~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် ဖမ်းဆီးခံရသည့် မြန်မာနိုင်ငံသား (၁၅)ဦးကို တာချီလိတ်သို့ လာရောက်လွှဲပြောင်း
***********
မြန်မာ - ထိုင်းနယ်စပ်၊ ရှမ်းပြည်နယ်အရှေ့ပိုင်း၊ တာချီလိတ်မြို့သို့ ထိုင်းနိုင်ငံတွင်း ဖမ်းဆီးခံရသည့် မြန်မာနိုင်ငံသား (၁၅)ဦးကို ၂၀၁၉ ခုနှစ်၊ ဧပြီလ (၂၅)ရက်နေ့ ညနေ (၃)နာရီခွဲက လာရောက်လွှဲပြောင်းပေးသည်။

ထိုင်းနိုင်ငံအတွင်း နယ်မြေကျော်ဝင်ရောက်ခြင်း၊ တရားမဝင် ဝင်ရောက်ခြင်းတို့ကြောင့် ဖမ်းဆီးခံရသည့်
မြန်မာနိုင်ငံသား အမျိုးသား(၉)ဦးနှင့် အမျိုးသမီး(၆)ဦး စုစုပေါင်း (၁၅)ဦးအား မယ်ဆိုင် လဝက နှင့် အဖွဲ့မှ မြန်မာ - ထိုင်းချစ်ကြည်ရေး အမှတ်(၂)တံတားမှ တာချီလိတ်သို့ လာရောက်လွှဲပြောင်းပေးခဲ့ခြင်းဖြစ်သည်။

လွှဲပြောင်းပေးလာသူများတွင် ရှမ်းပြည်နယ်အရှေ့ပိုင်းဒေသမှ (၃)ဦး၊ တောင်ပိုင်းဒေသမှ (၉)ဦးနှင့် မြောက်ပိုင်းဒေသမှ (၃)ဦးပါဝင်ပြီး ၎င်းတို့၏ မိဘဆွေမျိုးများနှင့် အုပ်ထိန်းသူများထံ လွှဲပြောင်းပေးခဲ့ကြောင်း သိရသည်။

လွှဲပြောင်းပေးလာသူများအား မြန်မာဘက်မှ မြို့နယ်အထွေထွေအုပ်ချုပ်ရေးဦးစီးဌာန၊ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးဌာန၊ မြို့နယ်အလုပ်သမား ညွှန်ကြားမှုဦးစီးဌာန၊ လူကုန်ကူးမှုတိုက်ဖျက်ရေးရဲတပ်ဖွဲ့နှင့် ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ (CNCMC) တို့က စိစစ်လက်ခံကြကြောင်း သိရသည်။

တာချီလိတ်မှ နယ်စပ်ဖြတ်သန်းခွင့်လက်မှတ်ဖြင့် ထိုင်းနိုင်ငံဘက် လည်ပတ်ရာတွင် သတ်မှတ် ဧရိယာ ကျော်လွန်သွားလာသူများအပါအဝင် အကြောင်းအမျိုးမျိုးဖြင့် ဖမ်းဆီးခံရပြီး ပြစ်ဒဏ်စေ့သူများကိုလည်း မြန်မာဘက်သို့ ပြန်လည်လွှဲပြောင်းပေးလေ့ရှိပြီး တစ်ခါတစ်ရံတွင် မြန်မာနိုင်ငံသားအဖြစ် အတည်ပြုနိုင်ခြင်းမရှိသူများကို ထိုင်းဘက်သို့ ပြန်လည်လွှဲပြောင်းပေးရမှုများလည်းရှိကြောင်း သိရသည်။

Tachileik News Agency
ဓါတ်ပုံ - Kyaw Zin Hein