~~~~~~~~⊰❂ Unicode Version ❂⊱~~~~~~~~

တာချီလိတ်မြို့တွင် တတိယအကြိမ် OSS လုပ်ငန်းများ နောက်ဆုံးကွင်းဆင်း ဆောင်ရွက်ခြင်းကို ရန်အောင်မြေရပ်ကွက်၌ ဆောင်ရွက်ပေးမည်
*************
ရှမ်းပြည်နယ် (အရှေ့ပိုင်း)၊ တာချီလိတ်မြို့တွင် ပြည်သူ့ဝန်ဆောင်မှုလုပ်ငန်းများ တတိယအကြိမ် ကွင်းဆင်း ဆောင်ရွက်ပေးခြင်းကို သြဂုတ်လ (၂၇)ရက်နေ့တွင် ရန်အောင်မြေရပ်ကွက်ရုံး၌ နံနက် (၁၀) နာရီမှစ၍ လုပ်ငန်းဆောင်ရွက်ပေးမည် ဖြစ်သည်။

တတိယအကြိမ်အဖြစ် ရပ်ကွက်၊ ကျေးရွာများသို့ ကွင်းဆင်းဆောင်ရွက်ပေးခြင်းကို ၂၀၁၉ ခုနှစ်၊ သြဂုတ်လ (၁)ရက်နေ့မှ စတင်ဆောင်ရွက်ပေးနေရာတွင် သြဂုတ်လ (၂၆)ရက်နေ့ မိုင်းကိုး(ခ)ကျေးရွာတွင် ဆောင်ရွက်ပေးချိန်အထိ ကုန်းလမ်းပို့ဆောင်ရေးညွှန်ကြားမှုဦးစီးဌာနတွင် ဆိုင်ကယ်ယာဉ်မောင်းလိုင်စင် ပြုလုပ်သူအများဆုံးဖြစ်နေပြီး လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနတွင် ဝန်ဆောင်မှုရယူသူ ဒုတိယအများဆုံးဖြစ်နေကြောင်း သိရသည်။

“အခုချိန်ထိဆိုရင် ကညနမှာ ဆိုင်ကယ်မောင်းလိုင်စင် လုပ်တဲ့သူက အများဆုံးပဲ။ ဒုတိယအများဆုံးက လဝကမှာပါ။ မွေးတိုး၊ ဖွားသေစာရင်း လုပ်တဲ့သူတွေ များတယ်။ မနက်ဖြန် ရန်အောင်မြေရပ်ကွက်မှာ ပြီးသွားရင်တော့ အခု တတိယအကြိမ် OSS ကပြီးမယ်။ ဒါပြီးရင် ပြည်သူတွေအနေနဲ့ ဘာတွေ လိုအပ်မလဲ။ သူတို့လိုအပ်တာနဲ့ ကိုက်ညီတာ ထပ်တိုးလုပ်ပေးဖို့ ဌာနတွေအကုန်ပြန်ထိုင်ပြီး အစည်းအဝေးလုပ် ဆုံးဖြတ်မှာပါ”ဟု တာချီလိတ်မြို့နယ် ဒုတိယအုပ်ချုပ်ရေးမှူး ဦးမင်းအောင်က တာချီလိတ်သတင်းအေဂျင်စီသို့ ပြောသည်။

တတိယအကြိမ် ပြည်သူ့ဝန်ဆောင်မှုလုပ်ငန်းများ ကွင်းဆင်းဆောင်ရွက်ရာတွင် ယခင်နှစ်ကြိမ်က ဆောင်ရွက်ခဲ့သည်များကို ပြန်လည်သုံးသပ်ပြီး မော်တော်ဆိုင်ကယ်မောင်းလိုင်စင်ထုတ်ပေးခြင်းအား ထပ်တိုးထည့်သွင်းလာခဲ့ခြင်းဖြစ်သည်။

ဆိုင်ကယ်ယာဉ်မောင်းလိုင်စင်အသစ် ပြုလုပ်လိုသူများအနေဖြင့် မှတ်ပုံတင်မိတ္တူ၊ ဓါတ်ပုံ (၃)ပုံနှင့်အတူ OSS ဝန်ဆောင်မှုပေးရာသို့ လာရောက်လျှောက်ထားနိုင်ပြီး အသက် (၁၈)နှစ်အောက် လျှောက်ထားသူများအနေဖြင့် ကျပ်တစ်သောင်းခွဲ၊ အသက် (၁၈)နှစ်အထက် လျှောက်ထားသူအနေဖြင့် ကျပ်နှစ်သောင်းခွဲ ပေးသွင်းရမည်ဖြစ်သည်။

ပြည်သူ့ဝန်ဆောင်မှုလုပ်ငန်းများကို ရပ်ကွက်၊ကျေးရွာများသို့ နေ့စဉ်ကွင်းဆင်းဆောင်ရွက်ပေးနေရာတွင် ပထမအကြိမ်နှင့် ဒုတိယအကြိမ်များ၌ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၏ လုပ်ငန်းဆောင်ရွက်ရမှု အများဆုံးဖြစ်သော်လည်း တတိယအကြိမ်တွင် ကုန်းလမ်းပို့ဆောင်ရေး ညွှန်ကြားမှုဦးစီးဌာနနှင့် မြန်မာ့အာမခံလုပ်ငန်းတို့ကပါ ကွင်းဆင်းအဖွဲ့တွင် ပါဝင်လာရာ မော်တော်ဆိုင်ကယ်မောင်းလိုင်စင် ပြုလုပ်သူ အများဆုံးဖြစ်လာကြောင်း သိရသည်။

ကုန်းလမ်းပို့ဆောင်ရေးညွှန်ကြားမှုဦးစီးဌာန (ကညန)အနေဖြင့် ယခင်က ရှမ်းရိုးမကွင်းတွင် တစ်လလျှင် တစ်ကြိမ် မော်တော်ဆိုင်ကယ်မောင်းလိုင်စင်များကို စီမံချက်ဖြင့် ထုတ်ပေးနေရာမှ ၂ဝ၁၉ ခုနှစ်၊ သြဂုတ် (၁)ရက်နေ့မှစ၍ OSS နှင့်အတူ ကွင်းဆင်းဆောင်ရွက်ပေးနေခြင်းဖြစ်သည်။

ပြည်သူ့ဝန်ဆောင်မှုရုံး(One Stop Shop - OSS)တွင် ပါဝင်သည့် အထွေထွေအုပ်ချုပ်ရေးဦးစီးဌာန၊ ရဲတပ်ဖွဲ့၊ မီးသတ်တပ်ဖွဲ့၊ ပြည်တွင်းအခွန်များဦးစီးဌာန၊ ကြေးတိုင်နှင့်မြေစာရင်းဦးစီးဌာန၊ မြို့နယ်စည်ပင် သာယာရေးဌာန၊ ပြန်လည်ထူထောင်ရေးဦးစီးဌာန၊ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၊ လျှပ်စစ်ဌာနနှင့် ကျန်းမာရေးဦးစီးဌာနတို့အပြင် တတိယအကြိမ်မြောက်ကွင်းဆင်းဆောင်ရွက်မှု၌ ကုန်းလမ်းပို့ဆောင်ရေးညွှန်ကြားမှုဦးစီးဌာနနှင့် မြန်မာ့အာမခံလုပ်ငန်းတို့ကလည်း ပူးပေါင်းပါဝင်လာကြခြင်း ဖြစ်သည်။

Tachileik News Agency
ဓါတ်ပုံ - ကျော်ဇင်ဟိန်း