~~~~~~~~⊰❂ Unicode Version ❂⊱~~~~~~~~

တပ်မတော်က စစ်ရေးလှုပ်ရှားမှုရပ်ဆိုင်းကာလ နှစ်လထပ်တိုးခြင်းကို ကုလသမဂ္ဂဌာနေညှိနှိုင်းရေးမှူး ကြိုဆို
***********
တပ်မတော်က တိုင်းစစ်ဌာနချုပ် ( ၅ ) နေရာတွင် စစ်ရေးလှုပ်ရှားမှုရပ်ဆိုင်းကာလကို (၂)လထပ်မံ တိုးမြှင့်လိုက်ခြင်းကို ကုလသမဂ္ဂ ဌာနေညှိနှိုင်းရေးမှုးနှင့် လူသားချင်းစာနာမှုဆိုင်ရာ ဌာနေညှိနှိုင်းရေးမှုး (ယာယီ) ခနုသ်အော့စဘီက ကြိုဆိုကြောင်း  ၂၀၁၉ ခုနှစ်၊ မေလ (၁) ရက်နေ့တွင် ထုတ်ပြန်သည်။

အဆိုပါအပစ်အခတ်ရပ်စဲရေးကာလသည် မြန်မာနိုင်ငံ၏ ငြိမ်းချမ်းရေးလမ်းစဉ်ကို ပိုမိုခိုင်မာစေမည်ဟု မစ္စတာ အော့စဘီအနေဖြင့် မျှော်လင့်ထားပြီး မြန်မာနိုင်ငံရှိ ကုလသမဂ္ဂအဖွဲ့အစည်းများသည် သက်ရောက်မှုရှိသော  ဒေသတွင်းရှိ လိုအပ်ချက်များရှိ နေသော လူသားများအားလုံးကို အရေးပေါ်လူသားချင်းစာနာမှု အကူအညီများပေးနိုင်ရန် သက်ဆိုင်ရာ အဖွဲ့များ အားလုံးနှင့်အတူ လုပ်ဆောင်ရန် အသင့်ရှိနေပါသည်ဟု ထုတ်ပြန်ထားသည်။

သက်ဆိုင်ရာအဖွဲ့များအားလုံးအနေဖြင့်လည်း အရပ်သားများကို အကာအကွယ်ပေးရန်နှင့် နိုင်ငံတကာ လူသားချင်း စာနာမှုနှင့် လူ့အခွင့်အရေးဆိုင်ရာ နိုင်ငံတကာဥပဒေအရချမှတ်ထားသော တာဝန်ဝတ္တရားများကို ထိန်းသိမ်းစောင့်ရှောက်ရန်ကိုလည်း မစ္စတာ အော့စဘီက ပန်ကြားလိုက်သည်။

တပ်မတော်က တိုင်းစစ်ဌာနချုပ် ( ၅ ) နေရာတွင် (၄)လတာ စစ်ရေးလှုပ်ရှားမှုရပ်ဆိုင်းသည့်ကာလအတွင်း NCA လက်မှတ်ထိုးရန်ကျန်နေသည့် တိုင်းရင်းသားလက်နက်ကိုင်အဖွဲ့များဖြင့် ငြိမ်းချမ်းရေးဆွေးနွေးမှုများ ရှိခဲ့ပြီး အပစ်အခတ်ရပ်စဲရေးကာလထပ်မံတိုးမြှင့်ပေးရန် တောင်းဆိုချက်အရ ၂၀၁၉ ခုနှစ်၊ ဇွန်လ (၃၀)ရက်နေ့အထိ ထပ်မံတိုးမြှင့်မည်ဖြစ်ကြောင်း တပ်မတော်ကာကွယ်ရေးဦးစီးချုပ်ရုံးက ဧပြီလ (၃၀)ရက်နေ့တွင် သတင်းထုတ်ပြန်သည်။

တပ်မတော်က တိုင်းစစ်ဌာနချုပ် (၅)နေရာဖြစ်သည့် မြောက်ပိုင်းတိုင်းစစ်ဌာနချုပ်နယ်မြေ၊ အရှေ့မြောက်တိုင်း စစ်ဌာနချုပ်နယ်မြေ၊အရှေ့ပိုင်းတိုင်းစစ်ဌာနချုပ်နယ်မြေ၊ အရှေ့အလယ်ပိုင်းတိုင်းစစ်ဌာနချုပ်နယ်မြေနှင့် တြိဂံဒေသတိုင်းစစ်ဌာနချုပ်နယ်မြေများတွင် စစ်ရေးဆိုင်ရာလှုပ်ရှားမှုအားလုံးကို ၂၀၁၈ ခုနှစ်၊ ဒီဇင်ဘာလ (၂၁)ရက်နေ့မှ ၂၀၁၉ ခုနှစ်၊ ဧပြီလ (၃၀)ရက်နေ့အထိ လေးလတာရပ်ဆိုင်းခဲ့ရာမှ ဇွန်လ (၃၀)ရက်နေ့အထိ နှစ်လတာ ထပ်တိုးလိုက်ခြင်းဖြစ်သည်။

တပ်မတော်က စစ်ရေးလှုပ်ရှားမှုရပ်ဆိုင်းမှု နှစ်လတာထပ်တိုးသည့် ကြေညာချက်ထွက်လာသည့်ကာလအတွင်း ၂၀၁၉ ခုနှစ်၊ မေလ (၁)ရက်နေ့တွင် KIO(ကချင်ပြည်လွတ်မြောက်ရေးအဖွဲ့) ၊ MNTJP(မြန်မာနိုင်ငံအမှန်တရားနှင့် တရားမျှတသောအမျိုးသားပါတီ) ၊ PSLF (ပလောင်ပြည်နယ်လွတ် မြောက်ရေးတပ်ဦး) နှင့် ULA (ရခိုင်အမျိုးသားအဖွဲ့ချုပ်) တို့သည် ရှမ်းပြည်နယ်မြောက်ပိုင်း၊ မူဆယ်မြို့ရှိ မူဆယ်-နမ့်ခမ်း နယ်စပ်ကုန်သွယ်ရေး ကုန်သည်များအသင်းတွင် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန(NRPC) ကိုယ်စားလှယ်အဖွဲ့ နှင့် တွေ့ဆုံဆွေးနွေးနေကြောင်း သိရသည်။

Tachileik News Agency