~~~~~~~~⊰❂ Unicode Version ❂⊱~~~~~~~~

တာချီလိတ်မြို့ ဗိုလ်ချုပ်လမ်းပေါ်ရှိ နန်းနန်းဘွန်းကျောက် (၂) ရွှေဆိုင်အနုကြမ်းစီးခံရ
************
မြန်မာ-ထိုင်းနယ်စပ်၊ ရှမ်းပြည်နယ်အရှေ့ပိုင်း၊ တာချီလိတ်မြို့ ဗိုလ်ချုပ်အောင်ဆန်းလမ်းမကြီးဘေး၊ မယ်ခေါင်ရပ်ကွက်၊ မဲခေါင်မြစ်ဟိုတယ်ဘေးရှိ နန်းနန်းဘွန်းကျောက် (၂) ရွှေဆိုင် အနုကြမ်းစီးမှု ၂၀၁၉ ခုနှစ် ဇွန်လ (၃) ရက်နေ့ ညနေ (၂) နာရီ (၅၀) မိနစ်ခန့်က ဖြစ်ပွားကြောင်း သိရသည်။

ဆိုင်ကယ်စီးနင်းလာသူ (၂) ဦးက မျက်နှာဖုံးစွပ်များဖြင့်ဝင်ရောက်ကာ ရွှေထည်ပစ္စည်းများ ရယူသွားခြင်းဖြစ်ပြီး ရွှေဆွဲကြိုး၊ ရွှေဟန်ချိန်း(အရေအတွက်စိစစ်ဆဲ) (၈၀) ကျပ်သားခန့်ယူဆောင်သွားခဲ့ခြင်းဖြစ်ကြောင်း သိရသည်။

အခင်းဖြစ်ဆိုင်နေရာသို့ ခရိုင်ရဲတပ်ဖွဲ့အပါအဝင် သက်ဆိုင်ရာတပ်ဖွဲ့ဝင်များက စစ်ဆေးပြီး အနုကြမ်းစီးပြီးထွက်ပြေးသွားသူများကို ဖမ်းဆီးရမိရေးဆောင်ရွက်နေကြောင်း သိရသည်။

ဆန်ဆိုင်း(က)ရပ်ကွက် ဗိုလ်ချုပ်လမ်းမကြီးဘေးရှိ နန်းနန်းဘွန်းကျောက်ရွှေဆိုင်တွင်လည်း ပြီးခဲ့သည့် မတ်လ (၂၉) ရက်နေ့ နံနက် (၇) နာရီခန့်ကလည်း လက်နက်ကိုင်ထားသည့် လူ (၆) ဦးအဖွဲ့က ဝင်ရောက်အနုကြမ်းပြီး ရွှေ (၈၀) ကျပ်သားဝန်းကျင်၊ စိန်ထည်ပစ္စည်း ဘတ်သိန်း (၂၀)ဖိုးခန့်၊ ထိုင်းဘတ်ငွေ သိန်း (၂၀)နှင့် လက်ကိုင်ဖုန်း (၇)လုံးတို့ ယူဆောင်သွားခဲ့ခြင်းဖြစ်ကာ
အဆိုပါဆိုင်အား အနုကြမ်းစီးမှုတွင်ပါဝင်သူနှင့် ဆက်စပ်သူ (၃)ဦးကို ဖမ်းမိထားသည့်အနက် ထိုင်းနိုင်ငံသားတစ်ဦးလည်း ပါဝင်နေကြောင်း သိရသည်။

သတင်း - #ဟန်စိုးထိုက် ( Tachileik News Agency )
ဓာတ်ပုံ  - #ကျော်ဇင်ဟိန်း