~~~~~~~~⊰❂ Unicode Version ❂⊱~~~~~~~~

“ဒီနေ့မှာ မြေယာလျော်ကြေးလက်ခံထားပြီးသူများကို မြေယာလျော်ကြေး၊ သီးနှံလျော်ကြေးပေးအပ်တဲ့ အခမ်းအနားမှာ ကျန်တဲ့သဘော မတူသေးတဲ့သူ (၁၀၀)ကျော်ထဲက (၂၄)ဦးက လက်ခံသဘောတူ လက်မှတ်ရေးထိုးထားပါပြီ။ ရပ်/ကျေးအုပ်ချုပ်ရေးမှူးတွေကိုလည်း ပြောထားပါတယ်။ ကျန်တဲ့သူတွေထဲက လျော်ကြေးငွေလက်ခံမယ်ဆိုတာနဲ့ အခုလက်မှတ်ထိုးတဲ့သူတွေနဲ့အတူ နောက်တစ်ပတ်ထဲမှာ လျော်ကြေးငွေတွေ ပေးအပ်သွားဖို့ရှိပါတယ်”ဟု တာချီလိတ်မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။

မြေယာသိမး်ဆည်းခံရသူများအနက် မြေယာလျော်ကြေးအားလက်ခံသဘောတူထားသည့် လယ်ယာမြေနှင့်အိမ်ခြံမြေပိုင်ရှင် ( ၈၁ )ဦးအား ရန်အောင်မြေရပ်ကွက်ရှိ ပါလျှံဘုန်းတော်ကြီးကျောင်း၌ ဖိတ်ကြားပြီး ဆောက်လုပ်ရေးဝန်ကြီးဌာန၊ လမ်းဦးစီးဌာနမှ မြေယာလျော်ကြေး၊ သီးနှံလျော်ကြေး (၂၉၅,၇၇၀,ဝဝဝ)ကို သြဂုတ်လ (၆)ရက်နေ့က ပေးအပ်ခြင်းဖြစ်သည်။

မြို့ရှောင်လမ်းဖောက်လုပ်ရာတွင် လမ်းနယ်နှင့် ပါဝင်သည့် လယ်ယာမြေနှင့် အိမ်ခြံမြေ ပိုင်ရှင်(၁၉၆)ဦးအနက် ဆေခမ်းရပ်ကွက်အတွင်းမှ (၅၇)ဦး နှင့် ရန်အောင်မြေရပ်ကွက်အတွင်းမှ (၂၄)ဦးတို့အား မြေယာလျော်ကြေးနှင့် သီးနှံလျော်ကြေးပေးအပ်ရာ လန-၃၉ ကျပြီးသည့် အိမ်ခြံမြေ(၄၀x၆၀)တစ်ကွက်လျှင် ကျပ်သိန်း(၁၉၀)နှင့် လန-၃၉ ကျပြီးသည့် လယ်ယာဥယျာဉ်ခြံမြေ နှင့် မြေလွတ်မြေရိုင်းများအား တစ်ဧကလျှင် ကျပ်သိန်း(၁၉၀)နှုန်းဖြင့် စုစုပေါင်း (၂၉၅,၇၇၀,ဝဝဝ)ကျပ်အား ၂၀၁၉ခုနှစ် သြဂုတ်လ(၆)ရက်နေ့ နံနက်ပိုင်းက ပေးအပ်ခြင်း ဖြစ်သည်။

အဆိုပါပေးအပ်ပွဲသို့ ရှမ်းပြည်နယ်အစိုးရအဖွဲ့ဝင် စည်ပင်သာယာရေးဝန်ကြီး ဦးစိုင်းစွံဆိုင်း၊ လမ်းပန်းဆက်သွယ်ရေးဝန်ကြီး ဦးခွန်ရဲထွေး၊ အာခါတိုင်းရင်းသားရေးရာဝန်ကြီး ဦးအာဗေလ၊ ခရိုင်အုပ်ချုပ်ရေးမှူး ဦးမြင့်နိုင်တို့လည်း တက်ရောက်ကြသည်။

တာချီလိတ်မြို့ရှောင်လမ်းကို မြန်မာ - ထိုင်းချစ်ကြည်ရေးတံတား (၂)အနီးမှနေ၍ မယ်ဆိုင်ချောင်းတလျှောက် မိုင်းဖုန်းကျေးရွာအုပ်စုရှိ စက်မှုဇုန်နှင့် ဝမ်ပုံဖြတ်လမ်း ဦးထွန်းအောင်ဂိတ်အထိ ဖောက်လုပ်မည်ဖြစ်ကြောင်း သိရသည်။

Tachileik News Agency
ဓာတ်ပုံ - ကျော်ဇင်ဟိန်း