****************
ရှမ်းပြည်နယ်တောင်ပိုင်း၊ တောင်ကြီးမြို့မှ လေးလောင်းပြိုင်အသတ်ခံလိုက်ရသည့်နေအိမ်မှ ငွေကျပ်သိန်း (၄၀)အပါအဝင် စုစုပေါင်းကျပ်သိန်း (၁၅၅၇)တန်ဖိုးရှိ လက်ဝတ်ရတနာများပျောက်ဆုံးသွားသည်ကို သေဆုံးသူ၏ကျန်ရစ်သည့်မိသားစုက အတည်ပြုပေးထားကြောင်း သိရသည်။
တောင်ကြီးမြို့၊ ကန်သာရပ်ကွက်၊ နယ်မြေ (၁၄)၊ မင်္ဂလာလမ်းရှိ မြင်းဖြူနှစ်ကောင်ဆေးတိုက်နေအိမ်တွင် အသက်(၇)လအရွယ်ကလေးအပါအဝင် ကလေး၏မိခင်၊ ဖခင်နှင့် အိမ်အကူတို့အား သတ်ထားသည်ကို ၂၀၁၉ ခုနှစ်၊ ဧပြီလ (၂၈)ရက်နေ့ နံနက် (၈)နာရီ (၄၅)မိနစ်အချိန်၌ တောင်ကြီးမြို့မရဲတပ်ဖွဲ့က သတင်းရရှိခဲ့သဖြင့် စစ်ဆေးခဲ့ခြင်းဖြစ်ကြောင်း သိရသည်။
လူသတ်မှုကျူးလွန်သူတို့က ကျောက်ပြာပါ လက်စွပ် (၂)ကွင်း၊ ကျောက်နီပါ လက်ကောက် (၄)ကွင်း၊ ကျောက်နီပါ ရွှေဘယက် (၁)ကုံး၊ ကျောက်ပြာပါ ရွှေဘယက် (၂)ကုံး၊ (၁၂)ကျပ်သားခန့်ရှိ ရွှေချောင်း (၆)ချောင်း၊ စိန်လက်ကောက် (၃)ကွင်း၊ ဒင်္ဂါးလက်ကောက်(၁၄)ကွင်း၊ ရွှေခေါင်းဘီး (၂)ခု၊ ရွှေဆံညှပ် (၁)ခု၊ ငွေဒင်္ဂါးပြား (၃၀၀)ပြား၊ ရွှေဆွဲကြိုး (၁၁)ကုံး၊ ရွှေလက်ကောက် (၁၃)ကွင်းနှင့် ငွေသား ကျပ်သိန်း (၄၀)တို့ကို ယူဆောင်သွားခဲ့ခြင်းဖြစ်ကြောင်း သိရသည်။
အဆိုပါလူသတ်မှုကို တောင်ကြီးမြို့မရဲစခန်းတွင် (ပ) ၇၉၃/၂၀၁၉၊ ရာဇသတ်ကြီးပုဒ်မ ၃၀၂/၃၉၄ ဖြင့် အမှုဖွင့်ထားကြောင်း သိရသည်။
Tachileik News Agency
