~~~~~~~~⊰❂ Unicode Version ❂⊱~~~~~~~~

တာချီလိတ်တွင် မြို့သန့်ရှင်းရေး လူထုကိုယ်တိုင်ကျင့်သုံးနိုင်စေရန် ပြည်သူပါဝင်သော မြို့သန့်ရှင်းရေးလုပ်ငန်းများ ဆက်လက်ဆောင်ရွက်မည်
********
နယ်စပ်မြို့ဖြစ်သည့် ရှမ်းပြည်နယ် (အရှေ့ပိုင်း) တာချီလိတ်မြို့တွင် ပြည်သူပူးပေါင်းပါဝင်သော မြို့သန့်ရှင်းရေးလုပ်ငန်းများ တတိယသုံးလပတ်ဆက်လက်ဆောင်ရွက်ရန် ဌာနဆိုင်ရာများနှင့် ဒေသခံများ ၂၀၁၉ ခုနှစ်၊ စက်တင်ဘာလ (၆)ရက်နေ့တွင် အစီအစဉ်ရေးဆွဲနေပြီဖြစ်သည်။

ဌာနဆိုင်ရာများအနေဖြင့် အပတ်စဉ် စနေနေ့တိုင်း ပြည်သူနှင့်အတူ စုပေါင်းဆောင်ရွက်ခြင်းဖြင့် ပြည်သူနှင့် ဌာနဆိုင်ရာများအကြား ရင်းနှီးမှုရှိလာစေရေးနှင့် ရပ်ကွက်လိုအပ်ချက်ကိုလည်း ဌာနဆိုင်ရာများအနေဖြင့် သိရှိစေရန် ဆောင်ရွက်ခြင်းဖြစ်ကြောင်း တာချီလိတ်မြို့နယ်အုပ်ချုပ်ရေးမှူးက ဆိုသည်။

“ပြည်သူတွေနဲ့အတူ အမှိုက်ကောက်ရင်းနဲ့ ဌာနဆိုင်ရာတွေနဲ့ ရင်းနှီးပြီး သူတို့ရပ်ကွက်လိုအပ်ချက်တွေကို ချက်ချင်းဆောင်ရွက်ပေးလို့ရတယ်။ ချက်ချင်းကွင်းဆင်းကြည့်လို့ရတယ်”ဟု တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စောက ပြောကြားသည်။

တတိယသုံးလပတ် စုပေါင်းအမှိုက်ကောက်ခြင်းကို စက်တင်ဘာလ (၇)ရက်နေ့မှစ၍ အပတ်စဉ် စနေနေ့တိုင်း ဆန်ဆိုင်း(ခ)ရှိ အားကစားရုံ၊ အထက(ခွဲ)တာလော့၊ ဟောင်လိတ်ဈေး၊ တော်ကော့(တွင်း)ဘုန်းကြီးကျောင်း၊ မြို့နယ်ဓမ္မာရုံ၊ ဘုရင့်နောင်ဈေး၊ အာခါဗုဒ္ဓကျောင်း၊ ဆန်ဆိုင်း(က) မြို့ပတ်လမ်း၊ ဆန်ဆိုင်း(ခ) မြတ်လေးလမ်း၊ ပုံလို့ဘုန်းကြီးကျောင်း၊ ဝမ်ကောင်းရပ်ကွက် ဓမ္မာရုံ၊ မဟာမုနိဘုန်းကြီးကျောင်းနှင့် မယ်ခေါင်ရပ်ကွက်ရုံးများတွင် အစဉ်လိုက် အပတ်စဉ် ဆောင်ရွက်ကြမည်ဖြစ်သည်။

“အမှိုက်ရှိလို့ကောက်တာ မဟုတ်ပါဘူး။ ဘေးပတ်ဝန်းကျင်က ပြည်သူလူထုကို အသိပညာပေးချင်လို့် စုပေါင်းအမှိုက်ကောက်တာ ဖြစ်ပါတယ် “ ဟု တာချီလိတ်မြို့နယ် စည်ပင်သာယာရေးဌာန အမှုဆောင်အရာရှိ ဦးစိုင်းခွန်ဇော်ဦးက အစည်းအဝေးတွင် ပြောကြားသည်။

 တာချီလိတ်မြို့တွင် ပြည်သူပူးပေါင်းပါဝင်သော မြို့သန့်ရှင်းရေးလုပ်ငန်းများ ဆောင်ရွက်ခြင်း တတိယ (၃)လပတ် ဆောင်ရွက်ရန် ၂၀၁၉ ခုနှစ်၊ စက်တင်ဘာလ (၆)ရက်နေ့တွင် ဌာနဆိုင်ရာများ၊ နိုင်ငံရေးပါတီများနှင့် ဒေသခံလူထုတို့ အစည်းအဝေးကျင်းပပြီး  လုပ်ငန်းဆောင်ရွက်မည့်နေရာများ သတ်မှတ်ကြသည်။

တစ်ပြည်နယ် တစ်မြို့နယ် စီမံချက်ဖေါ်ဆောင်ရန် ရှမ်းပြည်နယ်တွင်း တာချီလိတ်၊ ကလောနှင့် လွိုင်လင် (၃) မြို့နယ်ကို ရွေးချယ်ခံခဲ့ရသည့်အတွက် တာချီလိတ်မြို့တွင်း အပတ်စဉ် စုပေါင်းသန့်ရှင်းရေးအဖြစ် ၂၀၁၉ ခုနှစ်၊ မတ်လ (၉) ရက်နေ့တွင် စတင် ဆောင်ရွက်ခဲ့ခြင်းဖြစ်ကာ ဒုတိယ (၃)လပတ် လုပ်ငန်းဆောင်ရွက်ပြီးချိန်တွင် စုပေါင်းအမှိုက်ကောက်ခြင်းအပြင် လူနေရပ်ကွက်များတွင် အမှိုက်ပုံးများ ထားပေးခြင်းနှင့် အခြေခံပညာကျောင်းများတွင် အမှိုက်ပုံးများ ထားပေးခြင်းတို့ပါ ဆောင်ရွက်ထားခြင်းဖြစ်သည်။

မိမိတို့မြို့ရွာသန့်ရှင်းရေးကို ဒေသခံများအနေဖြင့် ဆောင်ရွက်လာစေရေးအတွက် ဌာနဆိုင်ရာများ ဦးဆောင်ပြီး ပူးပေါင်းအကောင်အထည်ဖေါ်စေခြင်းဖြစ်သည်ဟု  ရှမ်းပြည်နယ်အစိုးရအဖွဲ့ အတွင်းရေးမှူး ဦးစိုးစိုးဇော်ထံမှ သိရသည်။

တာချီလိတ်မြို့တွင် လူနေရပ်ကွက်များနှင့် ချောင်း၊မြောင်းများတွင် စည်းကမ်းမဲ့စွန့်ပစ်အမှိုက်များအား အပတ်စဉ် စနေနေ့တိုင်း ဌာနဆိုင်ရာများနှင့် လူထုပူးပေါင်း ရှင်းလင်းနေကြခြင်းဖြစ်သည်။

သတင်း၊ဓါတ်ပုံ #ဟန်စိုးထိုက်