~~~~~~~~⊰❂ Unicode Version ❂⊱~~~~~~~~

“တရုတ်က ကူညီပံ့ပိုးပေးပါတယ်။ လောလောဆယ်ဆယ်မှာ မြောက်ပိုင်းဘက်မှာ တိုက်ပွဲက ပြင်းပြင်း ထန်ထန်ဖြစ်နေတော့ အစိုးရဘက်က တွေ့ဆုံဆွေးနွေးမယ့်နေရာကို ရွေးတဲ့အချိန်မှာ အခက်အခဲရှိတာပေါ့။ အစိုးရဖက်က ရွေးတဲ့နေရာမှာ မြောက်ပိုင်းအဖွဲ့က လာဖို့ဆိုရာမှာ တိုက်ပွဲတွေ ဖြစ်နေတဲ့အတွက် စိုးရိမ်မှုတွေ ရှိနေတယ်။ အဲဒီလိုဖြစ်နေတဲ့အချိန်မှာ တရုတ်အစိုးရကနေ ကြားဝင်ပြီးတော့မှ အခုကျိုင်းတုံဆွေးနွေးပွဲမှာ တရုတ်ဘက်ကနေ လက်နက်နဲ့ ဘာနဲ့လုံခြုံရေးယူပေးတဲ့ သဘောမဟုတ်ဘဲ တရုတ်ရဲတွေက အရပ်ဝတ်နဲ့ လိုက်ပါပေးတာမျိုးလုပ်ပေးတယ်။ အဟန့်သဘောပေါ့ဗျာ”ဟု မဟာမိတ် (၄)ဖွဲ့နှင့် အစိုးရ ငြိမ်းချမ်းရေးကော်မရှင်ကြား ဆွေးနွေးပွဲများဖြစ်မြောက်ရေး လိုက်ပါဆောင်ရွက်ပေးနေသည့် ကချင်ငြိမ်းချမ်းရေးအကျိုးဆောင်တစ်ဦးဖြစ်သူ ဦးလမိုင်ဂွမ်ဂျာက တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ်မြောက်ပိုင်း ပြည်ထောင်စုလမ်းမကြီးတလျှောက်တွင် မြောက်ပိုင်းမဟာမိတ်(၃)ဖွဲ့ဖြစ်သည့် AA၊ TNLA နှင့် MNDAA တို့က ၂၀၁၉ ခုနှစ်၊ သြဂုတ်လ (၁၅)ရက်နေ့မှစပြီး ပစ်ခတ်တိုက်ခိုက်မှုများကြောင့် မြန်မာ - တရုတ်နယ်စပ်ကုန်သွယ်ရေးလမ်းကြောင်းမှာ ပြတ်တောက်သွားခဲ့ရပြီးနောက် မဟာမိတ်အဖွဲ့များ တိုက်ခိုက်မှုကို တရုတ်နိုင်ငံအနဖြေင့် ပြင်းပြင်းထန်ထန်ကန့်ကွက်ကြောင်းနှင့် တရုတ်နိုင်ငံသည် မြန်မာနိုင်ငံမြောက်ပိုင်းဒေသ၏ အပစ်အခတ်ရပ်စဲရေးအခြေအနေကို ဆက်လက်ထိန်းသိမ်းရန် အပြုသဘောဆောင်သော အခန်းကဏ္ဍမှ ဆက်လက်ပါဝင်မည်ဖြစ်ကြောင်း မြန်မာနိုင်ငံရှိ တရုတ်သံရုံးက ၂၀၁၉ ခုနှစ်၊ သြဂုတ်လ (၁၉)ရက်နေ့က သတင်းထုတ်ပြန်ထားခဲ့ခြင်းဖြစ်သည်။

ယင်းနောက် သြဂုတ်လ (၃၁)ရက်နေ့နှင့် စက်တင်ဘာလ (၁၇)ရက်နေ့များက ရှမ်းပြည်နယ်(အရှေ့ပိုင်း) ကျိုင်းတုံမြို့၌ NRPC ဖြင့်ဆွေးနွေးရန် လာရောက်သည့် မြောက်ပိုင်းမဟာမိတ် (၄)ဖွဲ့နှင့်အတူ တရုတ်နိုင်ငံ၊ ယူနန်ရဲတပ်ဖွဲ့ဝင်များက အရပ်ဝတ်ဖြင့်လိုက်ပါလာကြခြင်းဖြစ်သည်။

အဆိုပါ ယူနန်ရဲတပ်ဖွဲ့ဝင်များမှာ ဆွေးနွေးပွဲတက်ရောက်မည့် မဟာမိတ်(၄)ဖွဲ့၏ လုံခြုံရေးအတွက်သာဖြစ်ပြီး ဆွေးနွေးပွဲနှင့် သက်ဆိုင်ခြင်းမရှိကြောင်း နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေးက စက်တင်ဘာလ (၁၇)ရက်နေ့ သတင်းစာရှင်းလင်းပွဲတွင် မေးမြန်းမှုအား ပြန်လည်ဖြကြေားထားသည်။

“ကျွန်တော်တို့ ဆွေးနွေးနေတဲ့အချိန်မှာတော့ တရုတ်အနေနဲ့ ဝင်ရောက်ညှိနှိုင်းဆွေးနွေးတာမျိုးတော့ မရှိပါဘူး။ ဒါပေမဲ့ ဆွေးနွေးပြီးတဲ့အခါ တီးဘရိတ်တို့ ဘာတို့ယူတဲ့အချိန်မှာ ဘာတွေဆွေးနွေးကြသလဲ၊ ဘာတွေ ဘယ်လိုအခက်အခဲဖြစ်နေသလဲဆိုတာတွေကိုတော့ သီးသန့်အခန်းထဲမှာ တွေ့တာမျိုးတော့ ရှိပါတယ်”ဟု ကချင်ငြိမ်းချမ်းရေးအကျိုးဆောင်တစ်ဦးဖြစ်သူ ဦးလမိုင်ဂွမ်ဂျာက တာချီလိတ်သတင်းအေဂျင်စီသို့ ပြောသည်။

မြန်မာ - တရုတ်နယ်စပ်ကုန်သွယ်ရေးလမ်းဖြစ်သည့် ပြည်ထောင်စုလမ်းမကြီးတလျှောက် တိုက်ခိုက်မှုများကြောင့် မူဆယ်နယ်စပ်ကုန် သွယ်ရေးစခန်း၏ ကုန်သွယ်မှု ပမာဏ ယခင်နှစ်က ကာလတူနှိုင်းယှဉ်ပါက ကုန်သွယ်မှုပမာဏမှာ အမေရိကန် ဒေါ်လာ ၁ ဒသမ ၂ ဘီလီယံလျော့ကျခဲ့ရသည်ဟု ဆင်ဟွာသတင်းဌာနက ဖော်ပြထားသည်။

Tachileik News Agency