~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံရှိ မြန်မာဒုက္ခသည်စခန်းများမှ နေရပ်ပြန်များ နီးစပ်ရာနယ်စပ်များမှ ဆက်လက်ဝင်ရောက်လာ
**************
ထိုင်းနိုင်ငံမှ မိမိဆန္ဒအလျောက်နေရပ်ပြန်လိုသူ မြန်မာနိုင်ငံသားများ စတုတ္ထအကြိမ် ပြန်လည်စိစစ်လက်ခံရေး အစီအစဉ်ဖြင့် ထိုင်းနိုင်ငံတွင်းရှိ မြန်မာဒုက္ခသည်စခန်းများမှ နေရပ်ပြန်များကို ၂၀၁၉ ခုနှစ်၊ ဇူလိုင်လ (၁)ရက်နေ့မှ (၃)ရက်နေ့အထိ လွှဲပြောင်းလက်ခံနေကြောင်း သိရသည်။

နိုင်ငံသားစိစစ်ပြီးဖြစ်သည့် နေရပ်ပြန်များ ဒုတိယနေ့ပြန်လည်လက်ခံရေးအစီအစဉ်အဖြစ် ဇူလိုင်လ (၂)ရက်နေ့တွင် ဘန်မနွိုင်ဆွိုင်းဒုက္ခသည်စခန်းမှ နေရပ်ပြန်များကို ကယားပြည်နယ် မယ်စဲ့ဂိတ်မှ လည်းကောင်း၊ ထမ်ဟင်ဒုက္ခသည်စခန်းမှ နေရပ်ပြန်များကို တနင်္သာရီတိုင်းဒေသကြီးရှိ ထီးခီးဂိတ်မှလည်းကောင်း ပြန်လည်လက်ခံသွားမည်ဖြစ်ပြီး တတိယနေ့အဖြစ် ဇူလိုင်လ (၃)ရက်နေ့တွင် မယ်လ၊ အုန်းပြန်နှင့် မယ်လအုန်းဒုက္ခသည်စခန်းများမှ နေရပ်ပြန်များကို မြဝတီမြို့ရှိ ကျောက်လုံးကြီးစခန်းတွင် လက်ခံသွားမည်ဖြစ်ကြောင်း သိရသည်။

ဇူလိုင်လ (၁)ရက်နေ့က ပထမနေ့အဖြစ် နို့ပိုးဒုက္ခသည်စခန်းမှ (၁၅၁)ဦး၊ မယ်လဒုက္ခသည်စခန်းမှ (၅)ဦး၊ အုန်းပြန်ဒုက္ခသည်စခန်းမှ(၁)ဦး စုစုပေါင်း(၁၅၇)ဦးတို့ နေရပ်ပြန်လာကြသဖြင့် မြဝတီမြို့ရှိ ကျောက်လုံးကြီးစခန်းတွင် မြန်မာတာဝန်ရှိသူများက ကြိုဆိုလက်ခံထားခြင်းဖြစ်ကြောင်း သိရသည်။

နေရပ်ပြန်လာသည့် မြန်မာနိုင်ငံသားများ နေရပ်ဇာတိပြန်လည်နေထိုင်နိုင်ရေးအတွက် သက်ဆိုင်ရာ တာဝန်ရှိသူများက ကူညီပံ့ပိုးပေးသွားမည်ဖြစ်ပြီး နေရပ်ပြန်များ နို်င်ငံသားစိစစ်ရေးကဒ်များရရှိရေး၊ ပညာရေး၊ ကျန်းမာရေးပံ့ပိုးမှုများ ဆက်လက်ဆောင်ရွက်သွားမည်ဖြစ်ကြောင်း သိရသည်။

Tachileik News Agency
Photo: MOFA