~~~~~~~~⊰❂ Unicode Version ❂⊱~~~~~~~~

တာချီလိတ်မြို့တွင် စက်တင်ဘာလဆန်းထိ သွေးလွန်တုပ်ကွေးဖြစ်ပွားမှုရှိနေဆဲဖြစ်ပြီး အသက် ၁၅ နှစ်အောက်များ အဖြစ်များ
********
၂၀၁၈ ခုနှစ်က သွေးလွန်တုပ်ကွေးလူနာ (၄၅၄)ဦး တက်ရောက်ကုသမှုခံယူခဲ့သည့် ရှမ်းပြည်နယ် (အရှေ့ပိုင်း) တာချီလိတ်မြို့ရှိ ခရိုင်ပြည်သူ့ဆေးရုံတွင် ၂၀၁၉ ခုနှစ်၊ စက်တင်ဘာလ (၃)ရက်နေ့အထိ တက်ရောက် ဆေးကုသမှုခံယူသည့် သွေးလွန်တုပ်ကွေးလူနာ (၃၅၀)ဦးရှိနေပြီး ဖြစ်ပွားမှုလျော့ကျခြင်းမရှိသေးကြောင်း သိရသည်။

“အခုလည်း ဖြစ်ပွားမှုကတော့ လျော့သွားပြီ ပြောလို့မရသေးဘူး။ နေ့စဉ် လူနာတော့ ရှိနေသေးတယ်။ အများစုက အသက် (၁၅)နှစ်အောက် ကလေးတွေ အဖြစ်များတယ်။ ကျွန်တော်တို့လည်း ရောဂါကာကွယ်ရေး ဖုံးသွန်လဲစစ်ကို တောက်လျှောက်လုပ်နေပါတယ်”ဟု တာချီလိတ်ခရိုင်ပြည်သူ့ဆေးရုံအုပ်ကြီး ဒေါက်တာရွှေဝင်းက တာချီလိတ်သတင်းအေဂျင်စီသို့ ပြောသည်။

တာချီလိတ်တွင် သွေးလွန်တုပ်ကွေးရောဂါနှင့် ခြင်ကြောင့်ဖြစ်ပွားသည့် ဆက်စပ်ရောဂါများ ကာကွယ်နိုင်ရေးအတွက် ကျန်းမာရေးဝန်ထမ်းများက ရပ်ကွက်များအတွင်း ဖုံးသွန်လဲစစ်လုပ်ငန်းများကို အများပြည်သူအား အသိပညာပေးခြင်းနှင့် ကွင်းဆင်းဆောင်ရွက်ပေးခြင်းများကိုလည်း လုပ်ဆောင်ပေးနေခြင်းဖြစ်သည်။

" သွေးလွန်တုပ်ကွေးအနေနဲ့ ကျွန်တော်တို့ အပတ်စဉ်တိုင်း ဖုံး၊ သွန်၊ လဲ၊ စစ်လုပ်တာတို့၊ အဘိတ်ဆေးခပ် တာတို့၊ ရောဂါဖြစ်ပွားတဲ့အိမ်နဲ့ ဘေးပတ်လည်ကိုက် (၁၀၀) ကို ခြင်ဆေးဖြန်းတာတို့ကို အပတ်စဉ်တိုင်း လုပ်ပါတယ်"ဟု တာချီလိတ်ခရိုင်ဆေးရုံအုပ်ကြီး ဒေါက်တာရွှေဝင်းက တာချီလိတ် သတင်းအေဂျင်စီသို့ ပြောသည်။

တာချီလိတ်မြို့နှင့် နယ်နမိတ်ထိစပ်နေသည့် ထိုင်းနိုင်ငံတွင်လည်း ၂၀၁၉ ခုနှစ်အတွင်း သွေးလွန်တုပ်ကွေးရောဂါ ဖြစ်ပွားမှု မြင့်တက်နေခြင်းဖြစ်သည်။

တာချီလိတ်ခရိုင်ပြည်သူ့ဆေးရုံကြီးတွင် သွေးလွန်တုပ်ကွေးရောဂါလူနာ ကုသပေးခဲ့သည့်အရေအတွက်မှာ ၂၀၁၄ ခုနှစ်တွင် (၄) ဦး၊ ၂၀၁၅ ခုနှစ်တွင် (၁၈) ဦး၊ ၂၀၁၆ ခုနှစ်တွင် (၅၇) ဦး၊ ၂၀၁၇ ခုနှစ်တွင် (၁၅၈) ဦးနှင့် ၂၀၁၈ ခုနှစ်တွင် (၄၅၄) ဦး ဖြစ်ပွားခဲ့ခြင်းဖြစ်သည်။

သတင်း #ဟန်စိုးထိုက်
ဓါတ်ပုံ - khin hnin kyu