Tachileik News Agency
***************
မြန်မာ - ထိုင်းနယ်စပ် ရှမ်းပြည်နယ်အရှေ့ပိုင်း၊ တာချီလိတ်မြို့နှင့် ထိုင်းနိုင်ငံ၊ မယ်ဆိုင်မြို့ကြား (၉၅)ကြိမ်မြောက် မြန်မာ - ထိုင်း မြို့နယ်အဆင့် နယ်ခြားကော်မတီကို ၂၀၁၉ ခုနှစ်၊ ဧပြီလ (၃၀)ရက်နေ့က တာချီလိတ်မြို့တွင် ကျင်းပသည်။
အဆိုပါအစည်းအဝေးတွင် နှစ်နိုင်ငံနယ်နမိတ်ချောင်းဖြစ်သည့် မယ်ဆိုင်မယ်ဟောက်ချောင်းဘေးတွင် မြန်မာနိုင်ငံဘက်မှ မြေထိန်းနံရံတည်ဆောက်နေမှု၊ ထိုင်းဘက်မှ အသိမပေးဘဲ ရေသွယ်မြောင်းဟောင်းများပြုပြင်၍ ရေရယူနေမှု၊ နှစ်နိုင်ငံမှ ချောင်းဘေးတစ်လျှောက်နေထိုင်သူများက အဆောက်အဦများကို ချောင်းအတွင်းဘက်ကျူးကျော်တည်ဆောက်နေမှု၊ နှစ်နိုင်ငံနယ်စပ်ဒေသများတွင် ကာလကြာမြင့်စွာခံစားခဲ့ရသည့် မီးခိုးမြူထူထပ်စွာ ပိတ်ဆို့မှုနှင့် လေထုညစ်ညမ်းမှုနှင့်ပတ်သက်၍ နှစ်နိုင်ငံမှ တောင်ယာမီးရှို့မှုများအား ထိန်းသိမ်းရန်နှင့် မီးတားလမ်းစီမံချက်၊ မြန်မာနိုင်ငံမှ စိုက်ပျိုးရေးထွက်ကုန်နှင့် လယ်ယာထွက်ကုန်များ တင်ပို့ရေးကိစ္စနှင့် နှစ်နိုင်ငံ တရားခံပြေးများ အပြန်အလှန်ဖမ်းဆီးပေးရေးတို့ကို ဆွေးနွေးခဲ့ကြသည်။
အဆိုပါအစည်းအဝေးကို နှစ်နိုင်ငံ အလှည့်ကျကျင်းပနေခြင်းဖြစ်ပြီး (၉၅)ကြိမ်မြောက်ကို မြန်မာက အလှည့်ကျအဖြစ် တာချီလိတ်မြို့ရှိ ရွှေနန်းတော်ကုန်တိုက်တွင်ကျင်းပရာ ထိုင်းနိုင်ငံ မယ်ဆိုင်ဘက်မှ (၄၇)ဦးပါဝင်သည့် ကိုယ်စားလှယ်အဖွဲ့နှင့် မြန်မာနိုင်ငံ တာချီလိတ်ဘက်မှ လေ့လာသူ (၂၀)ဦးအပါအဝင် (၂၅)ဦးပါဝင်သည့် ကိုယ်စားလှယ်အဖွဲ့တို့ ဆွေးနွေးခဲ့ကြခြင်းဖြစ်သည်။
Tachileik News Agency
Photo: Maesai Police
