~~~~~~~~⊰❂ Unicode Version ❂⊱~~~~~~~~

ပေါင်မြို့နယ် သံဖြူရပ်ကွက်တွင် တောင်ပြိုသည့်နေရာအား ဒုတိယမြောက်နေ့ ရှာဖွေမှုတွင် သေဆုံးသူ (၄၁)ဦးအထိ တိုးလာ
*************
မွန်ပြည်နယ်၊ ပေါင်မြို့နယ်၊ သဲဖြူကုန်းကျေးရွာ၊ သံဖြူရပ်ကွက်တွင် မိုးသည်းထန်၍ တောင်ပြိုကျသည့် နေရာတွင် ဒုတိယမြောက်နေ့အဖြစ် သြဂုတ်လ (၁၀)ရက်နေ့က ရှာဖွေနေရာ ည(၈)နာရီခွဲအချိန်ထိ သေဆုံးသူ (၄၁)ဦးအထိတိုးလာပြီး နွားတစ်ကောင်နှင့် လူ (၂၉)ယောက်ကို အသက်ရှင်လျက် ကယ်တင်ထားနိုင်ကြောင်း သိရသည်။

မြေပြိုကျမူဖြစ်ပွားသည့် ၂၀၁၉ ခုနှစ်၊ သြဂုတ်လ (၉)ရက်နေ့ နံနက် (၇)နာရီဝန်းကျင်မှစ၍ မွန်ပြည်နယ်မီးသတ်ဦးစီးဌာနမှ သန္ဓေမီးသတ်တပ်ဖွဲ့ဝင်(၇၀)ဦး၊ အရန်မီးသတ်တပ်ဖွဲ့ဝင်(၄၀)ဦးနှင့် ကရင်ပြည်နယ်မီးသတ်ဦးစီးဌာနမှ ရှာဖွေကယ်ဆယ်ရေးတပ်ဖွဲ့ဝင် (၃၅)ဦးစုစုပေါင်း(၁၄၅)ဦးတို့က ဌာနဆိုင်ရာအဖွဲ့အစည်းများနှင့်ပူးပေါင်း၍ ရှာဖွေကယ်ဆယ်ရေးလုပ်ငန်းများကို ဆောင်ရွက်နေကြခြင်းဖြစ်သည်။

မွန်ပြည်နယ်အတွင်း ပေါင်မြို့နယ်၊ မော်လမြိုင်မြို့နယ် ၊ မုဒုံမြို့နယ် ၊ ကျိုက်မရောမြို့နယ် ၊ သံဖြူဇရပ်မြို့နယ်နှင့် ရေးမြို့နယ်တို့တွင် မိုးရေချိန်များပြားပြီး ရေကြီးနစ်မြုပ်မှုများကြောင့် ရေဘေးကယ်ဆယ်ရေးစခန်းများ ဖွင့်လှစ်ထားရသည့်အပြင် ရေကြီး၍လမ်းများပြိုကျပျက်စီးကာ လမ်းပန်းဆက်သွယ်ရေးပြတ်တောက်ခြင်း၊ ပေါင်မြို့နယ်အတွင်း အဝေးပြေးလမ်းမကြီးတလျှောက် (၂)နေရာတွင် တောင်ပြိုခြင်းကြောင့် တောင်ခြေရှိကျေးရွာများမှ လူနေအိမ်များနှင့် လမ်းမပေါ်ရှိ မော်တော်ယာဉ်များ နစ်မြုပ်သွားခဲ့သဖြင့် ကယ်ဆယ်ရေးလုပ်ငန်းများ ဆောင်ရွက်နေရခြင်းဖြစ်သည်။

Tachileik News Agency
Photo: မြန်မာနိုင်ငံမီးသတ်တပ်ဖွဲ့