~~~~~~~~⊰❂ Unicode Version ❂⊱~~~~~~~~

ဒေသခံများနှင့် သက်ဆိုင်ရာဌာနများအကြား အပြန်အလှန် ဝေဖန်ပြစ်တင်နေသည့် မကွေးတိုင်း မြေနုကျွန်းအငြင်းပွားမှုဖြစ်စဉ် တိုင်းဒေသကြီးအစိုးရအဖွဲ့က စစ်ဆေးရေးအဖွဲ့ဖြင့် စစ်မည်
*************
မကွေးတိုင်းဒေသကြီး၊ ကံသာကျေးရွာနှင့် ဖရဲကျွန်းကျေးရွာကြား မြေနုကျွန်းပိုင်ဆိုင်ခွင့် အငြင်းပွားရာမှ လူအစုလိုက်အပြုံလိုက်သေဆုံးမှုနှင့် ပတ်သက်၍ ဒေသခံများနှင့် သက်ဆိုင်ရာဌာနများအကြား အပြန်အလှန် ဝေဖန်ပြစ်တင်နေကြပြီး မကွေးတိုင်းဒေသကြီးအစိုးရအဖွဲ့က စုံစမ်းစစ်ဆေးရေးအဖွဲ့ဖြင့် စစ်ဆေးမည်ဖြစ်ကြောင်း သိရသည်။

မကွေးတိုုင်းဒေသကြီး၊ ရေနံချောင်းမြို့နယ်၊ မာန်မြေကျေးရွာအုပ်စုရှိ ဖရဲကျွန်းကျေးရွာနှင့် ကံသာကျေးရွာတို့အကြား ဧရာဝတီမြစ်အတွင်းပေါ်လာသည့် မြေနုကျွန်းပိုင်ဆိုင်ခွင့်အတွက် အဆိုပါ ၂၀၁၈ ခုနှစ်၊ သြဂုတ်လအတွင်းကတည်းက စတင်ဖြစ်ပွားနေခဲ့ခြင်းဖြစ်ပြီး သက်ဆိုင်ရာမှ ထိရောက်စွာဖြေရှင်းပေးနိုင်ခဲ့ခြင်းမရှိ၍ ယခုကဲ့သို့ ဖြစ်ပွားရခြင်းဖြစ်သည်ဟု နှစ်ဖက်ကျေးရွာဒေသခံများက ဝေဖန်ပြစ်တင်လိုက်သည်။

 “ကျွန်တော်တို့ဘက်ကတော့ ဒီမြေဟာ ကျွန်တော်တို့ ကျမ်းကိုင်မြေပါ။ ၂၀၁၈ ခုနှစ်၊ (၃)လပိုင်းက ကမ်းပါးပြိုမှုနဲ့ကြံုတွေ့ခဲ့ရလို့ အခုပြဿနာဖြစ်တဲ့မြေနေရာမှာ ပြောင်းရွှေ့နေထိုင်ခွင့် သက်ဆိုင်ရာကို တောင်းခံပြီး နေထိုင်လာခဲ့တာပါ။ ဒါကို ၂၀၁၈ ခုနှစ်၊ ဆယ်လ(အောက်တိုဘာလ)ပိုင်းလောက်မှာ မာန်မြေနယ်ဘက်က သူတို့မြေကို ကျူးကျော်ဆောက်ပါတယ်ဆိုပြီး သက်ဆိုင်ရာကို တိုင်တယ်။ ကျွန်တော်တို့ဘက်ကလည်း ဘယ်သူ့မြေဆိုတာ ရှင်းရှင်းလင်းလင်းဖြစ်အောင် ဆောင်ရွက်ပေးပါလို့ ဆိုခဲ့ပေမဲ့ သက်ဆိုင်ရာ မြေစာရင်းဌာနတွေက ဘယ်သူပိုင်မြေပါဆိုပြီး ဖြေရှင်းဆောင်ရွက်ပေးနိုင်ခြင်း မရှိခဲ့ပါဘူး။ အဲဒီလို ဆောင်ရွက်မပေးနိုင်ခဲ့လို့ ဒီလိုအထိ ဖြစ်သွားကြရတာပါ”ဟု ဇူလိုင်လ (၂၃)ရက်နေ့က ကျေးရွာနှစ်ခု အငြင်းပွားခိုက်ရန်ဖြစ်ပွားမှုအတွင်း နေအိမ်အဖျက်ခံလိုက်ရသည့် ကံသာကျေးရွာသား ဦးမောင်ဝင်းက သတင်းစာရှင်းလင်းပွဲတွင် ပြောသည်။

လက်ရှိအချိန်ထိ သေဆုံးအတည်ပြု (၂၅)ဦးနှင့် (၁၄)ဦးပျောက်ဆုံးနေဆဲဖြစ်သည့် ကျေးရွာနှစ်ခုကြား အငြင်းပွားခိုက်ရန်ဖြစ်ပွားမှုနှင့်ပတ်သက်၍ အငြင်းပွားတိုက်ခိုက်မှုတွင်ပါဝင်သည့် ကျမ်းကိုင်ကျေးရွာအုပ်စု၊ ကံသာကျေးရွာနေသူများက ဇူလိုင်လ (၂၆)ရက် နံနက်ပိုင်းက သတင်းစာရှင်းလင်းပွဲပြုလုပ်ခြင်းဖြစ်သည်။

လူပေါင်းများစွာသေဆုံးရမှုမှာ သက်ဆိုင်ရာ၏ ထိရောက်စွာဖြေရှင်းပေးမှုမရှိခြင်းကြောင့်ဖြစ်သည်ဟု သတင်းစာရှင်းလင်းပွဲတွင် ဖရဲကျွန်းကျေးရွာနေသူများက ဆိုသည်။

“ကျွန်တော်တို့က သွားတားရင် ကျွန်တော်တို့ပိုင်နက်ထဲကို တစ်အိမ်တိုးဆောက်လာတယ်။ နောက်တစ်ခါသွားတားရင် (၅)အိမ်ဖြစ်လာတယ်။ နောက်တစ်ခါသွားတားရင် (၁၀)အိမ်ဖြစ်လာတယ်။ နောက်ဆုံး အိမ်(၂၀)လောက်အထိ ဖြစ်လာတယ်။ ကျွန်တော်တို့ ဘယ်လိုပဲ သွားတားနေနေ ဥပဒေအရ ထိရောက်ဟန့်တားမှု လုပ်မပေးနိုင်ခဲ့တော့ ကျူးကျော်အိမ်တွေက တိုးတိုးပဲလာတယ်။ ပြီးခဲ့တဲ့ ၂၀၁၈ ခုနှစ်၊ (၈)လပိုင်းမှာ အငြင်းပွားမှု စဖြစ်ခဲ့တယ်။ မြို့နယ်၊ ခရိုင်နဲ့ တိုင်းအဆင့်ဆင့်ကို တင်ပြ တိုင်တန်းခဲ့တယ်။ အဲဒီအပေါ်မှာ ဥပဒေအရ ထိရောက်တဲ့ အရေးယူဟန့်တားမှုတွေ၊ ဖြစ်တဲ့နည်းနဲ့ ပိုင်နက်တိုင်းတာပြီး နယ်နိမိတ်သတ်မှတ်မှုတွေကို လုပ်ပေးနိုင်ခဲ့ကြမယ်ဆိုရင် ဒီပြဿနာတွေ ဖြစ်လာစရာအကြောင်းမရှိပါဘူး”  ဟု အငြင်းပွားမှုဖြစ်ပွားနေသည့် ဖရဲကျွန်းကျေးရွာမှ ဦးသန်းဌေးက ပြောသည်။

အဆိုပါမြေနုကျွန်းအငြင်းပွားမှုနှင့်ပတ်သက်၍ ဇူလိုင်လ(၂၆)ရက်နေ့ နေ့လယ်(၂)နာရီခွဲအချိန်တွင် မကွေးတိုင်းဒေသကြီးအစိုးရအဖွဲ့ရုံး၌ သတင်းစာရှင်းလင်းပွဲပြုလုပ်ရာတွင် မကွေးတိုင်းဒေသကြီး လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှ တိုင်းဦးစီးမှူး ဦးဇော်ဝင်းက ၎င်းတို့ဌာနက ဥပဒေလမ်းကြောင်းအတိုင်း ဆောင်ရွက်ပေးနိုင်ရန် ကြိုးစားခဲ့သော်လည်း နှစ်ဖက်ဒေသခံများ၏ ဆန့်ကျင်ကြမှုကြောင့် မဖြစ်သင့်သည့် အခြေအနေဆိုးသို့ ဆိုက်ရောက်ခဲ့ရခြင်းဖြစ်သည်ဟု ဆိုသည်။

“မြေနုကျွန်းဆိုတာ ခိုင်မာမှုမရှိသေးဘူး။ မြစ်ကြောင်းပြောင်းလဲမှုကြောင့် အချိန်နဲ့အမျှ ပြောင်းလဲမှုရှိတယ်။ ပြဿနာဖြစ်လာရင် ဒီဟာကိုစီမံခန့်ခွဲဖို့က ဥပဒေမှာဆိုထားတာက ပေါ်လာတဲ့မြေနုကျွန်းက စိုက်ပျိုးနိုင်တဲ့ မြေရဲ့အနားရေးနဲ့ အနီးစပ်ဆုံးရွာကို ချထားပေးရမယ်လို့ဆိုတယ်။ အဲဒီမှာ ကျေးရွာအုပ်စုရဲ့ နယ်နိမိတ်အ ရ လိုချင်သူက တစ်မျိုး၊ နီးစပ်တဲ့ရွာက လိုချင်သူကတစ်မျိုး၊ အခုပြဿနာက အဲဒါပါပဲ။ ကျွန်တော်တို့ဌာနက နယ်နိမိတ်တိုင်းတာပြီးမှ ဆုံးဖြတ်ဆောင်ရွက်ပေးနိုင်မှာဖြစ်လို့ တိုင်းတာမယ်လုပ်တော့ နှစ်ဖက်စလုံးက လက်မခံကြဘူး။ ဥပဒေအတိုင်း နယ်နိမိတ်တိုင်းတာပေးဖို့ကို လက်ခံပြီး စီမံခန့်ခွဲရေးနည်းလမ်းကို လိုက်နာကြမယ်ဆို ဒီအဖြစ်မျိုး ဖြစ်လာစရာ မရှိပါဘူး။ ငါပဲပိုင်ရမယ်၊ သူပဲပိုင်ရမယ်ဆိုတဲ့အစွဲကြီးတွေကို လက်ကိုင်ထားပြီး မဖြစ်စလောက် (၇) ဧကလောက်သာရှိတဲ့ မြေအတွက် အခုလိုဖြစ်ရတာဟာ မတန်ပါဘူး။ ဝမ်းနည်းစရာကောင်းပါတယ်” ဟု မကွေးတိုင်းဒေသကြီး လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှ တိုင်းဦးစီးမှူး ဦးဇော်ဝင်းက သတင်းစာရှင်းလင်းပွဲတွင် ပြောကြားသည်။

မြေနုကျွန်းပိုင်ဆိုင်ခွင့် အငြင်းပွားနေမှုနှင့်ပတ်သက်၍ ဖရဲကျွန်းကျေးရွာသားများက ၂၀၁၉ ခုနှစ်၊ ဇူလိုင်(၂၃)ရက်နေ့ ညနေပိုင်းတွင် စက်လှေဖြင့် ကံသာကျေးရွာဘက်သို့ သွားရောက်ဖြေရှင်းကြစဉ် တစ်ဖက်နှင့်တစ်ဖက် အငြင်းပွားခိုက်ရန်ဖြစ်ပွားကြကာ ဖရဲကျွန်းကျေးရွာသားများက စက်လှေဖြင့် ပြန်လည်ထွက်ပြေးလာစဉ် လူအင်အားများသဖြင့် စက်လှေနစ်မြုပ်သွားခဲ့ရခြင်းဖြစ်ကြောင်း သိရသည်။

အဆိုပါ စက်လှေနစ်မြုပ်မှုတွင် ဖရဲကျွန်းကျေးရွာမှ အမျိုးသား၊အမျိုးသမီး စုစုပေါင်း (၄၀)ဦးပါဝင်သွားခဲ့သော်လည်း ဇူလိုင်လ (၂၆)ရက်နေ့အထိ သေဆုံးသူ (၂၄)ဦးနှင့် အသက်ရှင်ကျန်သူ (၂)ဦးတို့ကိုသာ ရှာဖွေတွေ့ရှိထားပြီး (၁၄)ဦးပျောက်ဆုံးနေဆဲဖြစ်ကာ အငြင်းပွားတိုက်ခိုက်မှုအတွင်း ကံသာကျေးရွာမှ (၁)ဦးသေဆုံးခဲ့ကြောင်း သိရသည်။

လက်ရှိတွင် မြစ်အတွင်းမှ ပြန်လည်ဆယ်ယူရရှိထားသည့် ရုပ်အလောင်းများကို သေဆုံးရခြင်းအကြောင်းရင်း စစ်ဆေးမှုများပြုလုပ်နေပြီး ကျန်ရှိပျောက်ဆုံးနေသူများကို ဆက်လက်ရှာဖွေနေဆဲဖြစ်ကြောင်း သိရသည်။

သတင်း၊ ဓာတ်ပုံ #ဖီးနစ်