~~~~~~~~⊰❂ Unicode Version ❂⊱~~~~~~~~

"လက်နက်ကြီးကျည်ဆံကျပြီးပေါက်ကွဲတာလို့သိရတယ်၊ သေဆုံးသူက ရင်ခွင်ပိုက်အရွယ် ကလေး တစ်ဦး အပါအဝင်(၅) ဦး သေဆုံးတယ်၊ ဒဏ်ရာရသူ (၃)ဦးရှိတယ်၊ နှစ်ဦးက စိုးရိမ်ရတဲ့အတွက် လားရှိုးကို ပို့ဆောင် နေပါတယ်၊ လောလောဆယ်တော့ မြို့အနီးစပ်ရောမြို့ထဲရော အသံတွေ ငြိမ်နေပါတယ်" ဟု ဖြစ်ပွားရာသို့ သွားရောက် ကူညီ သယ်ဆောင်ပေးခဲ့သည့် ဗြဟ္မစိုရ်နှလုံးသားလူမှုကူညီရေးအသင်း(ကွတ်ခိုင်)မှ ဦးတင်ဝင်းက တာချီလိတ်သတင်းအေဂျင်စီသို့ ပြောသည်။

ကွတ်ခိုင်တိုးဂိတ်အနီးမှ မော်ဟစ်ကျေးရွာအစပ်သို့ လက်နက်ကြီးကျည်ဆံများ ကျရောက်ခဲ့သည့် အတွက် မော်ဟစ်ကျေးရွာဒေသခံများထဲမှ အသက် (၅၀)ဝန်းကျင်ရှိ အမျိုးသမီးတစ်ဦး၊ အသက် ၂၅ / ၃၀ ခန့် (၂)ဦး နှင့် ရင်ခွင်ပိုက် အရွယ် ကလေးတစ်ဦး၊ အသက်(၁၃)နှစ်ခန့် ကလေးတစ်ဦး သေဆုံးခဲ့ရခြင်းဖြစ်ကာ ဒဏ်ရာ ရရှိခဲ့သူ (၃)ဦးထဲမှ (၂)ဦးအား လားရှိုးပြည်သူ့ဆေးရုံသို့ ဆက်လက်ပို့ဆောင်ပေးနေလျက်ရှိသည်။

၂၀၁၉ခုနှစ် သြဂုတ်လ (၃၁)ရက် နံနက် (၈)နာရီခွဲဝန်းကျင်ကစတင်၍ ကွတ်ခိုင်မြို့မှ မူဆယ်မြို့ဘက်သို့အထွက် ပြည်ထောင်စု လမ်းမကြီးပေါ်ရှိ တိုးဂိတ်အနီးမှ မော်ဟစ်ကျေးရွာအနီးတွင် မြောက်ပိုင်းမဟာမိတ်တပ်ဖွဲ့များက ဝင်ရောက် နေရာယူကာ လက်နက်ကြီး လက်နက်ငယ်များဖြင့် စတင်ပစ်ခတ်ခဲ့ခြင်းဖြစ်သည်ဟု ကွတ်ခိုင်ဒေသခံတို့ ထံက သိရသည်။

"စစချင်း သိန်းနီဘက်ကအဝင် နတ်စင်ကွေ့နားမှာ သူတို့က နေရာယူတယ် ကားတွေကိုဖြတ်မသွား ခိုင်းဘူး၊ မြို့ထဲ လမ်းတစ်လျှောက်ကနပြေီးတော့ မြို့အထွက်တိုးဂိတ်နားအထိ ဆက်တိုက်ဆိုသလို ပစ်ခတ်သံတွေ ကြားရတယ်၊ လက်နက်ကြီးသံတွေလဲ ဆူညံနေတာပဲ မနက် ၁၁ နာရီလောက်အထိ ပစ်ကြတယ်" ဟု ကွတ်ခိုင်မြို့ ရပ်ကွက် (၆)တွင် နေထိုင်သူတစ်ဦးက ပြောသည်။

ရှမ်းပြည်နယ်(အရှေ့ပိုင်း)ကျိုင်းတုံမြို့တွင် ပြည်ထောင်စုငြိမ်းချမ်းရေးကော်မရှင်နှင့် တိုင်းရင်းသားလက်နက်ကိုင် မဟာမိတ် (၄)ဖွဲ့တို့မှ ၂၀၁၉ ခုနှစ်၊ သြဂုတ်လ (၃၁)ရက်နေ့ နံနက်(၁၀)နာရီကစ၍ တံခါးပိတ် ဆွေးနွေးပွဲ ပြုလုပ်နေချိန်တွင် ရှမ်းပြည်နယ်(မြောက်ပိုင်း)တွင် တိုက်ပွဲများ ဖြစ်ပွားနခြေင်း ဖြစ်သည်။

ကျိုင်းတုံတွင် ပြုလုပ်နေသည့် ဆွးနွေးပွဲသို့ အစိုးရဘက်မှ နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေး၊ငြိမ်းချမ်းရေးကော်မရှင်အဖွဲ့မှ ဒုဥက္ကဌ ဦးသိန်းဇော်၊ ငြိမ်းချမ်းရေးကော်မရှင်အတွင်းရေးမှူး ဒုတိယဗိုလ်ချုပ်ကြီး(ငြိမ်း) ခင်ဇော်ဦး၊ ရှမ်းပြည်နယ် လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးလှဦး၊ ငြိမ်းချမ်းရေးကော်မရှင် အဖွဲ့ဝင် ဦးမိုးဇော်ဦး၊ ရှမ်းပြည်နယ်အစိုးရအဖွဲ့ အတွင်းရေးမှူး ဦးစိုးစိုးဇော်တို့ဦးဆောင်သည့်အဖွဲ့တို့ တက်ရောက်ကြသည်။

တိုင်းရင်းသားလက်နက်ကိုင်အဖွဲ့များဘက်မှ MNTJP/ MNDAA ဒု စစ်ဦးစီးချုပ် ဦးရန်ဝင်ကျုံး၊ ဆက်ဆံရေးဌာန ဌာနမှူး ကိုဖုန့်ဝင့်နိုင်၊ ဆက်ဆံရေးဌာနရုံးတာဝန်ခံ ကိုလီကြားခွမ်း၊ ဘာသာပြန် ကိုရန်နိုင်၊ ပြန်ကြားရေးဌာန ကိုကျူးကြားလဲ့၊ လေ့လာသူများအဖြစ် ကိုလီကြားဖေး၊ ကိုရန်ကျင့်ဟုန်၊ ကိုကျော်မြနှင့် ကိုအားမင်း၊ PSLF/TNLA အဖွဲ့မှ ဒုတိယဥက္ကဌ တာခလန်း၊ မဟာမိတ်ဌာနအဖွဲ့ဝင် တာအိုက်ထွန်းနှင့် ရုံးဝန်ထမ်း Mai Sol Myiam၊ ULA/AA အဖွဲ့မှ ဒုစစ်ဦးစီးချုပ် ညိုထွန်းအောင်၊ အတွင်းရေးမှူး(ပ) ဦးကျော်ဟန်၊ ဗဟိုအလုပ်အမှုဆောင်ကော်မတီ ထုန်ဆိုင်း၊ အလုပ်ဝန်ထမ်း ခင်လင်းရွှေနှင့် ဦးဝင်းလိုင်၊ KIO/KIA မှ ဗဟိုအတွင်းရေးမှူး ထင်နန်၊ KIC အတွင်းရေးမှူး ဇော်ဇော့၊ KIA ဒုညှိနှိုင်းကွပ်ကဲရေးမှူးချုပ် ခွမ်လွန်နှင့် ညှိနှိုင်းကွပ်ကဲရေးမှူး ဗိုလ်မှူးချုပ် ဇော်တွန်း တို့ တက်ရောက်ကြသည်။

Tachileik News Agency
သတင်း - နဖြေိုးမြင့်
ဓာတ်ပုံ - ဗြဟ္မစိုရ်နှလုံးသားလူမှုကူညီရေးအသင်း(ကွတ်ခိုင်)