~~~~~~~~⊰❂ Unicode Version ❂⊱~~~~~~~~

ငှက်ပျောသီးစားနေသည့် အမျိုးသမီးပုံကို ဝါဆောအမျိုးသားပြတိုက်မှဖယ်ရန်ဆုံးဖြတ်၍ ကန့်ကွက်မှုများ ထွက်ပေါ်
*************
ပိုလန်တွင် အမျိုးသားပြတိုက် ပန်းချီပြခန်းမှ အမျိုးသမီးတစ်ဦး ငှက်ပျောသီးစားနေသည့် ဖန်တီးမှုကို ဖယ်ရှားမည့်ဆုံးဖြတ်ချက် ပြင်ဆင်ရေးအတွက် နိုင်ငံရေးသမားများနှင့် ပန်းချီအနုပညာရှင်များ လူမှုကွန်ယက်စာမျက်နှာမှနေ၍ လုပ်ဆောင်နေကြသည်။

ဝါဆောအမျိုးသားပြတိုက်က ၁၉၇၃ ခုနှစ်လက်ရာဖြစ်သည့် ပန်းချီပညာရှင် Natalia LL ၏ ဝတ်လစ်စလစ်အမျိုးသမီးတစ်ဦး ငှက်ပျောသီးစားနေသည့်ပုံစံကွဲများကို ဖေါ်ညွှန်းထားသည့်လက်ရာအား ဖယ်ရှားမည်ဟု လွန်ခဲ့သည့်တစ်ပတ်က ထုတ်ပြန်ကြေညာလိုက်ခြင်းဖြစ်သည်။

လူငယ်များအတွက် အဆိုပါပုံကို ဖယ်ရှားလိုခြင်းဖြစ်သည်ဟု ပြတိုက် ညွှန်ကြားရေးမှူးက ထုတ်ဖေါ်ပြောကြားလိုက်ရာ ပြတိုက်၏ ဆင်ဆာနှင့်ပတ်သက်၍ ဆန့်ကျင်ဆန္ဒထုတ်ဖေါ်သည့်အနေဖြင့် ငှက်ပျောသီးဖြင့်ဓါတ်ပုံရိုက်ပြီး လူမှုကွန်ယက်တွင် တင်နေကြခြင်းဖြစ်သည်။

အဆိုပါပုံများ၏ဖန်တီးရှင် Natalia LL သည် ထင်ရှားလှသည့်အနုပညာရှင်တစ်ဦးဖြစ်ပြီး ယနေ့ခေတ်ကာလအချိန်တွင် လူတစ်ဦးတစ်ယောက်က အနုပညာတစ်ရပ်အပေါ်တွင် လိင်မှုကိစ္စအမြင်ဖြင့် ကန့်သတ်ခြင်းမှာ မှန်းဆ၍ပင်မရကြောင်း ကန့်ကွက်သူများက ဆိုသည်။

Natalia က အဆိုပါပုံကို  ပိုလန်နိုင်ငံ ကွန်မြူနစ်စနစ်အုပ်စိုးစဉ်က ဖန်တီးခဲ့ခြင်းဖြစ်ကြောင်း သိရသည်။
အဆိုပါပုံအားဖယ်ထုတ်ရန် အမျိုးသားယာဉ်ကျေးမှုအမွေအနှစ်နှင့် ယဉ်ကျေးမှုဝန်ကြီးဌာနအနေဖြင့် သိရှိခြင်းမရှိဘဲ ညွှန်ကြားရေးမှူး၏ ဆုံးဖြတ်ချက်သာဖြစ်ကြောင်းနှင့် ကန့်ကွက်မှုများကြောင့် ဖယ်ရှားခြင်းမပြုတော့ဘဲ ၂၀ ရာစုမှ ၂၁ ရာစု ပြခန်းတွင် ရွှေ့ပြောင်းထားကြောင်း သိရသည်။

Tachileik News Agency
Ref: CNN