~~~~~~~~⊰❂ Unicode Version ❂⊱~~~~~~~~

ရန်ကုန်အပြည်ပြည်ဆိုင်ရာလေဆိပ်တွင် ပြေးလမ်းချော်သွားသည့် တပ်မတော်လေယာဉ်ကို ဖယ်ရှားပြင်ဆင်နေဆဲ
***********
ရန်ကုန်အပြည်ပြည်ဆိုင်ရာလေဆိပ်တွင် ၂၀၁၉ ခုနှစ်၊ စက်တင်ဘာလ (၅)ရက်နေ့ နံနက် (၁၁)နာရီ မိနစ်(၂၀)ခန့်က တပ်မတော်လေယာဉ်တစ်စီး ပြေးလမ်းချော်၍ ညနေ (၄)နာရီအထိ ပြေးလမ်း ယာယီပိတ်၍ ရှင်းလင်းထားပြီး ပြေးလမ်းချော်သွားသည့်လေယာဉ်ကို ပြင်ဆင်ဆဲဖြစ်ကြောင်း လကြောင်းပို့ဆောင်ရေး ညွှန်ကြားမှုဦးစီးဌာနက သတင်းထုတ်ပြန်သည်။

ရန်ကုန်လေဆိပ်၏ လေယာဉ်ပြေးလမ်းယာယီပိတ်ထားရ၍ လေကြောင်းခရီးစဉ်အချို့လည်း  အချိန်ရွှေ့ဆိုင်းခဲ့ရခြင်းဖြစ်သည်။

တပ်မတော်(လေ)မှ သယ်ယူပို့ဆောင်ရေးလေယာဉ်ဖြစ်သည့် Y – 8 လေယာဉ်သည် နံနက် (၁၀)နာရီ (၃၆)မိနစ်က ရန်ကုန်အပြည်ပြည်ဆိုင်ရာလေဆိပ်မှ အတက်တွင် အင်ဂျင်တစ်လုံးချို့ယွင်းသွားသဖြင့် ပြေးလမ်းအမှတ် (၂၁)တွင် လမ်းချော်သွားခဲ့ခြင်းဖြစ်ကြောင်း သိရသည်။

ပြေးလမ်းရှင်းလင်းခြင်းအတွက် လေကြောင်းပို့ဆောင်ရေးညွှန်ကြားမှုဦးစီးဌာနက တပ်မတော် (လေ)၊ လေဆိပ်တာဝန်ရှိသူများနှင့် ပူးပေါင်းဆောင်ရွက်ပေးနေပြီး Y – 8 လေယာဉ်မှာ ရှင်းလင်းဆဲဖြစ်ကြောင်း သိရသည်။

တပ်မတော် (လေ)တွင် အသုံးပြုနေသည့်  Shaanxi Y – 8 လေယာဉ်များမှာ တရုတ်နိုင်ငံမှ ဝယ်ယူထားခြင်းဖြစ်ပြီး  ၂၀၁၇ ခုနှစ်၊ ဇွန်လ (၇)ရက်နေ့က အဆိုပါလေယာဉ်အမျိုးအစားတစ်စီးမှာ မြိတ်မှ ရန်ကုန်သို့ ပျံသန်းလာစဉ် ပင်လယ်ပြင်တွင် ပျက်ကျခဲ့၍ လေယာဉ်ပေါ်လိုက်ပါလာသည့် လူပေါင်း (၁၂၂) ဦး သေဆုံးခဲ့ရခြင်းဖြစ်သည်။

Tachileik News Agency
ဓါတ်ပုံ - လေကြောင်းပို့ဆောင်ရေးညွှန်ကြားမှုဦးစီးဌာန