာန၏ စာရင်းအရ အရပ်သားပြည်သူ စုစုပေါင်း (၁၇) ဦး သေဆုံးခဲ့ရသည့်အပြင် (၂၇) ဦးထက်မနည်း ထိခိုက်ဒဏ်ရာရခဲ့သည်ဟု သိရသည်။

ယင်းအပြင် ကွတ်ခိုင်နှင့် မူဆယ်ကြားလမ်းပိုင်းတွင် မဟာမိတ်(၃)ဖွဲ့က မော်တော်ယာဉ်များအား တာယာများ ပစ်ဖောက်ခြင်း၊ မော်တော်ယာဉ်များ မီးရှို့ခံရမှုများရှိနေသည်ဟု သတင်းများ ထွက်နေသော်လည်း မဟာမိတ်အဖွဲ့များက မော်တော်ယာဉ်များအား မီးရှို့ခြင်းမဟုတ်ဘဲ တိုက်ပွဲအတွင်း လက်နက်ထိမှန် မီးလောင်ခြင်းဖြစ်သည်ဟု ငြင်းဆိုသည်။

“ဒါက ကားမီးရှို့တာမဟုတ်ပါဘူး။ တိုက်ပွဲဖြစ်လို့ လက်နက်ထိမှန်ပြီး လောင်တာဖြစ်တာပေါ့နော်။ တိုက်ပွဲဖြစ်နေတဲ့ အချိန်ကတော့ မသွားဖို့တော့ ကောင်းပါတယ်။ တိုက်ပွဲကြားမှာတော့ တစ်ဖက်နဲ့ တစ်ဖက်တိုက်နပြေီးတော့မှ သွားမှန်ပြီးတော့မှ မီးလောင်သွားလို့ရှိရင် အဲဒါကျတော့ ကျွန်တော်တို့လည်း ပြောလို့တော့ မရဘူးပေါ့”ဟု မြောက်ပိုင်း မဟာမိတ် အဖွဲ့ဝင် TNLA၏ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က ပြောသည်။

အစိုးရငြိမ်းချမ်းရေးကော်မရှင်နှင့် အပစ်ရပ်လက်မှတ်မထိုးရသေးသည့် မဟာမိတ် (၄)ဖွဲ့ဖြစ်သည့် TNLA၊ MNDAA၊ AA နှင့် KIO တို့သည် ၂၀၁၉ ခုနှစ်၊ သြဂုတ်လ (၃၁)ရက်နေ့က ရှမ်းပြည်နယ်အရှေ့ပိုင်း ကျိုင်းတုံမြို့တွင် တွေ့ဆုံဆွေးနွေးစဉ် အပစ်ရပ်စာချုပ်ညှိနှိုင်းခြင်းအပြင် လက်ရှိပစ်ခတ်တိုက်ခိုက်မှုများနှင့် ပတ်သက်၍လည်း ဆွေးနွေးခဲ့ကြပြီး စက်တင်ဘာလ (၁၅)ရက်နှင့် (၁၆)ရက်နေ့များတွင် ထပ်မံဆွေးနွေးရန် သဘောတူထားကြခြင်းဖြစ်သည်။

သတင်း #ချယ်ရီထိုက် (Tachileik News Agency)
ဓာတ်ပုံ - TNLA