~~~~~~~~⊰❂ Unicode Version ❂⊱~~~~~~~~

ကျိုင်းတုံမြို့တွင် ဝက်သေဆုံးမှုများဖြစ်နေသည့်အတွက် ဘေးကင်းသည့်အသားထုတ်လုပ်နိုင်ရေး ယခင်ကထက် ပို၍စိစစ်မည်
********
ရှမ်းပြည်နယ်(အရှေ့ပိုင်း) ကျိုင်းတုံမြို့တွင် seasonal flue ကြောင့် ဝက်သေဆုံးမှုဖြစ်ပွားနေသဖြင့် ဘေးကင်းသည့်ဝက်သားထုတ်လုပ်ရေးအတွက် ဝက်သားထုတ်လုပ်ငန်းနှင့်ဆက်စပ်သူများနှင့် သက်ဆိုင်ရာဌာနများ ၂၀၁၉ ခုနှစ်၊ သြဂုတ်လ (၆)ရက်နေ့တွင် တွေ့ဆုံဆွေးနွေးကြမည်ဖြစ်သည်။

ဝက်များရောဂါကြောင့် သေဆုံးမှုဖြစ်ပွားနေရာ ဒေသတွင်း ဝက်သားစားသုံးမှုမှာ လျော့ကျသွားခဲ့သဖြင့် ဘေးကင်းသည့်ဝက်သားထုတ်လုပ်ရေးအတွက် စိစစ်မှုများကို ပိုမိုတင်းကြပ်စွာဆောင်ရွက်ရန် စီစဉ်လာခြင်းဖြစ်သည်။

 “စည်ပင်သာယာစျေးမှာရောင်းတဲ့ဝက်သားကို မွေးကုရော၊ စည်ပင်ရော၊ သားသတ်ရုံမှူးတွေကရော စနစ်တကျစိစစ်ပြီးတော့မှ ထုတ်လုပ်ဖို့။ အရင်ကလည်း စစ်တော့စစ်တယ် ဒါပေမဲ့ အခုက ဒီကိစ္စတွေဖြစ်နေတော့ ပိုပြီးစစ်ဆေးမယ်ပေါ့နော်။ ပိုပြီးစနစ်တကျစိစစ်မှုတွေလုပ်ပြီး လိုင်စင်စီတွေကိုလည်း ကြပ်မတ်မယ်။ ပြီးတော့လည်း ဝက်ရောင်းတဲ့သူတွေကလည်း ရောင်းအားတွေကျတယ်ဆိုတော့ သူတို့အနေနဲ့လည်း ကျန်းမာသန့်ရှင်းတဲ့ ပြည်သူစားသုံးလို့ရတဲ့ဝက်တွေကိုပဲ ရောင်းဖို့အတွက်ကို ပညာပေးစည်းရုံးတာလေးတွေ ဆောင်ရွက်မယ့်သဘောပါ” ကျိုင်းတုံစည်ပင်သာယာရေးကော်မတီ အမှုဆောင်အရာရှိ ဦးကျော်မင်းထိုက်က တာချီလိတ်သတင်းအေဂျင်စီသို့ ပြောသည်။

အဆိုပါ အစည်းအဝေးတွင် ဝက်သားထုတ်လုပ်ငန်းနှင့် ဆက်စပ်သူများ၊ ကျန်းမာရေးဦးစီးဌာန၊ စည်ပင်သာယာရေးဌာန၊ တိရိစ္ဆာန်မွေးမြူရေးနှင့် ကုသရေးဦးစီးဌာနတို့ ဆွေးနွေးကြမည်ဖြစ်သည်။
ကျိုင်းတုံမြို့ ကျိုင်းဖောင်းချောင်းအတွင်း သြဂုတ်လ (၁)ရက်နေ့က ဝက်သေများ မျောပါလာသည်ကို တွေ့ရသဖြင့် သက်ဆိုင်ရာဌာနများပါဝင်သည့်အဖွဲ့က ကွင်းဆင်းစစ်ဆေးခဲ့ခြင်းဖြစ်သည်။

“ ကျိုင်းဖောင်းချောင်းဘက်မှာ စွမ်းတောင်းဆည်အတွက်သွားကြည့်ရင်း ချောင်းထဲမှာ ဝက်သေတွေ ပစ်ထားတာတွေ့လို့ သက်ဆိုင်ရာတွေနဲ့ စစ်ကြတာပေါ့နော်။ မွေးကုကတော့ သူတို့စစ်ဆေး အတည်ပြုထားတာက အာဖရိက ဝက်တုပ်ကွေးမဟုတ်ဘူး seasonal flue လို့ပြောတယ်။ ဒါပေမဲ့လည်း ဒေသခံတွေက ဝက်သေတယ်ကြားတော့ စားတာတော့လျော့သွားကြတယ်”ဟု ကျိုင်းတုံမြို့မှ ပြည်နယ်လွှတ်တော်ကိုယ်စားလှယ် ဒေါက်တာ ဝဏ္ဏစိုးက တာချီလိတ်သတင်းအေဂျင်စီသို့ ပြောသည်။

ကျိုင်းဖောင်းချောင်းအတွင်း မျှောလိုက်သည့် ဝက်သေများမှာ ကျိုင်းတုံမြို့နယ်၊ မိုင်းခွန်ကျေးရွာအုပ်စုမှဖြစ်ကြောင်း သိရသဖြင့် သြဂုတ်လ (၁)ရက်နေ့က ကျိုင်းတုံမြို့ အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ မြို့နယ်စီမံခန့်ခွဲရေးအစည်းအဝေးကျင်းပကာ ကျေးရွာအုပ်ချုပ်ရေးမှူးများအား မိမိတို့ ကျေးရွာတွင် ဝက်သေဆုံးမှုများဖြစ်ပွားပါက ချက်ချင်းအကြောင်းကြားပေးရန်၊ ဝက်များသေဆုံးပါက မီးရှို့ဖျက်ဆီးရန်၊ ဝက်များကို လွှတ်မမွေးဘဲ ဝက်ခြံများအား ဆေးဖြန်းရန်တို့ကို မြို့နယ် တိရိစ္ဆာန်မွေးမြူရေးနှင့် ကုသရေးဦးစီးဌာန တာဝန်ရှိသူက ရှင်းလင်းဆွေးနွေးထားခြင်းဖြစ်သည်။

မြန်မာ့အိမ်နီးချင်းနိုင်ငံများဖြစ်သည့် တရုတ်နှင့် လာအိုနိုင်ငံများတွင် အာဖရိက ဝက်တုပ်ကွေးရောဂါများ ဖြစ်ပွားနေခြင်းဖြစ်သည်။

Tachileik News Agency