~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံ ဘန်ခွမ်အကျဉ်းထောင်မှ ဝင်းနှင့်ဇော်အပါအဝင် မြန်မာနိုင်ငံသားများအား မြန်မာသံရုံးနှင့် FED ဝန်ထမ်းများ သွားရောက်တွေ့ဆုံ
*******
ထိုင်းနိုင်ငံတွင် သေဒဏ်ကျခံနေရသည့် မြန်မာနိုင်ငံသား ဝင်းနှင့်ဇော်မှာ အယူခံဝင်နေဆဲအမှုဖြစ်သဖြင့် ထိုင်းဘုရင်သစ် နန်းတက်အထိမ်းအမှတ်လွတ်ငြိမ်းချမ်းသာတွင် ပါဝင်ခြင်းမရှိကြောင်းသိရပြီး ၂၀၁၉ ခုနှစ်၊ မေလ (၂၄)ရက်နေ့က မြန်မာသံရုံး သံအရာရှိနှင့် FED ဝန်ထမ်းများက ဘန်ခွမ်အကျဉ်းထောင်သို့ သွားရောက်တွေ့ဆုံကြောင်း သိရသည်။

ဘုရင်သစ်နန်းတက်သည့် အထိမ်းအမှတ် လွတ်ငြိမ်းချမ်းသာပေးခဲ့ရာ ဘန်ခွမ်အကျဉ်းထောင်မှ မြန်မာနိုင်ငံသား စုစုပေါင်း (၁၀) ဦးမှာ မေလ (၁၇)ရက်နေ့က လွတ်ငြိမ်းချမ်းသာဖြင့်ပြန်လွတ်လာသဖြင့် လဝကအချုပ်သို့ ပို့ဆောင်ထားပြီးဖြစ်ရာ ၎င်းတို့အား မြန်မာနိုင်ငံသို့ ပြန်လွှဲနိုင်ရန် မြန်မာသံရုံးတာဝန်ရှိသူများက ဆက်လက်ဆောင်ရွက်ပေးနေကြောင်း သိရသည်။

မြန်မာသံရုံးမှ တာဝန်ရှိသူများနှင့် FED ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်းမှဝန်ထမ်းများက ဘန်ခွမ်အကျဉ်းထောင်မှ မြန်မာနိုင်ငံသား အကျဉ်းကျနေသူများအား တွေ့ဆုံ၍ အစားအစာ၊ အသုံးအဆောင်၊ ငွေကြေးနှင့် စာစောင်စာအုပ်များ ပေးအပ်ခဲ့ကြောင်း ထိုင်းနိုင်ငံအခြေစိုက် လေဘာဟစ်တိုင်တွင်ဖေါ်ပြချက်အရ သိရသည်။

Tachileik News Agency
Photo: FED