~~~~~~~~⊰❂ Unicode Version ❂⊱~~~~~~~~

“အခြေအနေက တိုးတက်မှုရှိလားဆိုတော့ တိုးတက်မှုရှိတယ်လို့ အပြုသဘောဆောင်ပြီး ပြောကြားလိုပါတယ်”ဟု ULA/AA အဖွဲ့မှ ဒုစစ်ဦးစီးချုပ် ညိုထွန်းအောင်က ဆွေးနွေးပွဲအပြီးတွင် သတင်းမီဒီယာများသို့ ပြောကြားသည်။

ငြိမ်းချမ်းရေးကော်မရှင်နှင့် မဟာမိတ်အဖွဲ့ (၄)ဖွဲ့တို့က ၂၀၁၉ ခုနှစ်၊ သြဂုတ်လ (၃၁)ရက်နေ့ တွင် ရှမ်းပြည်နယ် (အရှေ့ပိုင်း) ကျိုင်းတုံမြို့ရှိ Amazing Kengton Resort တွင် တွေ့ဆုံဆွေးနွေးကြပြီးနောက် ညနေ (၂)နာရီ (၄၅)မိနစ်တွင် ဆွေးနွေးပွဲရလဒ်များအား နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေးက ရှင်းလင်းသည်။

“လာမယ့်ဆွေးနွေးပွဲကို စက်တင်ဘာလ (၁၆)ရက်နဲ့ (၁၇)ရက်နေ့များမှာ ထပ်မံတွေ့ဆုံဖို့ သဘောတူပါတယ်။ နေရာကတော့ ထပ်မံအတည်ပြုရပါမယ်။ EAO ဘက်က ပန်ဆန်း သို့မဟုတ် တရုတ်နိုင်ငံတွင်း တစ်နေရာမှာ တွေ့ဆုံဖို့ အဆိုပြုပါတယ်။ သူတို့က တပ်မတော်သားကိုယ်စားလှယ်တွေပါ တက်ဖို့ တောင်းဆိုတာကြောင့် နှစ်ဖက်လုံး သွားရလာရလွယ်ကူတဲ့ ကျိုင်းတုံမှာ ကျင်းပဖို့ ကျွန်တော်တို့အစိုးရဘက်ကတော့ အဆိုပြုထားပါတယ်”ဟု နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေးက သတင်းစာရှင်းလင်းပွဲတွင် ပြောကြားသည်။

ငြိမ်းချမ်းရေးကော်မရှင်နှင့် အပစ်ရပ်လက်မှတ်မထိုးရသေးသည့် မဟာမိတ် (၄)ဖွဲ့ဖြစ်သည့် TNLA၊ MNDAA၊ AA နှင့် KIO တို့၏ ယခုတွေ့ဆုံမှုမှာ ၂၀၁၉ ခုနှစ်အတွင်း (၄)ကြိမ်မြောက်ဖြစ်ပြီး ၂၀၁၉ ခုနှစ် ဖေဖော်ဝါရီလ (၂၅)ရက်နေ့က တရုတ်နိုင်ငံ ကူမင်းမြို့၊ ဧပြီလ (၃၀)ရက်နေ့တွင် မူဆယ်၊ ဇွန်လ (၃၀)ရက်နေ့တွင် မိုင်းလားနှင့် သြဂုတ်လ (၃၁)ရက်နေ့တွင် ကျိုင်းတုံ၌ ဆွေးနွေးခဲ့ကြခြင်းဖြစ်သည်။

ဆွေးနွေးပွဲများ အတွင်း အပစ်အခတ်ရပ်စဲရေး Bilateral လက်မှတ်ရေးထိုးနိုင်ရေးအပါအဝင် လက်ရှိတွင် မဟာမိတ်အဖွဲ့ (၃)ဖွဲ့တိုက်ခိုက်နေသည့် ရှမ်းပြည်နယ်မြောက်ပိုင်းမှ တိုက်ပွဲများရပ်စဲရေးအတွက်ပါ ကျိုင်းတုံမြို့ ဆွေးနွေးပွဲတွင် ထည့်သွင်းဆွေးနွေးကြကြောင်း သိရသည်။

ရှမ်းပြည်နယ်မြောက်ပိုင်းဒေသတွင် မဟာမိတ်(၃)ဖွဲ့က သြဂုတ်လ (၁၅)ရက်နေ့မှစ၍ တိုက်ခိုက်မှုများ လုပ်ဆောင်နခြေင်းဖြစ်သည်။

Tachileik News Agency