~~~~~~~~⊰❂ Unicode Version ❂⊱~~~~~~~~

ကျိုင်းတုံမြို့နယ်အတွင်း ကျေးရွာအုပ်စု(၃)ခုရှိ မြေလွတ်မြေရိုင်းများကို ကျွဲနွားများအတွက် စားကျက်မြေလျှောက်ထားမည်
*************
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်ရှိ ကတ်ထိုက်၊ ပင်းတောက်နှင့် ပန်မတ်ကျေးရွာအုပ်စု (၃)ခုတွင် စားကျက်မြေမရှိသဖြင့် ကျွဲနွားမွေးမြူသူများနှင့် တောင်သူများအကြား မကြာခဏပြဿနာဖြစ်ပွားနေသဖြင့် အဆိုပါကျေးရွာများအနီးရှိ မြေလွတ်မြေရိုင်းများမှ စားကျက်မြေလျှောက်ထားရန် စီစဉ်နေကြောင်း သိရသည်။

"အဲဒီနေရာက နယ် (၃) နေရာဆုံတာပေ့ါ။ ကတ်ထိုက်အုပ်စုရယ်၊ ပင်းတောက်အုပ်စုရယ်၊ ပန်မတ်အုပ်စုရယ် ဆုံတာပေါ့။ ကတ်ထိုက်အုပ်စုက နွားတွေ ကျွဲတွေမွေးတာက ဒီဘက်ကိုလာကျောင်းတော့ ပင်းတောက်အုပ်စုက လယ်တွေပျက်တာပေါ့။ လယ်စိုက်တဲ့သူတွေရော ကျွဲ၊ နွားမွေးတဲ့ပိုင်ရှင်တွေရော အကုန်ခေါ်လိုက်တယ်။ ပင်းတောက်အုပ်စုဖက်ကိုမသွားနိုင်အောင် ခြံစည်းရိုးကာခိုင်းထားတယ်။ သွပ်နန်းကြိုးတွေကာခိုင်းထားတယ်။ အဲဒီနေရာမှာ မြေလွတ်မြေရိုင်းတွေရှိတယ်။ စားကျက်မြေလျှောက်ခိုင်းထားတယ်။ ဟိုဘက်ကို ကျွဲ၊ နွားတွေဝင်လို့ လယ်ပျက်စီးရင် လျော်ကြေးပေးရမယ်လို့ ပြောထားတယ်။ မြောင်းတူးမယ်၊ မြောင်းတစ်ဖက်မှာ သံဆူးကြိုးကာခိုင်းထားတယ်"ဟု ကျိုင်းတုံမြို့နယ် လွှတ်တော်ကိုယ်စားလှယ် ဒေါက်တာဝဏ္ဍစိုးက တာချီလိတ်သတင်းအေဂျင်စီသို့ ပြောသည်။

အဆိုပါကျေးရွာအုပ်စု (၃)ခုတွင် စပါးစိုက်တောင်သူများနှင့် ကျွဲနွားမွေးမြူသူများအကြား ပြသနာဖြစ်ပွားနေသဖြင့် လွှတ်တော်ကိုယ်စားလှယ်နှင့် ဌာနဆိုင်ရာများပါဝင်သည့်အဖွဲ့က ၂၀၁၉ ခုနှစ်၊ ဇွန်လ (၂၃) ရက်နေ့တွင် သွားရောက်ဖြေရှင်းပေးထားခြင်းဖြစ်ကြောင်း  သိရသည်။

ကတ်ထိုက်ကျေးရွာအုပ်စု တုံကွမ်ကျေးရွာမှ ကျွဲ၊ နွားကောင်ရေ (၂၀၀) ခန့်မှာ စားကျက်မြေမရှိသဖြင့် အနီးနားရှိ ပင်းတောက်ကျေးရွာအုပ်စု ဝမ်နောင်ကျေးရွာ၊ တင်ထပ်ကျေးရွာနှင့် ဝမ်ခါးကျေးရွာများမှ စိုက်ခင်းများတွင် ဝင်ရောက်စားသောက်မှုကြောင့် မြို့နယ်စီမံခန့်ခွဲမှုကော်မတီသို့ တိုင်ကြားမှုများရှိနေသဖြင့် သွားရောက်ဖြေရှင်းပေးထားခြင်းဖြစ်ကြောင်း သိရသည်။

သတင်း #ဟန်စိုးထိုက်
ဓါတ်ပုံ - WNS